小乖乖香港電訊

香港電訊派息少增2%, 合格, 全世界都話6823 債重, 但其實電訊派息係睇現金流, 呢個都係我最鐘意電訊的原因, 唔洗睇咩減唔減值, 利唔利潤, 當然債重點都無淨現金咁禾味, 但都唔代表會好似內房咁爆煲, 所以唔可以一見負債就PASS, 各行各業唔同

業績無細睇啦, 總之大約持平, 負債比率升到7成, 係無咁靚仔, 所以主倉依然係215 315, 6823 算係前菜吧, HKBN 1883 算甜品

又認真睇下成日為人狗病的負債, 大約係債券五成, 五成銀行, 23 年已贖回一筆債, 下年要還5億美仔, 26 年7.5億,  27 年2億歐, 平均息口3厘左右, 未來再融資的確難, 而家發起碼要5-6厘吧, 不得不說HKT 的債之前發得真係靚, 銀行借款23年尾升到五厘, 所以未來如果減息我估影響銀行借款比較多, 都解釋到呢兩年加息影響點解唔算大

23 年財報:

中報最新融資成本由9億升到10億幾, 升左18%, 全年應該都係22-23億左右, 減息一厘可能都係影響三四億, 其實你話佢好受惠減息又唔係, 肯定唔夠HKBN 咁受惠, 原因係HKT債券多, 但有利再融資, 唔洗賣野

另外講下佢賣無源光纖, 用PE16.9 同PB 4 套現左67 億港紙, 夠贖回25年的債, 26 年有7.5 億要贖, 都有D 壓力, 我估可能要再賣少少野先得, 但整體資產係有價有市, 唔係內房哥D 三線垃圾地, 而且6823 前景都係良好, 維持派息問題唔大

香港電訊（6823）上月出售無源光纖網絡業務40%股權，交易完成後獲8.7億美元（約67.9億港元）現金，財務總裁潘智豪今於網上業績會時表示，該現金可償還明年到期5億美元債券和後年部分債券，故今明兩年公司沒即時融資需要。

原文網址：https://finance.mingpao.com/fin/instantf/20240725/1721903253315

買入少量1883

2.04 買左38000 股1883, 毛估佢今年派0.16-0.18, 應該都有8-9 厘, 倉位同HKBN 一樣, 估唔到1883 只可淪位同HKBN 同等待遇, 嗚

港電訊倉位

315=215>8>6823>1883=1310

而家中港電訊位我65%倉位了, 要節制下

另20.5 買入4000 股883, 主要用海肥換入

高估自己的持貨能力

幾年前利率仲係1.X左右哥陣, 成日聽到D 人買股收息最鐘意講一句 "就算跌到XX, 都仲有XX 厘呀, 高過定期呀!!!"

早幾日又係雪球見到大A 同胞講同樣說話, 即時諗起以前我曾經都係咁

喂XXX跌極都有五厘啦, 點都好過放銀行blablabla

幾年前我什至試過去銀行加按諗住套現買REITS套利, 好彩哥陣銀行嫌我收入低無濕我

大部份人真係高估左自己的持貨能力, 5厘跌到6厘, 6厘跌到7厘, 7厘跌到8厘, 如果你真係只用國債或定期做對比, 唔係應該越跌越Kai 心?

回撤10%你已經腳都震啦, 仲講咩同定期比, 好似1883 咁一日跌左20%, 第二日再跌3%, 仲有D 兄弟講點都好過放定期, 就算215 呢D 99% 派硬7厘的, 如果有一日跌到9厘, 我都會懷疑係咪自己睇錯, 比你溝貨你都係硬住頭皮,  都唔洗講前景OR 業績向下的收息股, 溝即係賭 (其實賭無問題)。 

我做法係出意外點都要減貨, 除非世人皆醉你獨醒, 我發現呢個情況係極少, 所以老散死於抄底的機會係大大於死於高追, 抄底係講緊成個世界錯得你岩喎, 大佬你咁威諾貝爾獎都一早要比你啦. 比你抄到幾次底都係豬中, 運氣切勿當實力。

中海肥料, 勝屍, 都係衰在無係高位減多, 前者只係2.4 減左一半, 後者只在1蚊減了3成, 海肥盈驚其實預左, 但都係要減, 1.97 減多20%, 睇位入883

當你係市場被鞭得多, 就會發現可以死派定息的股真係少之有少, 現金流, 財務狀態, 大股東持股情況, 大股東人品, 最後係股息率, 缺一不可, 呢個就係老散收息的藝術

結論係, 唔好係高估自己買收息股的持貨能力, 好多時唔好話跌, 唔升你都頂唔順, 或者求其買D "覺得" 好過做定期的股, 除非你真係錢多到放埋一邊唔洗理哥隻

1883 的刑警

1883 係我以前的頭號舊愛, 識我的人應該都知, 最高峰以前佔我倉4成, 同而家941 一樣

1883 係澳門人的情意結, 壟斷, 高息, 現金流好, 係以前真係收息之王

但自從澳門特許經營傾唔掂 (唔係牌照, 唔明點解好多人都話牌照問題), 已經失去左佢獨有的特質, 就好似中國突然話唔限三大電訊(其實仲有廣電), 任何有興趣的人都可以申請咁, 點可能唔受影響? 

1883 以前都會獨立公布CTM 條數, 但近幾年無, 所以跟本唔知影響幾大, 可能大, 可能細, 呢個本來已經好大不確定性, 收息的主倉可以唔一定最高息, 但一次要派足, 唔好突然同我講一時9厘一時8厘一時6厘

再插一刀係23年下半年利潤同上半年比大降, 然後2024上半年繼續跌, 已經無左業績的可預測性, 即突然爆賺, 突然又唔賺, 管理層跟本無解釋當中的國際電訊業務係咩黎, SMS 點可能突然賺幾億, 半年後突然又無賺? 超級可疑

然後疊加2025年借的4.5 億美債到期, 加上辛爺爺退休, 西成哥上場, 會唔會財務大洗澡?

呢堆不確定性都要至少到2025全年業績後先可以稍為清楚

1883 而家95億市值, 如果只賺到8-9億, 加上還債, 仲可以派到幾多? 這是一個謎, 總之收息只需要理派息的確定性, 而家1883 只可以係跌到殘時撈少少睇戲, 同我倉入面的完美, 東方錶, 領賤差唔多, 世上果然沒有長持的收息股

果園執位

沽清基建三傻, 中石化, 中煉化, 3000 股941, 中外運

入215, 315, 8, 東方錶, 完美, 佐單佬, 六哭

價值25億的統一鼠頭

之前5 蚊買左3萬股統一, 原本收左息升到7 蚊諗住走, 但倉入面無一隻消費股, 220 質地財務派息都仲係向上, 所以打算長渣

點知今日整單鼠頭, 一野令220市值蒸發左10%, 我真係得啖笑中帶點無奈, 先唔講單野假到不像真, 係包酸菜要塞得落個鼠頭, 個事主唧完出黎仲要食晒成碗面再咬一啖先知係鼠頭, 成件事本身已搞笑, 再發生係食用油, 農夫山泉之後, 個時間點真係完美

我只係想講, 任何股都會有黑天鵝, 一隻幾老定的股都可以出意外, 分散永遠係散戶的自保力量, 世事變幻無常, 無常才是有常

BTW 6.2 我都買番4000股支持下220, 又睇下個鼠頭真定假, 哈

同場加演勝屍被爆擊, 打野三寶716. 220, 732, 得番732 頂得住...........嗚哇

我有一果園

組合平均息率因為941 升值而跌到得番7.5%, 倉內最高息的係少量HK地產的假幻息率, 最低的係單吊的941 , 其實好想找個機會平衡一下941, 但係論派息確定性暫時只有215 可比, 215 開始有人同我搶貨, 1 蚊得番7.5%, 但唔洗收稅, 941 實際按佢24年派5 蚊HKD, 扣10% 應該都係5.8%-6%左右, 只係中移動有國內屬性, 當內銀7厘, 神華6厘, 三桶油6-7厘, 咁941 應該可以值4-5厘, 我估, 仲有至少10%升值空間

如果全部941 all in 215 同315, 6厘可以變8厘左右, 多2厘但少左升值的buff, 暫時未有好大誘因, 除非315 公告保底8.5厘以上, 或215 提升派息到8.5 厘以上

新紅基地產

好耐無睇地產王16, 因為本身16 就比其他三大溢價高, 所以我咁多年都無買過, 反而17, 1113, 恒雞都在不同時段持有過, 而家四隻都無

原來已經跌到66 蚊, 老太都頂唔住, 真係唔知會唔會5字頭, 成日話財政穩健財政穩健, 1113 夠財政穩健, 未又係30 都無, 其實而家係成個行業問題, 理得你穩健定唔穩健, 賣樓利潤爆跌, 唔敢買地, 收租下行, 派息只會越黎越少, 唔係因為你穩健就得

如果我要穩健我不如買東方勞? 16億市值10億現金, 同樣係零售下行, 起碼每年賺1,2 億無問題

香港地產商我無意唱衰, 反而想佢地生性, 等我終極資金最後可以泊入, 始終本地股先係我最後歸縮, 但要先睇到曙光

我覺得曙光應該係啟德, 唔係因為啟德會爆賺, 係因為會爆蝕, 到時全滅完就會浴火重生

泊胃深推千幾兩千個單位首推得60 伙, 新世界係有幾無信心, 仲要租租保証, 香港樓淪落到炒大陸橋, 真係可悲, 仲有啟德海灣, 又係一個字慘

點估到啟德係pre-明日大嶼, 都唔洗大嶼哥出手, 幾萬伙已經夠殺

樓市救世主係啟德, 而啟德唯一的救世主就係長實, 應該8.9 月會推, 成本六七千呎, 到時推良心價一萬~萬二蚊一呎, 浴火重生, 重啟世界新秩序, 希望長實唔好令我失望

國企收息股

四大國有銀行已經升到7厘左右, 神華更升到得番5厘, 當年十幾厘人人當垃圾

762 更加係爆到得番4厘

我睇唔到有咩阻力會令941 5厘, 除左941 自己突然出現咩古怪野之外

永遠再見賤妹雞

今日沽清最後幾千股564賤妹雞, 呢隻股玩左好多年., 最早係10 蚊買, 一路買一路跌到五蚊, 然後最近升到14 蚊, 當中7蚊時佢理財爆雷我減左一大半, 但中央推設備換新我又加番, 來來回回, 13-14 蚊減左八成, 本來諗住零成本收息

其實佢煤機+汽車係幾好, 幾有幻想空間, 收入增長又好, 但有幾個位真係令我無法重注

1. 理財成七十幾億, 最新爆左3 億, 唔知仲有幾多億要爆, 管理層都無講

2. 嚴格佢唔係央企, 大股東出千唔洗本

3. 高管逢高減持, 唔係一個, 係集體

其實質地唔差, 我覺得小注收下息OK, 但咁費心的, 算了, 換入315

2019 - 07 持倉

無意中睇番2019 年中的持倉, 渣到而家似乎一隻NVDA 都救唔到全家.....

漢國置業減派息的啟示

漢國置業 160, PB 低到暈, 股息長年派0.125, 萬年不變, 好易令人有錯覺派息係萬年不變, 去到8厘9厘就開始收集, 保底8厘等私有化, 等業績翻轉, 前提係以為保底8厘 -->我以前都係咁

其實一切都係火雞效應, 我建議各位收息撚都去學下火雞效應, 就係喂左你99日你以為會喂第100 日然後迎來的係屠夫

其實唔止160, 港股有超級多蚊股都係咁. 無流動性, 低估值, 恒久派息, 好易引人入局. 平時派個五六厘, 終於等到股價跌到8厘, 一入局就派息反轉, 到時你想走? 留下賣路錢吧

好似我舊愛173, 當年001, 16 永升無跌派息, 而家的41, 83, 10 OR 101, 派唔派到? 點派? 去到某個位, 保持派息定係破產, 大股東都應該唔洗諗點揀

由始至終, 派息的確定性排位應該如下:

第一名係REITS, 賺幾多派幾多, 係寫入上市條款的, 但賺到幾多你自行評估

第二名係派息政策寫明, 941 派75%, 883 40% OR 保底0.7, 215 講明派0.0725 等, 所以呢類我最鐘意, 佔我倉七成, 但一樣可以話改就改, 出多張公告就得, 派息政策係無法律效力的, 所以買呢種股要加一條件, 就係淨現金, 詳見經典案例270 同神威大補丸

第三名先係萬年派同一個數的, 都係靠估大股東人品, 遇到160 呢D 垃圾, 真係收十年息唔夠輸

所以收息, 大倉位真係要放係穩派的股, REITS 本質係首選, 只係行業下滑無得搞, 唯有搞第二類

什麼是道?

最新問一個道長, 什麼是道, 佢答: 言語道斷, 一說即錯, 睇黎道長都有睇電視

什麼是道, 20 歲想唔明白, 30 歲想唔明白, 就黎40, 開始有少少明白

發現原來道, 跟本無法由另一個人透過言語去解釋你聽

道可道, 非常道, 跟本不能言傳

投資之道也一樣, 每人走自已的路, 實踐自已的道

大道至簡, 洗盡繁華後, 最後重劍無鋒大巧不工, 又係回歸複息的威力

找一個穩定產生現金流5-10-20-30年的行業同公司, 然後要做的野就係買入複投買入複投

只係而家世界變得太快, 行業同公司的生命週期越黎越短

成功的投資多數係苦悶, 如果你覺得投資好好玩好刺激, 咁你應該係度玩緊

8成倉投資, 2 成倉彈出彈入止下心癮, 應該係最好的方法

941 883 中海化學今星期的息到手, 應該又係買苦悶垃圾215 同315, 目標每隻一成倉

香港電訊商: 我最後的龜縮

一路都好鐘意香港電訊商, 各有優劣, 但強勁的現金流加派息加賺港紙, 我希望最後當941 100以上我可以換入不同的香港電訊商, 最後達成每年收100 萬息的願望

和記: 我的最愛, 36億現金無敵債券, 而家7.7厘, 長和同李家渣74%, 如果升到9厘我願意放棄所有其他股, 求其派個0.05特別息已經和味龍

數碼通: 第二最愛, 10億現金, 而家8.8 厘, 絕對的攻守兼備第一股, 唯獨依然要睇業績做人, 新紅基渣74%

8 仔: 第三最愛, 無限負債, 9.8厘, 聯通渣2成, 小超3 成, 固網玩家之一, 無限幻想, 最近傳賣光纖, 又咁岩出左個大灣區數據交換指引, 你細品

6823: 第四最愛, 8.7厘, 唔夠數碼通好, 係咁比佢老豆賣豬仔, 但貴為SS, 應該唔死得, 不及佢老豆

1310: 第五最愛,  負債仲衰過8仔, 派息"懷疑"有10 厘, 係咁傳私有化, 最好笑係每次傳都唔同人, 即係一條女係咁傳結婚, 但次次對像都唔同, 但原來固網都佔全港 3成, 又係無限幻想的一隻奇股, 值得細品

再加一個細品位, 上面咁多隻, 只有8仔係港股通, 然後兩隻流動商淨現金, 兩間固網負債到暈, 有趣有趣

啟德: 奇妙的存在

啟德真係一個奇妙的存在, 公營私營豪宅經濟房屋全部困係同一個地方, 成兩三萬伙人塞係個島仔度, 到時都唔知點出入?

而家供應商仲係度慢慢推盤, 等長實呢個深水炸彈出年推啟德時, 可能血流成河....

長實首進駐啟德 102.8億奪臨海地

樓面呎價15861元 建高質豪宅

2021-02-18

長實87億再奪啟德住宅地　每呎地價僅6138元　低市場下限23%

2022-12-21 18:28

長實（1113）早前推售與港鐵（0066）合作的黃竹坑站港島南岸Blue Coast，極速套現逾百億元後，同系啟德跑道區全新項目隨即於4月就第一期申請預售樓花，涉307伙，預計2027年2月落成，樓花期約34個月。資料顯示，4月共有5個私宅項目入紙申請預售共涉2643伙，是3月錄3208伙私宅申請預售後，一年來次高。

原文網址

圖片來源 HK01

由嘉華國際(173)、會德豐地產及中國海外(688)合作發展的「啟德海灣」第1期今日(5日)突擊上載第3號價單共108伙，項目迄今累沽86伙，套現逾8.4億元, 「啟德海灣」分兩期發展，第1期提供1,017伙，由3座相連的住宅大樓組成，當中主打兩房，佔約55%，實用面積由約420方呎起；一房則涉約38%，實用面積由約280方呎起；三房及特色單位則佔約7%，實用面積由約580方呎起。

來源: AM730

長實和長和

長和001, 由分拆前的百幾蚊, 跌到而家38 蚊, 加埋長實30蚊, 都只係68 蚊

長和同長實, PB 真係好平, 特別係長和, 一間非房地產公司, PB 竟然可以做到0.27

長和同長實真係好健康, 肯定唔會爆煲, 應該算係民企中最穩陣的存在

但長和同長實, 有一個對小股東最致命的因素, 就係大股東持股量實在太低

長和都唔洗講, 大小李半放棄, 回購都廢事做, 分拆時到而家都係維持係三成

長實搞左咁多大龍鳳, 原來都只係提升左一成七, 由三成到四成七, 由2015 年6 月到今日2024年6月, 歷時9 年

李家幾時先會同小股東利益一致? 我諗起碼到六成以上吧, 如果唔係佢地真係無乜誘因派高息益街外人, 其實我唔否認佢減派息拎錢回購係更有利股東, 但世道只有派息係硬道理, 你一時派高一時派低, 一時喪回購一時又唔回, 跟本無路捉, 小股東點同你玩

長實1200 市值, 肯定係平, 每年固定公用收益都七八十億, 垃圾酒館廿幾三十億, 應該見底, 即唔計賣樓租樓, 每年100 億保底, 劈價賣下樓收下租點都有五十億一年, PE 7-8

但大股東同小股東唔同一陣線, 平可以更平, 或者去番以前咁派個3 厘意思意思, 你吹咩?

睇到長和股東大會成班白髮老人,都登佢地可憐, 諗住信誠哥無奔波, 點知跌足九年, 派息又唔穩定, 每次出業績都心驚膽戰, 命都短幾年

941 突破77

941 突破77了, 雖然唔知收市企唔企到, 但除淨前都唔逃權真係少有

APPLE 想夾中移動入中國市場, 如果係真, 真係打開左另一個世界大門

三大電訊商係中國最正宗的國企科技股, 萬物離不開用戶, 如果之後每個外國公司想入中國都要經三大電訊...諗下都禾味龍....

552 唔知做乜咁勁殺上4蚊, 走寶了

1270 終止私有化

1270原本係0.55左右, 私有化消息後升到0.9, 然後玩左兩個月又唔私有化

之前已提過, 1270 係41 大減浮動租金後, 每年利潤保守估計無一億左右, 呢個對佢的60 億債黎講係好重要, 唔明白點解41 係呢個時候咁做, 重點係, 減完後就私有化 (我原本有20 萬股 1270, 佢減浮動後我就賣了, 然後私有化.....) 

原本我以為佢係減浮動做低個價黎私有化, 仲夾平賣左朗賢峰套左幾十億, 大把子彈食埋2778

點知而家又唔玩了, 大概係完全放棄1270了, 由得佢自生自滅, 最多破產清算

但成件事的吊詭在於, 點解突然唔玩, 係1270 升得太高? 出價好難搞? 定傾唔掂數? 

1270 之前市值先廿億, 41 同老羅拎住74%, 當你升到30 億, 溢價拎10億就私有化到, 我唔覺得價錢問題, 可能又係哥D 家族內戰哥D, 老羅太叫佢收手

但呢獲吃相真係難睇, 估唔到老牌香港本地公司, 都咁難睇

941 終於突破75

睇住佢突左好多次, 又比人75沽番落黎, 最後一支小陽突破, 哥種感覺好似睇波咁

雖然唔知收市會唔會跌番, 但我都無咩所謂

記住哥句, 下年最少派5 蚊, 之後5.3, 5.4, 5.5, 5.6.....你會出幾錢買中移動?

樓這種東西

最近股市大升, 已打消換樓念頭, 哈, 加上計過數, 將來做雙租族, 我收7厘條數已夠我最盡租3萬5的樓, 基本上澳門咩毫宅只要唔係超大戶型我都租得起

其實以前一路置業的想法, 係由細到大被灌輸的, 而樓市又真係我懂事開始就狂升, 所以一直都有向上換的想法

但而家想法唔同了, 主要係因為收息流已開始上軌道, 基本上花3-500萬去換樓, 今天同等收息可以收20-40萬, 每月的現金流真係美滋滋

但呢個係不能強求的, 如果而家係恒指25000 或30000點, 而我又有舊錢, 可能真係換樓好過, 因為搵唔到穩收7,8厘的股, 咁又雞肋

講真都主要係有和記同941 在手, 而股價仲係叫低位, 我先會用錢收息, 如果941 100蚊, 或者和記1.5, 又或者定期去番2厘, 咁你拎住5球cash, 真係唔知點搞

講咁多, 想講現金的用法唔應該一成不變, 樓抵時換樓, 股抵時買股, 這不是最正常不過的事?

又咁講, 其實恒指25000以上, 都係2020 的事, 唔係好遙遠, 但恒指低位感覺真係好似過左一萬年咁

btw 如果呢一刻有人高位接埋我自住樓, 我都OK 的, 但成日諗兩個問題, 

1. 樓的剛需係一個人咩情況下比較重要? 我暫時諗到老左之後無人租樓比你, 呢個case 似乎無解? 或者申請老人院? 

2. 樓的壽命到底有幾長? 70年? 結構性問題仲可以翻新? 曾經問過一個工程朋友, 話而家水泥或鋼筋都係有壽命, 100年? 咁一間屋的價值, 係咪係個人資產盤數上都要折舊?

咁岩見到另一Blog 提到的樓市觀點, 深感認同, 分享一下

歡迎討論

恒指應該要調一調整

突然諗起周處除三害的名言.....

"大家好~時間差不多囉~"

基建三傻

中特估而家升左一浸, 相對落後板塊應該就係基建三傻

第一日中特爆升哥陣入左少量三傻, 而家都升左十幾%, 原因有幾個

1. 極殘PE

2. 博提高分紅, 當中交建同鐵建23 年已大幅提升派息比率, 如果呢個只係開始?

3. 應收帳問題: 呢個無所謂啦, 應唔應收對呢D 國企都唔會好大影響

老火雞又出場

老火雞名言又可以出場了:  先生, 這是牛市呀!!

無錯, 牛市留係市場的時間同資金量, 遠比你選股重要, 就算你選唔中最猛哥幾隻 (例如我隻廢廢941), 只要倉位夠重, 時間夠長, 都一樣禾味龍

而家要做的, 係守住倉位, 唔好輕易賣出, 唔好追高

倉位一直維持99%, 就算部份倉唔給力, 牛市點都郁1, 2個% 掛

香港電訊三傻

最緊都係度買緊香港電訊三傻, 其實應該係四傻, 不過8仔同6823 一棵樹, 所以當一傻

215 - 派息最具確定性, 現價7厘, 除淨後7.7厘, 35 億現金, 我稱之為市場上最債券的存在, 仲可博業績反轉同私有化, 我買得最多, 原本想係1.01 左右繼續大吸, 好似無機會了

315 - 派息比215 好, 淨現金10 億, 現價8.8厘, 但搞左D 古怪內房減值, 派息無215 穩

6823 / 8 - 派息最進取, 最高息, 除淨後9厘, 但同時負債爆燈, 不過市佔最大

如果941 去到80以上, 我應該會慢慢換多D 去香港本地電訊三傻, 始終唔洗扣10%, 收港紙, 無ZZ任務, 港銀, 港訊都不錯

老問題: 自住樓到底是不是消費品?

自住樓係唔係消費品, 呢個問題大家真係要搞清楚

過去廿年樓市狂升, 有買貴無買錯, 好多人覺得供得起唔會有問題, 因為幾時賣番出去都有錢賺

但我仍然堅持, 自住樓肯定係消費品, 你享受左間屋, 佢升唔升值呢個唔影響自住樓係消費

錯覺自住樓係投資, 全因樓市升足廿年的畸形市

唔係淨係我講的, 滄爺都係咁講

我由買第一間屋已經無諗過將來賣出去有錢賺, 而家諗換樓, 更加相信自住樓係消費品

首先我為左提升生活品質而換樓, 呢個肯定係消費行為

然後自住樓帶黎的生活質素影響係遠大於佢升唔升值的影響, 你唔會因為樓跌唔換樓

我再計左一條數, 呢個係針對我自己

假設我換樓的成本大係三百萬現金, 然後每月供多一萬, 咁樣的情況下我究竟用左咩黎交換?

300萬我用我最鐘意的定息和仔215 7厘計算(其實除淨後係7.8厘), 一年可以收到21萬, 每月約1.4 萬, 加上供多一萬, 即我用每月2.4萬的現金流去換

同期講緊係銀行按息2.9厘的情況, 如果加息更嚴重

即係我為左住好D, 要洗300 萬加月供多一萬黎換, 然後呢堆野正常情況每月可為我帶黎2.4萬

咁都唔係消費? 

最後睇番當年財叔講的, 租租日日輸, 無意鞭C, 因為當年的確係岩的

但如果大家覺得利率反轉唔係三五年可以改變到, 咁大家都要諗下對"買樓"呢個行為帶黎的質的改變, 又或者買樓係咪人生必做的事

ref

https://topick.hket.com/article/1403748/%E8%87%AA%E4%BD%8F%E5%AE%9C%E8%B2%B7%E6%A8%93%E3%80%80%E7%99%BE%E8%90%ACBlogger%E8%B2%A1%E5%8F%94%EF%BC%9A%E5%8F%AA%E7%A7%9F%E4%B8%8D%E8%B2%B78%E6%88%90%E8%BC%B8

他的收益不是你的

好多人身邊有好多人, 收益超勁, 一年幾倍又有, 五年十倍又有, 又或者你曾經跟對方買過, 但賺少少賣左, 睇住佢爆升

我只係想講, 投資真係唔好睇別人, 亦唔需要講大升跑輸大市哥D, 有人講如果跑唔贏大市, ,或者跑唔贏通漲就應該做定期, 我唔係好認同

如果一個人投資, 每年可以保持唔輸錢, 就算一時賺10%, 一時賺0.1%, 我覺得都要繼續玩, 投資訓練的唔止係心態, 你永遠都要留係市場上, 咁樣你遲早有一日會發現屬於你的機會

能夠永遠唔輸錢咁站係市場入面, 呢個人絕對唔簡單, 就算過去十年收益跑唔贏通漲, 都唔緊要

起碼你參與其中, 你退左休, 你都會練就一身投資sense, 唔係贏錢的sense, 係唔輸錢的sense, 保命流都一樣係一種成就, 起碼唔會老左中電騙, 因為已見盡市場的老千, 明白到賺錢係幾咁難, 唔會迷住一夜爆富的機會

投資和人生也是大道至簡

 再次重溫Jack 哥關於投資和幸福感的文章

https://jackliinvestment.blogspot.com/2019/06/blog-post_18.html

專注於擅長的事未必能賺到最多錢，可是一定能獲得最大的幸福感。這一點完全適用於一切投資行為。有一點點不同的是，在投資行為上如果專注於擅長的事，不僅能輕易獲得幸福感，還能輕易獲得豐厚的回報。

所以，當大多數人思考如何讓回報最大化時，你不妨多想想如何獲得幸福感。如果投資有捷徑，這肯定是其中一條。

以下係chatGPT 對投資, 人生及幸福感的回答, 有時真係覺得連機器都明的道理我地竟然都做唔到, 或者就係因為我地不是機器, 內心蒙塵了

=====================================================================

投資大道至簡是一個深刻且普遍的概念，它涉及到簡單、基本的原則和方法。讓我們探討一下這個主題以及它與人生哲學和幸福感之間的關聯。

1. 投資大道至簡：

   • 這個概念強調在投資中遵循簡單、基本的原則，而不是被複雜的技術、市場噪音或短期波動所困擾。
   • 持續買進是一個例子，它建議長期持續地購買投資，無論是在牛市還是熊市，以穩定地累積財富。

2. 人生哲學：

   • 人生的意義和目的是一個個人化的問題。有些人認為人生的意義在於創造回憶，而有些人則認為它在於追求幸福、成就或與他人建立深厚的關係。
   • 投資大道至簡的理念也可以應用到人生哲學中。簡單、基本的價值觀和信仰可能是指導我們生活的最有效方法。

3. 幸福感：

   • 幸福感與人生的意義和投資大道至簡之間存在著關聯。
   • 簡單的生活方式、專注於重要的事物、建立深厚的人際關係，以及追求內心平靜，都與幸福感有關。
   • 在投資中，選擇簡單、長期的策略，避免過度關注短期波動，也有助於減少焦慮，提高幸福感。

以戰止戰, 以息止息

老美又吹風唔加息不特止仲話要加, 其實睇清楚就知老美減息機會真係唔多, 通漲唔落, 大宗爆升, 有色爆升, 老美經濟數字靚, AI 革命,  其他國家一褲都係, 你話我知有咩理由要老美減息? 

最後發現國企加派息, 會唔會係想用股息分紅對抗老美高息? 哈哈, 純熟幻想

大家都係度吸金, 中國整靚番個股市, 吸番D 資金入黎, 點都好過累鬥累一潭死水係度煲

國九條唔止分紅, 整頓風氣都好明顯, 如果真係執行, A 股真係腥風血雨, 但益了我地班價撚頭

國9 條

國家又出個國9 條 (唔知點解諗起Loogn9), 由上年開始已經狂出開口牌, 叫國企加大分紅, 提你買高息股提到你悶, 雖然有少量衰仔減派 (270), 但大路野跟本唔洗博, 一定要跟中央, 今日到拉基建, 平均PE 2-3, 求其派息比率3成已經9厘十厘, 都唔洗講電訊三傻, 煤油哥D 大路野, 總之現金多到爆的要分, PE 低得過份的, 都遲早要係咁意提升下派息比率

做人真係切忌逆天而行, 好似某D 人成日叫你造空美股哥D

適應高利率時代

老美減息的誘因越黎少, 至少老美經濟已証明減唔減息對佢影響不大, 就算減可能每年減0.5? 然後維持3-4厘

上年仲好多人YY (包括我) 今年起碼減兩次啦, 起碼減一厘啦, 而家似乎機會越來越細

點解?

假設以前老美唔知加完息原來自己身體都無問題, 但某D 強大國家就一褲都係, 咁佢仲會唔會大力減?

以前成日話老美無條件加息, 而家先發現邊個先無條件

而家好多股都未反映呢個問題, 仲有一個仲嚴重的問題, 如果老美長期KEEP 住高利率, 咁中國都無乜條件長期維持低利率, 如果中國加息, 好多股真係6666667777777

大家要適應下, 可能未來十年都係3-4厘, 要部署下資產大執位

別要賭~~天命最高~~

老散寶物, 和電

和電不知不覺又去到1.02, 真係老散寶物, 我真係希望佢除淨前跌穿1 蚊, 到時我會轉三分一941 過去

其實我已經捕左好耐, 由佢比踢出港股通開始捕, 開心到我乜咁以為會有基金被動沽貨, 點知運吉

和電就咁睇真係無咩好, 七厘幾, 但放眼全個港股, 可以成為一隻比債券更債券的股, 真係只有215

首先佢係電訊, 天生現金流強, 行業良好, 其次係純港業務, 無出千風險, 派息保底, 拎住七厘幾可賭特別息同將來賺錢加派, 世上難求

如果唔睇成長性, 215 比941 更適合老人家同小朋友, 係男女強身的妙品

買215 雖然犠牲左刺激, 但換黎你唔洗擔驚受怕爆雷風險, 穩收七厘幾八厘

另外215 已派左幾年息, 現金都KEEP 住37 億, 即係215 跟本係度用折舊黎扮蝕錢

其實諗下都知, 315 同HKSS 都有錢賺, 215 仲要蝕, 有無可能? 漫遊已爆升, 215 擺明係度做數, 我毛估等到美國減息, 佢手上舊錢無用, 就會拎出黎派

呢個世界, 仲有第二隻股做到215 咁樣咩?  我真係搵唔到

業績期2024

手上的股業績出得七七八八了, 其實今波業績的主題真係超級簡單, 應該係我炒過股以黎最簡單

總體就係分兩類, 淨現金低負債, 或者係高應收高負債

爆雷代表

270, 371, 257 (少雷), 遠航(淨現金但唔派息, 頂). 北京控股, 內險, 某公路

嬌妻代表:

三大電訊, 三大油, 海運外運, 易大宗, 信邦, 練化, 中海化學, 統一

真係唔好博咩困境反轉呀, 應收帳解決呀, 分紅可能提高呀, 大股東轉死性呀, 雷率達99.9%

最唔甘心係遠航, 頂派左20 厘又唔派, 最後跌20%沽走, 賺變輸

未來真係都係淨現金高分紅為主啦, 唔好亂黎, 世界經濟無想像中咁好, 股市無想像中咁易, 今年三個月已叫左牛市四次, 熊市五次, 保守永遠無錯, 有D 錢你係賺唔到的, 你點都唔會賺到, 人地賺幾倍, 你賺三成, 已經好開心, 保住條命, 機會永遠都有, 

again, 如果90%賺3成,  同30 % 賺一倍, 你會重倉邊個?

1883 又一利空

澳門最近通過左一個法案, 就係數據中心的營運唔洗同固網牌綁死

即係如果你有錢, 以後咩人都可以租個地搞數據中心向政府拎牌

所以CTM 的數據中心大餅極有可能被分走

加上9月1固網牌 9  成會有新公司加入

現價未必係一個好價錢

長實現價抵唔抵

之前做過一個預測, 1113 每年200 億利潤應該KEEP 到, 睇黎真係太樂觀

今年有波仔道20 億加持下都係賺百七億, 主要因為賣樓急跌, 以後賣樓每年可否KEEP 到? 真係一個謎, 取決於1113 推盤速度, 同埋樓市, 我個人保守估每年50-70 億已經好好

另外酒館真係廢廢廢廢廢廢廢廢廢, 買哥陣印象每年賺20 億, 而家疫情過左去2 年都仲係10 億左右, 呢件野真係鉅頭失敗之作

其他都係穩定收入, 租金, 酒店, 基建, 加埋150億左右, 另外原來利息都比左四十億? 邊個話長實係淨現金公司? 睇真D 淨負債百幾億, 咁睇唔覺有幾值

未來1113 長年應該維持150 -170億利潤左右, 其實佢今年派息比率升到42%, 都有交袋, 咁未來有無機會去番200 億? 如果得, 咁派4成都有七厘幾八厘, 但係呢個同長和能否KEEP 到300 億一樣, 係一個謎, 就咁睇就唔樂觀, 長實英式酒吧同長和電訊一膠樣, 都係外人無法睇得明, 但又佔公司好重要的一個業務, 都係等佢跌穿30 再睇吧

結論, 市場無死錯人, 1113 跌唔係單純因為減派息, 賣樓同土儲都係一個變數

超人, 一代英名....敵不過時代

以後不賭了

4.3 買入廢水270 3 萬股賭一賭, 還是沒有奇跡

其實一早已知270 是廢水之王, 但還是想賭

願賭服輸, 3.8 沽了, 虧了大兩萬, 唉

人就係咁犯賤, 明知家有嬌妻 (941), 還是想出去玩下, 最後滿身傷痕找嬌妻安慰

賭垃圾股和去賭波賭馬一樣, 都是看運氣, 不賭了, 不賭了, 哭泣

-----------------------------------

下午到371 毒打, 1.83 沽清最後5萬股了~

長和落日紅

長和, 長實都公佈左業績, 業績本身已經好肉酸, 但管理層的作風更肉酸

長和唔洗講, 假穩定真下沉, 碼頭, 零售, 電訊, 全部下坡中, 特別電訊, 搞左一場超級大龍鳳, 合合分分, 又商譽又搞假利潤又減值, 係度玩會計操作, 真係反胃

長實仲心寒, 之前為左通過大股東增持交易, 提高派息, 而家過橋抽板, 業績同派息雙殺

長實中環中心靚deal 的確為人津津樂道, 但之後英國酒館, 香港地皮, 波仔道幾單野, 基本已優勢盡失

來來回回, 長實又係變番買買賣賣公司, 定位好模糊, 都唔知呢間公司想點

正常你發展核心業務, 應該會派息穩定, 點知你又唔係, 咁我買你做咩呢? 貪你poker face 嗎? 佢永遠 好似對住你笑, 但哥種笑係令人心寒的笑

真係心都寒9 埋, 長和系可以買的, 只有一間, 就係和電, 其他在座各位都係垃圾(大師兄mode)

長和系真係我股海入門的第一隻愛股, 鉅頭我原本亦以為佢只係算死草, 算係富二代中守業能力強的人, 但似乎而家守業都唔太掂, 幾獲睇錯方向要小股東攬炒

反而小小超值得睇高一格

中信1883

1883 下半年好差, 原本半年報業績出奇地好, 我都覺奇怪, 1883 咁多年不嬲無功無過, 中報爆升, 事出必有妖, 當時3 蚊樓上追入諗住年報有驚喜, 以為有新業務有第二曲線, 點知只有驚沒有喜

成盤數上半年勁賺下半年勁差, 加上辛悅江老爺爺退位, 真係令人有財務洗澡的想法

下半年出事係國際電信業務, 奇就奇在上半年又係呢個業務勁賺, 難度係有條數入落上半年, 下半年開始出問題?

成段最詭異係呢句, 咩叫部分客戶做了相應調整? 唔清唔楚, 調到你下半年腰斬?

我毛估係有部份客因為某D 不可描述的原因要即刻轉走唔用1883, 可能賠一舊錢? 或者唔知咩原因係上半年入左數, 下半年開始反映, 加埋上面呢句, 總之即係有大客唔用你

咁之後個大客會唔會又突然用番? 又或者搵到其他大客? 我覺得好忟水, 而且最驚陸續有黎

加上9月到期後的問題, 難呀~難呀~

估唔到最快出事唔係澳門, 係香港業務

混混流

之前分享過混沌分紅流, 今日諗到改善方法, 就係用分紅係十幾隻目標股中, 分別買入半注, 然後放埋一邊, 等佢走出自己走勢後再加注, 如果等一段時間無反應或下跌就放棄

呢個方法不錯, 有幾隻暫時走得好好

統一

鄭妹

270

威勝

秦港

遠航

聯想

衰左的:

譚仔

上實807

利亞

京潔

不過有幾隻因為升太急減左, 然後又加番, 來來回回做得唔係太理想, 証明倉位控制超過左心理的臨界點, 心中無股應該係混沌流的入門心法

鷹君業績

鷹君(00041.HK)  公布2023年止年度業績，收益106.44億元，按年增加19.8%。錄得純利7.64億元，相較上年度虧損1.81億元，虧轉盈；每股盈利1.02元。末期息維持派50仙。連中期息全年共派87仙。

鷹君(00041.HK)全年核心溢利18.58億元增32.5% 每股核心溢利2.49元, 末期息派50仙

睇鷹君睇核心溢利會清楚好多, 因為真正影響現金流的係核心溢利, 全年18.58億, 稍低於我預期, 我原本預計有20億以上, 主要係2778 派少左

債務一樣, 三百幾億好似好誇張, 真係屬於鷹君的只有百幾億, 其他係2778 120億同1270 40 億, 其實鷹君賣鬼左何文田就回到百幾億, 完全無問題, 而家市況應該仲可以賺到廿幾三十億, 按萬八一呎成本, 如果賣到二萬五一呎以上分分鐘賺到40 億, 已經係市值一半, , 希望快D 推啦唔好吱牙膏

另外鷹君原來渣住LUCID美股, 最高峰值幾十億, 而家得番四億, 唉好心佢當年就賣左佢啦... 

酒店業務全面爆發., EBITDA年超10 億., 歷史新高, 真係禾味龍

未來還是睇2778 同何文田個盤, 寫字樓低迷會否持續三到五年? 呢個無人答到, 睇你信唔信香港, 賭下地運, 不過2778 有3億管理費係硬比41, 今年全年收2778 7 億股息, 其實對41 影響有限, 真正擔心的係要41 救2778, 私有化或買物業或借錢比2778?  41 唔會睇住2778 死

又感嘆, 當年2778 賣到花園道, 你話幾好? 可惜

回億番鷹君, 係買左朗濤之後就無投地, 過去十年都係以發展酒店為主, 主打海外, 呢條路而家睇係正確到爆咋, 同誠哥有得比的, 只係無係高價賣走D 物業, 不過識得打包2778 同1270 上市都抵讚, 但打包左又拎住6成, 會唔會太多呀, 學到誠哥一半, 學唔足, 不過無人估到香港寫字樓會衰到貼地, 呢度又要讚下誠哥, 真係超人

結論, 橫觀所有地產股業績, 鷹君肯定吊打其他, 維持派息只要六億幾, 跟本唔洗靠兩個衰仔, 不過其實我覺得鷹君唔算地產股....

BTW 市場機會開始多了, 我亦不會太重注41, 而家持有6%倉位左右, 唔會加唔會減了

開始聞到少少牛味......

創仔, welcome

倉底仲有萬幾股659, 本來都懶得搞, 點知佢黎個派2 蚊, 真係O 咀

新人明明上場, 似乎一改剛仔作風, 撥亂反正, 一黎就用熊貓債代替永續債, 呢個真係抵讚

當今世道個個都用永續債去cover 個巴能sheet, 明仔一黎就撥亂反正, 仲慳到接近2厘, 真係唔錯

本黎我以為成仔會改埋漸進派息, 但中報都繼續, 睇個勢正氣過剛仔好多, 剛仔都係番去拍抖陰啦, 唔好搞事啦...

大家原本好驚6月周大福會沽爆659維持上市地位, 又或者配股, 點知佢反手派勁息黎吸引老散入場, 其實真係算佛心, 你話佢幫周大福補血又好, 人地實的的真金白銀派的, 唔似807 哥D 垃圾之流, 呢個真係抵讚

業績就一般啦, 以前唔鐘意佢D 公路, 而家又變香呠呠, 公路+保險應該有運行, 其他應該無乜增長

最後我覺得659 已經併左入周大福, 鄭家唔會搞死佢, 唔似17 哥D 原地爆炸都無所謂, 正如2778 於羅家一樣, 死左會燒身, 所以659 又似乎可以了, 如果唔高開太多可以加倉, 但應該無乜機會了

增持賤煤雞

再減和仔,  增持1萬股賤煤雞, 3萬股8仔, 1萬股香港電訊

國產真AI 股

國產有無真AI 股? 我唔知, 但有一隻股可能或者maybe 應該有機會辣中

【信報財經新聞】內地媒體引述知情人士指，中國電信(00728)已在上海規劃建設可支持萬億參數大模型訓練的智算中集群心，其中，單池新建國產算力達1萬卡，是首個支持單池萬卡的國產超大規模算力液冷。

呢單野肯定唔會係首例, 如果三大電訊都搞算力中心, 全個港股只有一隻可以做佢地的下線

談談百年希腎

百年希腎減了派息, 其實業績唔算差, 不過言語間同2778 一樣透露出無盡的保守

有時真係唔明, 內地又係一窩蜂起商場起樓, 香港又係, 連四叔呢D 大孖沙都地王照買, 唔通香港真係多多都食得落?

四大家族唯有誠哥一早已經唔起商場商廈, 仲連中環中心都賣, 真係服X100

玩啦玩啦, 玩出禍而家, 齊齊起, 齊齊輸, 服左呢班富豪

呢度又諗起以前係某blog 留言講過, 自住樓唔好當投資物, 當消費品就無事, 哥陣比D 樓市好友blogger 插我, 話自住都一樣好有投資價值, 係呀係呀我知呀, 升哥陣呀嘛, 樓市有起伏, 只有當自住係消費物, 你會可以平常心, 我買自住樓都唔會time the market 啦, 計岩數未去囉

子生性病母感安慰(二) --冠君

冠君財務狀況比1270 好了不少, 需然百五億負債聽落好嚇人, 但假假地每年真金白銀派到10 億出街, 手上仲有9億, 2023 全年借錢成本4厘. 有29億今年年中要再借, 有機會借唔到咁平, 租金算係咁, 朗豪坊佔一半都頂得住, 花園道就呎租下跌至91, 出租82%, 如果肯減呎租到85, 出租應該上番90%, 打和

當租金頂得住, 利息上升至5厘. 即一年比多1.5億, 估計最壞情況可分派8億, 9成即係7.2億, 現價都有7厘, 只要租金唔再惡化, 都可以做到生性子

總結, 比1270 理想, 但1270 可以唔派你吹佢唔漲, 2778 就局派, 如果情況惡化, 1270 保命能力高過2778

又又又又牛市了?

2024先過左2個月, 已經過左幾個牛熊交替

保持初音, 累了, 追漲殺跌的江湖生活, 我已經不再羡慕

只想平平安安的, 每年收一百幾廿萬股息

PS. 賣出一半和記, 買入亞太胃升, 762, 合和公路, 光大水務, 粵海垃圾

新年去左食怂, 爆到七彩, 本來想買九毛九, 又爆升了, 唯有放棄

子生性病母感安慰(一) --朗廷

41 個細仔朗廷出左業績, 一如預料業績好好, 入住同房價已差不多番到2018, 但係有幾個因素令呢個仔做唔到生性子, 只做到生性X子

1. 利息支出2.5 億, 一年租金收入先5億幾

2. 可分派2.9 億, 靚到爆, 但係管理層語氣, 有排唔洗派, 直到美國減息, 而且好多朋友以為SS必派9成, 上兩年蝕錢就算, 今年2.9 億都可以唔派, 咁你不如玩晒?

3. 最最最令我心寒係, 竟然將浮動租金由70%下調到50%, 即係41 已唔想再同你包底

其實唔派息真係情理之中, 大股東供左股已經渣到7成幾, 無可能再供股, 意味住再奶多次只可以私有化救命, 咁的情況1270 首先肯定保命為主, 最緊要係唔好燒埋41, 因為英軍先係羅家的旗艦

但係呢個危急時期管理層竟然調低1270 的包底數目, 雖然有利41, 但係對1270 真係極大的利空, 原本浮租+固租已經只係岩岩好夠比息同成本, 有淨少少可以派下息, 2023 全年浮租3.5 億, 如果降到5成, 即係少1億, 點搞?

希腎第一滴血

希腎盈警減值28億, 虧9億, 變相賺17億? 又OKWO

但三年減左70 億, 似乎仲陸續有來, 雖然短時間唔影響現金流, 但CAP RATE 同銀行放水抵押都睇PB, 繼續減落去會有可能引發債務危機

咁睇我愛估鷹軍應該都難逃一劫, 仲要大大棟花園道同朗豪坊, 可能又減十億八億, 希望何文田快D 散貨回本, 二月底出個全面切辣配合下

講下美斯單野, 真係77777出國際, 人地違約你未走法律途徑囉, 嘈咩jack, 又要發文引用咩名句賣情懷, 而家燒埋政治, 世界金融中心? 國際城市? 柒左未退票自己食左佢再起訴佢叫對方回水囉, 搞乜啫你地班人, 原本道理係香港度, 而家咄咄逼人, 之後對方做任何措施都只會比人覺得係因為香港迫迫迫人地局住投降, 真係柒到核爆呀~~~

香港呢獲真係令人覺得, 手法同某地一膠樣, 距離世界大同又近了

真係忍唔住再講一次, 媽~好7呀~~

垃圾粵海

之前講過粵海6年東江水折現差不多是360 億, 打8折即係280億, 今日270 市值終於低過280億, 可以入第一注了

所有股票都有價, 唔會有絕對垃圾, 亦唔會有絕對好股, 搞清楚風險位係邊, 同時控制倉位就得了

偽水務之粵海

歸宿, 龜縮

一天KTV, 一天ICU

累了, 花太多精神係股市, 估唔到今年開局咁樣, 以為可以上番兩萬點換下樓

沽清267, 564, 太保, 東方神電, 所有火電

全入215 @1.04保命

以後215 將成為我最後的保命歸宿, 暫時未搵到一隻7厘以上比215更保命的保命baby

忽發奇想, 點解和電唔收購左HKBN? 成36 億現金, 岩晒, 哈

風險和不確定性

朗賢峯如果可以係新年前賣, 希望可以賣到2萬5一呎啦, 咁41 應該可以微利, 參考高銀當年講, 何文田每呎地價1.1 萬, 如果原地轉比41, 加埋建築每呎萬8, 但係聽香港的頂流朋友講何文田瑜一23年頭都係萬緊2.7萬一呎, 而家打個8折, 應該只買到2.3 萬左右, 都好呀...同期41跌左4成

鷹君肯定係不完美, 但起碼有一半現金流黎自世界各地酒店, 有D 似長實, 如果鐘意租租日日賺模式可以買信置同希慎, 但我唔like, 我就係貪佢又酒店又寫字樓又賣樓, 唔會孤注一擲香港或內地

痕隆出左業績, 不過不失. 但全倉內地, 高奢可以頂到, 但all in 大陸真係唔敢買, 8蚊考慮下, 但咁我不如買希慎? 一樣租租, 香港點都易睇過大陸

風險同不確定性的分別, 風險係可以識別同管理的, 不確定性係無得搞, 所以我地要迴避的係不確定性, 唔係風險, 因此買股要買識睇的, 就算佢係爛 (風險), 至少可以確定佢爛成點, 個值博位係邊, 止蝕位又要係邊, 唔會死螺

41 仲有一個賣點, 就係睇下1270 今年有無轉機, 又係垃圾中的戰鬥機, 最鐘意呢D

PS. 同期加影2878 雷, 已清, 

火電又雷, 今日清

270 雷, 無買, 4 蚊可以考慮, 東江水每年60 億現金流, 6 年= 360 億, 270 跌穿300 億應該可以

買大陸股就係咁, 你永遠唔知有邊D 雷等緊你, they are watching you...

賣飛也是成功的一部份

港股爆跌時拎左好多762 換其他殘股, 最後762 3 日升左20%

有無做錯? 我覺得無,炒股必需接受賣飛同割肉都係投資過程的一部份

係哥一刻兵凶戰危, 你做左你認為岩的決定, 不過之後事態發展不及預期, 你要做的係追回損失

762 我尋日一開市掛4.9, 之後5蚊, 全部都成交唔到, 一路無回頭就咁爆升, 我已經知衰

好彩最後番兜728, 頂得住下, 叫做補回少少

炒股千期唔好覺得後悔, 因為跟本無時間比你後悔, 在事情不明朗時減, 再明朗時加回, 係最明智的抉擇, 千期唔好有負擔, 例如蝕太多唔敢割, 升太多唔敢減, 賣走左繼續升唔敢買回之類

你或者覺得呢個係呀Q, 但你如果唔可以接受賣飛同割肉, 你好難係股海浮生落去

錯就認, 再錯再認, 再再錯再再認, 直到你___ ____為止

大特賣

再沽762, 552

補回564, 加注398

正呀........繼續挑戰1萬3000點

花園道三號

發現左一個花園道三號的隱藏玩法

1. 巨大的債務到期日

2. 41 持70% 接近供股上限

3. 股價已經到左歷史新低

4. 花園道三號同朗豪坊係41 的核心資產, 分拆都要渣七成

結論.......私有化?

同場加映1883 續9個月, 即話比人聽9個月之後係咁先

五年一覺美團夢

美團2019年上市, 69蚊, 最高升到400 蚊, 當時我一個80 蚊重倉的朋友仲請我地去食日本大餐慶祝, 今日2024, 股價去番68

歷史帶比我地的教訓, 就係人類永遠唔會係歷史吸取教訓

世上如果存在一隻長持的股, 咁一定唔會出現係港股或A 股, 因為唔止公司, 仲要國家環境市場民族各方面配合, 以前唔明呢個道理, 而家終於明

如果恒指升番3萬點, 我都唔會再長持任何一間公司, 因為呢個地方係唔會出現"偉大的企業"

當然你可以話美股人地NVDA MS FB 一堆靚公司呢兩年爆升, 唔通人地唔偉大?

我只可講, 投資係十年廿年三十年的事, 千其唔好有幸存者偏見, 找到自己的路最重要

可悲, 可悲, 今日恒指又挑戰萬四

慶幸自己由頭到尾都只係貪股息, 從無想過搭成長的順風車 (雖然當年玩TMT 都玩得幾開心)

反撲歸真, 行到最後, 能夠永遠陪係你身邊的, 只有你已經落袋的股息, 其他只係廢言

帶血籌碼

港股12個交易日已經跌左10%, 果然係世界奇觀, 今日又一堆血籌, 太可憐啦, 收少少啦, 控制血倉

沽762@4.9

入太保@13.96, 少量BABA@66.3, 少量希慎@13.56, 少量552@3.12, 少量386@3.82, 少量中煉化@3.89

沽賤煤機@9.4 

再入552, 2878, 1071, 慘仔

再談鷹君

唔知點解無乜人鐘意鷹君, 其實我以前從來都無留意鷹君, 因為一路20-30 蚊, 股息加特息先7厘, PE 又唔平, 資產只知有2778, 我以為1270 都唔係41 的, 因為羅家太亂, 一門幾系, 直到最近大劉講某隻6厘股將來可以十幾厘, 又有投地, 我就找呀找, 最後發覺鷹君好似岩, 但成交太低, 我估都未必係

之後又再睇, 呢隻野不知不覺跌到12, 市值已經同7成2778 一樣, 雖然2778 下坡走唔甩, 但買41 意味住2778 派幾多, 41 可以收7成, 就算41 完美左手交右手, 都可以派到同2778 一樣的股息率, 而且仲不斷以股代息同收2778 管理人費用, 抽爆2778 小股東水

然後再睇, 其實鷹君的地產發展只係賺錢買花戴, 賺幾多派幾多, 有趣

再睇另一主要收入酒店, 有2/3 係海外, 1/3 係香港同大陸, 已經足夠分散地域性風險

其實我一向好唔鐘意講地產PB PE, 因為跟本用無, 低估的未必套到現, 低PE 的下年又係要投地,  事後發現地產的生意模式天生係不可能有穩定現金流

但係鷹君主要靠酒店+收租, 雖然佔收入一半的2778 未來三年都獲氣濃烈, 但只要海外酒店cover 到個跌幅, 12 蚊市值90億的鷹君真係幾恐怖

另一個看點就係何文田要睇下套回幾多錢, 查左好耐, 當年係高銀接地好似每呎萬七, 建築每呎三千幾, 成本二萬, 都唔算平, 希望賣到二萬五, 咁樣套番黎的錢可以應付未來一年到期的二佰億債 (100 億41, 100億2778)

另外2778 未來100億到期, 會唔會又供股? 都係一個變數, 但我認為鷹君係最值博的本地物業股, 沒有之一

仲有一個點, 羅老太已經104 歲....

J門半導體

 0.3 的股價, 0.24 淨現金, 半年賺億幾野, 7億市值, 雖然話半導體驅動IC電子紙OLED我識條鐵, 但係, 會唔會太慘? 同慘仔一樣咁慘, 雖然質地唔算好, 2020 年之前蝕賤蝕到PK, 最近唔知點解業績波動, 炒番轉先啦, 控制倉位, 買廿幾萬股看下門口

入3983

沽2000 941, all in 3983

呢個係咩世界? 係高息股的世界

開始個個都問有咩高息股可以躺平收息, 聞所未聞, 百年一遇

而家仲有10厘的, 好快會變稀有品種

三大電信躺收7厘, 每年高單至雙位數利潤升幅, 講穩, 邊個夠佢地穩?

3983 80 億cash 係度涼冷氣, 年年利潤十億至少, 跟本大把錢

呢個係咩世界, 係大把世界

中國公用事業股

中國公用事業因為一堆問題呢兩年已經被打到地板價下的地板價, 放係任何一個市場基本都係無可能

水務, 環保, 電力, 因為應收帳一堆PE2-4, 股息9-10%, 好多人見到都搖搖頭

呢個情況已經持續左兩至三年, 或者係時候諗下應收帳係咪會永遠收唔番

呢堆應收帳唔係來自民企, 係來自地方同國家, 條數無可能會歸零, 企業亦無可能無限發債營運, 雖然利息平到嘔

當有一日應收帳問題被証明係可以解決的, 呢堆野都會馬上迎黎價值修復

事實上水務同火電已經開始緊, 北水, 光水, 華能, 華電, 最廢的大唐, 都已經係幾日升左十幾巴仙

又睇下地方財困會否倒迫國家解決應收帳問題?

BTW 呢幾日又用64的941 換番4.7的762, 睇下762 廢完未

盲猜CTM 結局

CTM 續約拖到今日咩消息到無, 真係前所未見

睇番CTM 續特許合同的history, 2011續五年, 2016自動再續五年, 2021 續兩年, 2023續??

其實政府基本已無可能再續得長, 固網都續9個月, 明顯係buy time 搞電信法

全個澳門都想政府收番CTM 的特許資產, 其實政府點都要比個交待市民, 再盲續肯定比人少落台, 我估呢個都係拖拉原因, 政府可能只想特許續三個月, 但CTM 唔肯

最大機會:

1. 照續9個月, 但講明9個月之後一定唔續

2. 照續, 但好似東江水咁比一筆特許經營費 --> 呢個最簡單, 我都唔明點解唔做

3. 唔續, 比一筆錢向政府租特許資產---> 其實同2 一樣, 但個名好聽好多, 資產比番政府, CTM 繼續獨霸天下, 只係比左一筆掩口費

CTM 佔澳門上網超過9成, 佢條出海電纜同總部大樓其實都係政府資產, 如果你話無影響咁我都無咩好講, CTM 不是不好, 只係特別處於一種不確定情況, 減持也合理

BTW 270 其實2030 東江水都會到期, 參考30年前比左二三百億, 今次續要幾多億? 計通漲都可能要四五百億...舊錢點黎?

----------------------------------------

沽清1883 @3.03 換入315

減1883

1883 3.2以上減了2/3

加HKBN, 中海化學, 鷹君, 762, 鄭煤機, 1171

澳門開放市場都係大趨勢, 續就應該會續, 都係吊鹽水多, 而且3.2 已經唔夠8厘, 多謝北水之前拉高