2016 回顧 (內含大量馬後炮)

好快又黎到2016 最後幾個交易日, 回望番2016 我先不問回報, 應該問我學到D 乜野?

年頭一開波萬八點, 個個都話買金, 咩唔買股票己經跑WIN 指數等, 我一開始都唔敢輕舉妄動, 到左2,3 月就膽粗粗買入REITS 同其他高息股, 去到年中己經獲利超過20%, 應該係我股場生涯最光輝的一頁, 亦開始左寫呢個BLOG 去紀錄下自己的心態和操作.

哥陣時我曾經覺得REITS 就係王道, 同自己講雪球理論只求年5%回報就得, 所以無理到個組合, 直到脫歐, 其實我的組合都係幾靚的, 仲用底價入左電能同會瘋, 可能之後敵不過自己而進進出出左會瘋幾次就無再買番, 當然事後係升到暈左, 怪我未有能力去賺佢一獲甘

之後就開始不斷操作錯誤, 係咁買入一D 不相干的股票, 來來回回, 幾千幾千咁蝕, 講到尾都係自己唔遵守自己的紀律, 同埋未搵到一種岩自己的方法去做, 到左而家我個組合己經無任何盈利, 計埋之前來來回回哥D 應該仲有D 蝕

其實我之前有一篇文講過昨日濠賭今日REITS, 當時我都有懷疑REITS 的強勢會唔會好似當年濠賭股咁? 哥陣我就係賺緊的情況下不斷溝, 溝到最後要斬手指, 如今同樣的事發生係REITS 度, 點解? 因為無論係當年濠賭定今日REITS, 我都相信佢地係唯一的, 係與眾不同的, 係有強大的理由去支持佢地的股價的, 加息的影響絕對不是今日先講的事, 係我低估左

咁黎到而家, REITS 己差不多跌番去我的入貨價, 我的心態是否同當年濠賭股一樣, 覺得佢仲會有強大的理由可以支持回升? 覺得佢愈跌應該愈買? 覺得佢係我退休的一個好選擇呢?

我應該係呢個時候放晒所有股票嗎? 定係我應該靜觀其變?

REITS 的下跌係唔係市場的錯價? 定我忽略左一D 其他人睇到但我睇唔到的野?

無左廿幾%的利潤的確係好可惜, 但係當我唔知自己D 錢係點賺番來的時候, 代價就好似而家咁, 唔知點解會無晒D 利潤...

看來我同一年前跟本一D 分別都無, 自認為睇左各大高手的心得, 我依然同當年盲目入市的我無分別

買入信德, 創科, 中海外

早幾日沽走左春泉同泓富後, 分別買入左信德, 創科同中海外

信德其實我2.6 同2.7 都有買過, 不過2.55 哥陣被人震走左一半, 早幾日見佢爆番上來就嬲嬲豬加注, 其實我每日都會行過佢個地盤, 我知佢棟樓一起好就可以賣到錢錢, 之前買左又震走又買左又被震走只怪我自己無料, 今次再買我唔會再咁脆弱!!!!

創科買入係因為特朗普效應, 如果佢真係搞基建加上美元叻叻人仔慘慘下, 呢隻野應該有得搞

中海外純粹因為之前24 買賣過今次無LALA 跌到22 買番一手珍藏

回顧下之前最傻仔的操作, 就係來回買賣左幾次信德同國壽, 高住加注左泓富同置富, 搞到回報由20% 急跌到而家<10%, 我個心真係好痛....

講到尾都係衰係兩樣野:
1.買賣無規律, 一有閒錢就想買, 明明講左年尾前唔會郁個組合結果郁到PK
2. 受唔住震倉, 買之前有一百個理由, 點知一震即走

我諗我要諗下定一個規則, 無論點都要定左先, 再去諗點完善佢, 唔係唔會進步, 賺左都係運氣

沽出春泉和泓富

今日一開市即刻沽出春泉同泓富.

原因係北京無啦啦加大左個房稅, 強美元同弱RMB 下春泉真係三路被人夾擊, 雖然有8厘但為免賺息蝕價都係套番D 錢出來好D

泓富因為大部份持有的都係乙級寫字樓, 如果樓市真係被衝擊的話只有優質物業先可以生存, 乙級的需求只會係D 租唔起甲級的公司, 即樓市大旺的情況下才會發生, 未來我估下行的機會應該會大於上升, 要防守的話都係置富OR 領展會較好

操作回顧之馬後炮:
最近美國大吹加息之下REITS 己經回吐差不多有10%, 我最愚蠢的操作就係分別係置富9.5 同泓富3.5 時加了倉, 因為之前賣左領展套左D 錢跟住手痕又忍唔住...結果再次被市場懲罰....

我最ONJ 之處係睇到自己手持太多REITS 同美國加息風險下沽左領展, 但過左一個月竟然係接近最高價買入置富同泓富, 有時我都唔知自己個腦係咪生係屎忽度...

Anyway 錯己鑄成, 唯有認衰仔同整合下D 資產再上路吧....

差一刹我信地老天荒

普普當選之後, 所有野好似180度轉變咁, 一個月前仲講緊金錢大貶值, asset is king, 唔知點解普普當選後, 突然大吹加息, 突然變左做資產大貶值, cash is king, 喂留意番, 佢只係當左選, 佢乜都未做, 市場己經吹到話全世界的錢會回流番美國, 全世界唔會再玩QE, 債券大貶值, 泡沫大爆破, 講到好似聽日就加十厘息咁.


我咁嬲嬲豬因為我的RETIS 組合己經慘不忍睹, 其實呢個就係考驗人性的時候, 每逢市場逆轉你就要作出決定 --- 跟定係唔跟, 要反其道而行定係順住大吹勢


如果我係無打倒昨日的我, 而我覺得市場係過份吹大左普普的副作用的話, 或者呢個就正正係我加注的時候......

等埋12 月份bonus 就買置富同領展~~

太古慘慘豬

"太古指, 國泰航空(00293)自中期報告發表後, 其航空公司業務前景轉弱, 可運載量過剩及競爭激烈尤其對其客運業務構成壓力(收益持續遜於預期, 收益率承受重大壓力), 而在此情況下, 國泰航空集團不再預計其2016年下半年的業績會較上半年為佳.

        另外, 旗下港機工程(00044)大部分個別業務的前景大致與預期相若, 預計港機(美洲)今年下半年的虧損將較上半年顯著為多, 反映部分座椅合約錄得虧損, 以及結束外勤服務業務所需的費用; 另外, 公司已就美國客艙及座椅業務的賬面值進行檢討, 經檢討後, 公司於今年的溢利預期會計入現時估計為2億8000萬港元的減值支出, 當中太古公司應佔的減值支出為2億1000萬元; 雖然太古海洋開發集團的業務前景大致與預期相若, 但已就其船隊的賬面值進行檢討, 船隊營運的離岸業前景對船隊價值具有重要影響, 相對早前預測, 太古海洋開發集團現時預料離岸業的復甦期較長及步伐較慢, 並反映於就船隊賬面值進行的檢討, 經檢討後, 公司於2016年的綜合溢利預期會計入現時估計為23億1000元的減值支出; 太古海洋開發集團已出售其附屬公司Altus Logistics預期就該項出售錄得1億1600萬元虧損.
        集團預計, 上述情況對今年股東應佔綜合基本溢利產生重大不利影響. 

太古呢獲真係慘慘豬了, 之前都講過佢基本上飯飯都死, 國泰同海洋應該係重災區, 最慘係睇唔到前面條路. 呢獲真係慘過當勞做總統....我好肯定佢今年派唔足5厘息, 而家14蚊, 我諗要12 蚊先可以考慮下...

又講番好多人鐘意講的"折讓"問題, 記得之前睇過林本X話呢D 綜合企業XXX己經值幾百億, 淨低的業務係送GE, 哥時都信信地, 但係睇多D 諗多D 就發覺呢個係歪理, 佢送的一定係好的嗎? 佢送的業務年年虧損你吹咩? 你有權清算佢咩? 你未又係眼白白睇住佢股價下插.....仲話咩博士, 妖..

正如好多資產折讓股, 點解佢會折讓? 係人都知佢折讓點解無人買? 市場個價格係人為去定的. 佢折讓幾多理論上同市場價格係一D 關係都無, 只係同有無人出多D 錢買佢隻股有關, 再者, 資產的淨值只會係佢賣出資產同賣盤清算先至會兌現, 前者係最理想可以100% 體現到價值的CASE, 而後者, 一來佢絕對可以一路虧損一路CAP 水唔清盤, 二來就算佢拎去拍賣, 佢破左產D 資產值番幾多錢都係一個問號, 千其唔到比佢"現在" 的估算呃到

尋日54蚊買番領展, 計番都有4厘息, 合格

另, 癲佬真係當選左, 未來幾年的生活一定不會悶了, 嘻

長實地產的FF

小弟之前都提過長地開始轉型唔想玩地產, 呢兩日亦傳出開始賣資產, 呢個係釋放價值的好表現, 誠誠由地產發跡呢個GAME 亦都玩左好多年, 佢應該比我地外行人更加sense 到地產界的異常, 所以我身家有一半都係同誠誠坐同一條船

突然間聽到長地開始賣野, 即係佢會有好多錢但係無資產, 同時又諗番之前長建想食電能不過比D 股東阻住晒...咁樣情況之下長建好等錢洗, 長地好多錢, 英國D 野好平, 結論....??

盲目追求財自的代價

曾經聽人講過一個笑話大概係:
如果一個家庭將仔女由細到大的學費存起, 等仔女到18歲再將D 錢交比佢地做生意/投資, 咁樣發達的機會應該會較大

故事大概係咁, 令我聯想起Starman 兄講過, 如果一個人一出世就有一億, 係咪就代表你成世人都唔洗讀書唔洗做野?

人的一生到底係追求D 咩, 呢個其實係一個好老土的課題, 但永遠都值得我地去搵呢個答案, 有D 人可能好早就有答案, 有D 人可能一世都無答案

之前都聽過話有人死慳死抵先苦後甜, 如果人生頭三四十年淨係草錢, 咁佢地係退休哥陣達到財自的機會一定好大, 但係咁樣的財自會唔會來得太遲呢

其實呢D 野我係打比我自己睇, 因為我覺得自己有D 走火入魔, 成日好想係某一個年紀達到某一個資產總值, 為左咁我什至有D 一毛不拔, 幾十蚊什至幾蚊都去慳, 其實咁樣係好攰, 但唔知點解自己就係放唔開

錢的意義係乜野, 佢只係一個人係呢個世界的代用卷, 係應該用黎換取對你人生有意義的野, 唯一令我欣慰的係我好捨得去旅行, 計過呢四五年大概用左廿幾萬去左十幾個旅行, 我成日諗如果突然有個人跳出黎出價五十萬, 叫我完全忘記去過的旅行, 我會肯嗎? 答案肯定係NO

之前好想去讀Master (唔係話咩投資自己咁高級, 不過唔甘心一世人淨係識本科一種知識) 但一諗到要十幾萬, 拎黎買股票都可以收幾千蚊息一年, 我就好猶豫, 不過呢幾日都諗通左, D 錢訓係銀行戶口只係一個數字, 如果我人生只係好短暫, 我有幾千萬但我咩都無做過, 我會快樂嗎?

同樣為左一堆訓係銀行戶口的數字而喜怒哀樂影響情緒, 有意思嗎?

多謝大家聽我廢up 多過呼吸, 哈

組合進入捱價階段

我現在的組合多數係今年2月至4月建立的, 所以一直受惠於今年的反彈而全部都係正數, 可惜就係今日我正式宣布其中一隻股票進入左捱價(負數)階段, 成個組合都回報亦比高峰時回落左35%...

其實呢個係好正常的, 假設我個組合唔經常轉換(亦唔想), 咁組合的價值一定會隨著股票而波動, 問題係點去調整自己的心態

之前睇過好多高手都係係股市低點切入而係高點出貨, 假切我無佢地咁勁, 我只能盡量係股市低點入貨, 即係點都會經歷捱價的階段先可以有一日火鳥重生, 好似而家雖然我仲係正數但比高位回落左35%都咪話唔心UP, 我認我而家個心態係動搖的, 情況同年頭/年中點解唔all in 一樣, 因為哥陣我都好驚, 驚唔知佢仲會點跌法, 問題係來到而家呢個Moment 我有咩可以做同心態上應該點去適應呢?

或者真係只可做到"升有股跌有cash" , "基本面無變下不賣出", 呢兩點似乎比較可以令我心情平復吧

新昌集團的故事

岩岩PAT PAT 痕走去禁下十大跌幅股票, 發現左呢隻啜核妖股新昌控股, 點解講呢隻係因為我係買股票初期係有買過呢隻的, 哥陣仲叫新昌營造

記得當年我工作的公司發展緊, 其中一個承建商就係新昌, 哥陣佢好似仲有1.X 的, 我見佢派息不錯又大大部吊雞車係我office 隔黎又係建築實業股就買左, 之後聽講我地公司唔會再同佢續約, 於是我就放左無理過呢間野...

後尾幾年後再留意呢間野係因為有個藝人王X軒原來就係佢主席個仔, 哈哈, 之後碌下D 新聞就知佢唔掂, 又成日用公司D 錢買D 垃圾其實係入自己袋, 完全兩個字 "屈必薯" 可以講晒

其實多年後睇番以前買過的股票變成點, 都係一種樂趣, 但係如果佢好似700呢D 升到爆晒的話可能你唔睇好過睇了...

支持 Donald Trump 千秋萬世一統江湖

支持Donald Trump 係因為全世界都覺得佢好癲, 佢一上場乜都唔洗做應該就可以搞隻黑天鵝出來,  但其實睇多D就知呢條友好多野都係得個UP 字, 加上美國唔係一條友話事, 你估佢真係上去做皇帝咩!! 到最後市場未又係回歸理性

不過我個人心底其實真係好想佢上場搞亂檔!! 一來真係想睇下呢個癲佬可以搞到D 咩出黎,

二來呢隻黑天鵝早來好過遲來, 快快上場搞冧聯儲局同耶撚大媽, 即刻加息搞冧房地產!!有咁亂得咁亂最好, 早爆早復原, 我唔想等到我五六十歲先來世界經濟大崩壞...到時我怕我無命睇到個世界復原的一日....

每個時代的狂熱

今日飲飲下咖啡, 又係度諗緊我地會唔會不知不覺間己經陷入緊某一D 泡沫事件之中呢?

其實每個時代都有屬於佢的狂熱同泡沫, 睇番以前的南海, 鬰金香, 科網, 次按, 每一次深陷其中的人都唔會覺得自己係深陷其中

泡沫之所以成為泡沫係因為無人覺得呢個係一個泡沫, 所以先至有黑天鵝的形成

咁問題黎啦, 假設我地2016年己經身陷係某一個泡沫入面, 咁呢個泡沫最有可能係咩呢?

或者我地應該諗下呢幾年最狂熱同人們最熱衷GE 野, 應該就係最有可能成為泡沫GE 野...

我第一樣諗到GE 就係: 借平錢同樓價.......

===================================================================

恒指依然係23000-24000 彈彈下, 分析下唔同人物的意見:

我最仰慕的blogger: 大部份都有手持一定的現金, 但長遠睇年底會升.
散戶 (我自己): 升市想入貨, 成日手痕
財演: 海有微波至巨浪, 相對濕度0~100%, 間中有雨或天晴

我的股票生路歷程

依希記得我第一次買股票係2011 年, 因為我好記得哥陣銀河11 蚊, 我好想買, 但係我個股票戶口點都activate 唔到...之後唔知點解中國銀行就成為我第一隻股票...

之後買股一d 章法都無, 乜都買, 有賺有蝕, 過左一年左右就迷上左買股收息的傳說, 就係卓悅, 當年1.6 蚊 又高息又有分紅, 之後結果點大家都估到

仲有就係炒濠賭股, 當時正值濠賭熱潮所以都有得賺, 去到後期好彩又識得嚴守止蝕, 所以overall 應該平手吧

就算係上年大時代, 基本上我都係亂買, 有賺, 再嚴守止蝕, 平手 無限loop, 所以我諗我過去的4 年股票生涯應該係平手, 賺左經驗..

真正有D 諗法應該係大時代後的2015 年尾, 我發現原來網上有好多Blogger 會share 自己的一D諗法, 我開始追睇佢地D post, 之後發現更多Blogger, 亦有D 係唔止講投資, 真係令我大開眼界同問自己投資係為左乜, 財自呢個topic 其實係比人濫用左, 但係我自己就因為呢個terms 而去開始計劃將來的退休生活, 因為我知我無可能做到財自, 只可以做到最大限度的累積財富

呢一年好彩地食中左年頭到而家的升浪而有D 斬獲, 但係我會不斷問自己同諗清楚我的目標係乜, 投資呢條路真係好易迷失, 好多野我今日實牙實齒講但係聽日就打倒昨日的我, 呢個係我知自己的一個缺點, 所以先想透過個blog 去紀錄同提醒自己

係度真係好多謝各位Blogger, 池兄, 70 後, starman等真係令我大開眼界同係令我人生諗多左好多~

調整己經出現~之後呢?

今日終於出現一個大調整, 雖然我D 貨係20000-22000 左右入的, 但今日的回吐搞到回報大減...

息係一定遲早會加的, 之前賭佢唔加其實同賭唔脫歐一樣, 9 成人覺得係GE 野, 只要有少少意外就會鬼哭神嚎, 所以我今日都放左隻link 仔止左賺先, 一來呢隻野個派息係我咁多隻房托最低, 2 來我房托佔比太重, 一加息都咪話唔係野..加上無乜CASH 係手, 回一回氣先~

目標係當個市回番22000 就入一注REITS 或長建電能, 再跌到20000 再一注...

當然..如果聽日即刻爆升番1000 點...就由得市場懲罰我吧.....

買股為乜

「我唔係要發達，我係要有系統咁積累財產。」

一言驚醒洛克人, 當初我買股票都只係單純為左打敗一D 唔投資的人便己心滿意足...有時真係會被股海迷惑而無視左當初的理念, 見到爆升股又會心雄, 又會買入一D人地推介的股票, 完全同自己當初的想法背道而馳, 或者股票的贏家就係可以做到95% 人做唔到的事先可以成為哥5% 的人吧?

操作回顧之馬後炮

今日巨騰跌到去2.2 , 中海物業亦一如我想像咁跌番去1.58, 諗番之前都曾經有做幾個好靚的止蝕操作, 但係事後被止蝕的股票都會升番高過之前的價, 咁樣的操作到底有沒有意義呢?

1. 長地: 51 止蝕, 最低38 , 而家55 ( 仲要54 買番...)

2. 匯瘋: 49 止蝕, 最低45, 而家55....(我仲要買賣左兩次..)

3. 長和: 92 止蝕, 最低83, 而家98....

股票的timing 真係決定一切, 同一個決定兩個月前睇好英明兩個月後覺得自己是一個傻仔, 亦再次証明有買貴無買錯跟本係豬up, 股票從來都係timing 決定一切, 所以我成日唔明D 人問number 係咩心態, 同一隻股票同一個時間買入, 有人可以發達有人可以破產, 股票真係唔係一個number 咁簡單.....

恒指己接近23000, 可適用的操作己越來越少...最多都係換下馬....REITS 依然居高不下, 可以令我安心的股票我己找不到了....so sad...

沽出巨騰和太古B, 買入中人壽和長地

今日沽出左巨騰和太古B, 因為自己始終唔係好睇得透巨騰, 我依然犯住呢個毛病, 唉

太古出左業績, 估計己維持唔到5厘的股息, 之前買入係因為佢有大折讓同想係組合加入綜合企業, 不過業績強差人意而且我估未來都唔好得好多, 就算有大折讓無奈好多業務都好不如意, 就算係零成本擁有唔賺錢就係唔賺錢, 例如國泰, 我自己都成日去旅行, 我都明白佢有幾難捱, 短線一定唔會諗搭國泰, 長線靠香港中轉客但係面對中國D airline 大解放, 國泰只會捱打.

石油業務又係蝕得好緊要, 睇唔到前景, 飲料係我最睇到但今年都係盈利倒退, 得番地產我不如直接買太古地產好過

買入中人壽想食下A股條水, 而家組合得隻939佔比好仲要好低, 買中人壽想加重大陸比例, 加上我個人相信大陸人會越來越對保險open mind, 遲早知必需品, 市場好大, 不過內險己升好多, 短期可能要捱價希望我守到...

長地同長江基建我諗左好耐, 長地話要轉型我要俾10萬個LIKE, 超人睇野一定有佢原因, 唔食死地產一條水, 不過轉型做乜未知, 變左其實都幾博, 諗緊好唔好轉為長江基建, 而家D 人仲驚緊脫歐對佢影響, 電能都由68 彈番去77, 佢只係由63彈到67, 不過一手要六皮好甘, 又想留番D 錢入REITS, 又想hold 番個現金比例到20-30%, 好難諗

最新資產配置2016-07

2016/07/28
股票: 37.5W  (80%)
現金: 11 W    (20%)
基金: 8W (忽略)

可以睇到老婆注入左6W 後我的現金水平去到了20%, 其實都唔算多, 有80%股票, 主要係REITS, 應該佔左90%, 其餘係高息股.

暫時都可以做到"升有股, 跌有cash", 不過我諗最好都張現金比例增到30%好D, 但係呢樣野我覺得要同恆指成正比, 如而家個市係22000, 都仲可以將股票比例維持係80%, 但係升過某一個數如25000, 最好就60/40 or 50/50 會較好, 但咁又會衍生一個問題, 我的核心持股要係高位止賺嗎?

待續....

獲利中海物業

今日放左之前隻中海物業15000@ 1.61, 賺左4600, 只係幾日就23% 的升幅真係好癲, 都有DDDDDD後悔無買多D, 哈, 不過諗真D 自己都唔係真係對呢隻野有信心, PE 己經去到四十幾倍, 雖然可能放左仲有得爆, 不過呢D case 其實同止蝕係一樣, 你永遠唔會知賣左後佢會唔會升番/繼續升, 我只係做呢一刻我覺得正確的決定, 佢之後點係佢的事, so 不必有太大壓力

今日避險股, 昨日濠賭股?

話說今日放工一路都諗緊呢個問題....

究竟我係咁多年的蝕錢上學到咩呢?

當年氣勢如虹的濠賭股, 同今日氣勢如虹的REITS, 公用股, 有無一D 共通的地方?

應該話, 多年後的今日假如我再遇到多一次同樣的情節, 我會唔會避得過OR 有所進步?

當年濠賭股同卓悅由超強股墮落的契機究竟係咩呢? 又係咩令到我察覺唔到濠賭股同卓悅己經氣數己盡?

今時今日我當然可以講到一億個理由出來啦, 例如賭收己經連續十年增長, 太依賴中國, 賭收無以為繼等, 賭收唔係短時間內突然由三百幾億跌到百幾億的, 係經過差不多一年的時間, 但我有留意過嗎?

據我印象當年岩岩賭收下跌, 我仲入去撈低, 咩SJM, 金沙, MGM, 全部撈!! 當時己經有消息講緊濠股支持不住, 但係我只係聽到一D 我想聽的消息, 例如中國人一定要賭的, 遲早一定會反彈, 呀爺唔會比澳門死的, 如果賭收唔得點會仲有咁多賭場開呀, 等等....

留意下當年我買濠賭股的紀錄:

當然而家睇番梗係一額汗啦...但係當初究竟係D 咩蒙蔽左自己雙眼呢?

今日REITS 又創新高, 佢的風險除左加息仲有D 咩呢?我又應該點做先係最好呢......

獵人/殺手/奇襲兵/兔仔/收藏家

早幾日睇到篇文幾有趣, 講投資者大概分為五大類, 好似打機D 職業咁

輸家習慣1》兔子（Rabbits）兔子性格的投資人，往往是最失敗的一類。他們在股票持續下跌的過程中，不做任何處理，就如同英文諺語所說，「像隻兔子一樣，在車頭燈照射下（Rabbit caught in the headlights）（一動也不動）。」他們總是給自己無數的藉口，像是「已經跌這麼深，應該不會再跌了」、「遲早會漲回來的」、「等反彈一點，我就賣掉」，但是，往往是讓自己落入愈來愈深的洞，難以東山再起！

輸家習慣2》奇襲兵（Raiders）奇襲兵的特色是來得快、去得急，通常在股票上漲10%至20%的時候，就會把股票賣掉。就像尋寶奇兵，好不容易穿越叢林找到寶藏，卻只把口袋放滿金幣，轉頭就跑。這種交易習慣的特色常常賺到小錢，看似很好，但是雷索爾強調，「奇襲兵是在輸與贏之間，如履薄冰！」因為累積的漲幅不夠，所以賺得不夠多，但是只要1、2檔個股看錯賠錢，就足以讓他們整體資產組合賠錢。

贏家習慣1》殺手（Assassins）
在目前國際投資圈，最有名贏家殺手性格的典型，就是「金融大鱷」索羅斯（George Soros）。一旦虧錢，他會毫不手軟地砍掉部位、認賠出場。為了保存資本、保留再戰的實力，具有「殺手」習慣的投資人，在面對持有個股的帳面虧損時，會毫不留情地出場，「就像殺手一樣，不帶情緒地扣下扳機。」雷索爾強調。

贏家習慣2》獵人（Hunters）
這類投資人會在股票下跌的過程中，大量買進。他們就像獵人一樣，追蹤獵物，耐心地等到獵物愈來愈虛弱，然後每摔一跤，就補上一箭。這類人往往是價值投資人，敢於逆勢而行。因為獵人要對抗的是整個市場，所以他們通常發展出很厲害解讀股票評價的能力。

贏家習慣3》收藏家（Connoisseurs）雷索爾認為，收藏家是3類贏家習慣中，最成功的一種。當他們買到持續上漲的個股時，可以有耐心、勇氣，直到賺了數倍漲幅才獲利出場。「股神」巴菲特（Warren Buffett）就是收藏家最好的例子，他買進的多數個股至今都已經上漲多倍，但是他依然持有。

綜合三種贏家性格:

當睇中機會就要出手, 當股票跌 20% 就一定要有動作, 動作可以係止蝕(殺手) 或者係加碼 (獵人+收藏家), 如果跌左20%都唔作出反應, 你就只能做兔仔等死吧!!!

奇襲兵唔係唔Work, 但要超級勁爆嚴守止蝕, 唔係賺十次唔夠你輸一次, 所以我目標都係以獵人+收藏家為終點, 問題係要唔要做殺手? 傳統價值投資係話點都唔止蝕, 問題係我無咁強大的分析能力去揀股, 今日強股難保係明日妖股, 所以曹Sir都話奶左價值投資一獲後決心乜股都要止蝕, 呢個問題我到而家都未諗通, 正如而家REITS 如日方中, 係咪都要SET 止蝕呢? 我真係諗唔明白...

我草股票目的其實係為左將來退休時用, 如果係咁又的確係應該唔SET 止蝕, 問題係當股災來時所有股都會跌50%以上, 到時係咪都要死守呢?

ANYWAY 如果個市升到上26000, 我肯定要止賺一半先!! 至於止蝕, 我要認真諗下同定一個紀律去遵守先得

呢個世界己經阻止唔到中海物業@1.66 ...今日入左8000巨騰 @ 2.47, 希望唔會係下一隻卓悅吧!!嚴守止蝕20%!!

金錢的意義-反思

其實之前都曾經諗過一個問題, 就係當我地生活過得OK, 唔憂食住, 有份OK 的工有家庭, 多餘的錢對我地的意義是什麼呢?

當然唔係想站係道德高地去講咩金錢係萬惡呢D GAP 野, 只係我有一段時間一路都好想財務自由, 想向上流, 想有XXX 退休咁, 有時都覺得成30 歲仲係得丁屎積蓄唔知點算, 都會鑽少少牛角尖, 有一日突然同我老婆行行下公園, 我問我老婆其實我地生活過得不錯, 係咪仲係要咁不斷追求金錢呢? 我老婆話其實一路都係我自己係度亂諗, 哈哈

其實我係一個好緊張錢的人, 每次lost 錢都會有好深的hard feeling, 上至萬下至幾十, 一樣會不開心, 我會好自然將LOST 左的錢聯想到佢可以購買的野, 如一萬蚊可以去一個旅行, 一千蚊可以買個吸塵機, 一百蚊可以食三餐中午...所以無論點我一LOST 都會好唔開心, 呢個係我一路都知的一個缺點.

但我都慶幸係咁的情況下我都肯忍痛執行止蝕, 呢個可能係睇左咁多書的一個功勞吧, 咁多年來止蝕真係幫我慳番唔少, 最甘一定係濠賭系列, 永利, 澳博, 金沙, MGM 我基本都係最高位哥陣買過, 如果我無止蝕應該無左起碼五六七八萬, 其次係PK 卓越, 中海油, 等等..

今日再睇到一個己故高手Allan的Blog, 佢初入股海一野無左九位數的TWD, 我估大約幾千萬吧, 重點係呢個係佢的大部份錢, 佢萬念俱灰下反而領悟到人生的大道理, 就係錢是什麼? 應該話未洗的錢對一個人來講的意義是什麼?

http://allanlin998.blogspot.com/2013/11/blog-post_27.html

金錢是一種觀念. 他要使用, 分享, 才會有意義. 我覺得失去金錢,很痛苦. 但實際上, 日常生活我一點也沒有受到影響, 我仍然有錢吃飯, 有房子住, 所以痛苦的根源到底在哪裡??

原來它的根源, 是因為我認定那些錢是我的, 是因為我觀念上的錯誤.造成我自己的痛苦.但實際上,在生命的實相上, 這些錢不是我的, 是上帝(上天)給的,我空手而來, 我也將空手離開, 這個錢只能留在地球上, 作為代幣使用而已,

我們要看自己擁有的, 不要看失去的, 在我最沮喪的時候, 太太安慰我說, 不要難過, 就算是我們只靠定存, 也可以過一輩子, 對啊.我忘記看看我所擁有的,忘記知足和感恩. 看到那些 自救會, 有些 老人, 連老本都賠掉. 我們實在是幸運很多. 我現在的態度

是每天感謝, 感謝上天給我聰明才智, 讓我可以服務人群, 當有一天, 上天跟我招招手, 說..回來吧回來吧

我也準備含笑而去. 每天,我都覺得是真正的豐盛的一天

其實我真係一個好撚怪雞的人, 乜春野都可以擔心一餐, 我都唔知幾時開始我變成咁...唔止係投資/ 蝕錢上...

點解我每日都要為一D 唔影響我日常生活的野而憂心?

 我應該每次不爽就問自己一個問題:

呢件事會影響我爽YY 的日常生活嗎?

會影響到我無得食fine dining ma?

會影響到我同我屋企人的歡樂時光嗎?

會影響到我鐘意做的事嗎?

如果以上皆非, 關我旦治咩....

======================

中海物業還是爆發了, 1.19 爆到上1.3 高追左15000 股, 現價1.5....奶奶的....

買股收息的盲點

呢排睇好多BLOG 都強調買股收息, 現金流等等, 真係多到悶, 其實咩係買股收息同點解要買股收息?

D人成日話呢隻股乜乜乜好高息呀, 平呀, 抵買呀, 喂大佬, 呢D 係咩分析來的? 咩叫好高息, 平, 同抵買? 有D 人仲話自己係52週高位接左貨問一D 膠手點算, D 膠手一睇, 高息股, 就叫D 人唔洗擔心, 未收下息先囉, 咁都得.....

股息係來自隻股間公司的盈利, 股價跌係因為大家都唔睇好呢間野的前景, 又或者本身間野有問題, 無盈利又何來股息, 以前我都好迷股息呢一套, 直到奶左卓越一獲金之後, 我就知乜叉高息跟本唔係買入的原因, 話說卓越由1.6 我開始買, 買到1 蚊, 而家3 毫, 當年就因為有人介紹話高息又派紅股, 結果中了招!!!!

今日又見到好多人推話高息, 收息, 真係好反感, 買股票制造現金流哥D 跟本係自欺欺人的做法, 本金跌到得一半, 收收收, 收條春咩, 1 年先6,7% 收十年都係六七成, 仲係講緊間野無減派息的情況.

一隻好股有高息當然係值得一讚, 但係咪無高息就唔係好股? 高息就一定係好股? 股息現金流令好多人都盲目唔去分析隻股, 又或者買左就唔睇, 我覺得弊多於利同害左好多人.

PS. 英國終於脫左, 個市爆跌左一千點, 我最醒就係92 賣左長和, 而家83, 最蠢就係買左匯豐兩次又第二日賣左, 來回都唔見一千幾百蚊, 只怪自己無定力又無諗清楚, 呢個都係我缺點...

anyway 世界本來就沒有一日寧靜, 動盪本身就係常態, 所以我覺得脫歐係一個機會, 不過匯豐好多業務係歐洲, 我覺得脫歐最大獲唔係英國, 係歐盟, 全世界都預左英國會衰, 所以反而跌極有限, 但係歐洲金融震蕩將會陸續有來, 所以我都係sell 5 buy 電能, 起碼攻中有守~

REITS 己經升到暈左...只恨入得兩手領展...唉....

借錢大計又再擱置

今朝去左問, 話最多應該只做到2.75%, 而且未必借得足, 唉, 仲有兩三萬政府手續費, 聽完我都係答佢諗下先...唉....

今朝大插500點, 賣出建設@5.01同盈富@20.9 加上老婆科水, 入左8000 股泓富@3.07, 仲有第一次買坡股 MAGIC 2500@0.985, 大概15000 左右, (一野扣左我30蚊坡錢手續費, 好傷....)

套少少錢出來主要係擔心來緊脫歐, 仲有中國入指數哥度我估都獲獲地, 建行我一向心不在此, 唯有套左佢同2800, 入番有5.7% 息的泓富, 睇好寫字樓+工廈的組合

呢期REITS 爆升好多, 搞到我想入貨都唔敢, 唯有入個最高息的泓富頂住先啦....

我發現其實我係哥D 唔等得的人, 成日都要滿手貨先安心, 跌又驚, 真係好GAP, 所以可能借唔到錢都係好事, 今朝爆插500 我都有少少怯咁, 點操100萬倉呀, 睇來我修練得未夠......

借錢前的感想

聽日就要去睇下借唔借到錢了, 今日係咁意同我老豆老媽提下借錢買股票, 嚇到佢地咩咁, 我唯有話講下笑....

我都明白佢地點解咁驚, 因為佢地哥代人可能對股票認識少同自己都身受其害, 但我覺得雖然我唔係借好多, 借盡未八九十萬, 但係對我黎講呢個係我對我的沉悶人生一個少少的掙扎, 我可以好平坦咁等30年後退休, 其實穩穩陣陣真係無咩問題, 但係我的一點不甘心, 就係我可以活成什麼其他的模樣?

借幾十萬其實都唔係咩大事, 但對我黎講可能係反抗呢個悶局GE 一個少少衝擊吧.

當然前提係唔影響自己屋企人, 要保障到佢地生活安定, 每個人供多兩三千其實又問題不大GE :)

anyway 聽日去CC 睇下有咩搞作先~可能人地唔批呢哈哈~

再現機會???

話說尋日番番下工無聊入左某銀行個網, 竟然做緊P-3 新計劃, 仲要不論新按定轉按? 二話不說打電話去問, 佢話呢個PLAN 係新出, 做得成的機會的幾大WO, 計過數如果而家間屋估450 萬, 借盡七成大概有97 萬落袋, 借315 萬, 如果咁好彩借到25年就每月供14000, 利率由2.5 --> 2.25.


拎住97 萬會唔會令我方寸大亂呢? 由於呢舊錢一借落就己經有成本係度, 雖然好平, 但係唔知自己係咪真係做到, 不過都係哥句, 如果我係錯, 就由我黎証明我係自己係錯吧!! 我要曙光!!!

結果只有三個:
成功:            提早退休, 新的人生
失敗:            繼續打工到65
打和:            繼續打工到65
咩都唔做:    繼續打工到65


GOGOGO, 聽日去問下先

最近恒指又爆番上21300, 我都調左一調個組合, 平均息率>5%, 合格

呢排REITS 比人炒到爆, 不是好事, 如果再爆上去我拎住90 萬都只可以等運到...

睇番入得最靚仔都係領展同置富, 原本太古A 72入哥下真係無得輸, 可惜輸左比自己, 長和同佢揀一隻走結果走左太古, 尋日終於頂唔順用長和換番太古B, 來回差左6,7 千...唉

勿忘初衷, 大巧不工

尋日終於上完最後一堂股票班了, 其實係由頭講一次同解釋一次咩係股票, 當中有D 係我一早己經知GE 野, 亦有一D 我唔知GE 野, 當初報讀都係因為想重新一次認識咩係股票, 估唔到中間都有好多野我係唔知的, 令我突然諗到現今的股票投資中人, 又有幾多人真正了解咩係股票??

最後一堂我問左呀SIR 三個問題, 係我一直存疑的:

1. 究竟點樣去組合自己的投資package? 應該加入D 咩去balance 成個組合?

2. 如果呢個世界經濟遲早奶獲大, 咁呢一刻應該點做好?

3. 港股會唔會被世界捨棄?

第一個問題其實我都係問下, 因為我知呢個係好個人, 每個人都有自己的答案, 呀SIR 就建議可以加入下高息的外幣, 但就唔建議債券, 因為門檻高同回報低.

第二個問題亦係我今篇文章最想表達GE 野, 呀SIR 話無錯世界的確有可能奶獲大, 但係唔代表我地要咩都唔做, 佢建議我地Any Time 都係係市場做步署, 應該注重控制注碼GE 多少同風險管理, 與其成日驚幾時會奶獲大, 不如步署下奶獲大哥陣應該點做會更好, 因為無人會知幾時先會發生黑天鵝. 而且市場係不理性的, 黑天鵝前都可能大起大落幾百次了.

另外佢都話唔洗諗得咁複雜, 留意下身邊GE 物價, 所有野都係漲緊, 奶茶都由8,9 蚊賣到而家13,4 蚊啦, 好簡單的一樣野, 通漲一定會發生, 錢一定會愈來愈唔見洗..

第三個問題:
會, 當人民B 完全自由兌換同大陸股市完全國際化, 港股就會收檔, 但係早幾個月人民B 國際化先開始宿沙, 中央決定收番個控制權, 所以有排都唔會發生, 港股依然係有地位的

結論. 諗咁多做乜, 凡事諗番最基本的野, 心清則靈, 投資路上真係太多叉路, 唔容易呀, 勿忘初衷記住邊度先係你的目的地吧...

=================================================================

呢排又煩緊人生的意義, 可能下班後的8 小時會岩我, 即係用睡眠的8 小時+ 上班的8 小時( or more) 去換取生存, 再同淨低的時間去改善生活, 應該會好過成日想轉工同創業, 畢竟而家的我己經唔係一支公了, 係三個人 :)

經濟末日會來到嗎?

我今日忍唔住買左一手匯豐@51.75.....................................I am so Sorry!!!

始終都係輸左比自己....唯有睇下市場會點懲罰我吧....

======================================


尋日個市小插150 點, 今日又有升番350 點, 就來去到22000 了, 呢D 咁GE 市況我都唔識講, 你話佢聽日開始連插十日又得, 話佢連升十日又得, 市GE 野真係唔好預測....特別係而家由散戶主導多, 估得今日估唔得聽日, 做到自己吧....

分享下最近睇的一本書, 入面講到媒體只會報道負面的消息, 而人類係歷史中唯一學到的教訓, 就係人類永遠都唔會係歷史中學到教訓, 哈哈

呢篇野真係講中左我, 我就係哥個成日覺得"今次一次會唔一樣"的人, 成日覺得而家的金融體系點同以前比呀, 咁複雜!! WELL, 但係幻想下自己置身於每個爆煲的時代, 都會覺得今次爆煲一定同以前唔一樣, 但結果最後都係一樣!!

因為歷史本來就不單純, 有野恐怖得過打扙咩!! 唔講遠講D 我自己經歷過的:

2003沙士, 個個戴口罩番學, 番工又要係屋企番, 講到香港就黎變疫埠, 係疫埠呀!! 有咩恐怖得過疫埠呀?????

2008 雷曼事件, 百幾年的大機構都可以執粒, 哥陣你有信心可以復原嗎?

結論就係, 死就死, MARK 大隻脾, 早D 爆一獲仲有機會比我早D 吸貨, 遲爆我真係搞唔掂....

雖然好多人以至我都覺得金融結構一定會爆, 唔通我地長期渣CASH 等運到嗎?
正如人一定會死, 唔通咩都唔做日日係度食同訓?

而且我深信, 佢爆之前一定升一獲金.............到時請留意!!!!

賤取如珠玉

手痕呢樣野真係好難忍, 好想好想好想入市, 匯豐 50 蚊真係好想將聽日份糧車入去....

發現每次想背棄規則就會制造好多借口出黎去合理化自己, 例如今日唔入更待何時之類...

如果今次我因為背棄我定落的規則而贏錢, 咁將來都一樣可以因為咁而輸錢....定D 來啦


最近睇左一篇由台灣高人寫的投資人心得, 佢用一條普通的大市十年平均就執左成億, 每次一低過十年平均10%就開始入貨, 高過40% 就開始出貨, 注意係開始, 佢表示因為大升同大跌市係不可估頂或底的, 所以分批進出就會更好.

另外都提到因為而家D 股民己經理性左好多, 個波幅己經無以前咁大, 所以可以考慮20%-30% 就開始出貨


另外都係哥句, 主張係大市好驚哥陣入貨, 瘋狂時出貨, 而且出貨要夠快, 因為通常大升市能出貨的機會只係好短, 而大跌市可以入市的機會就相對長



後記, 都係哥句, 請遵守自己定下的規律吧

加按失敗

今日終於去左永亨諗住加按我間屋, 諗住起碼套番80萬出來買REITS, 點知佢話我間屋只可加按一半再扣去欠銀行的...最後係無得借......

完了吧....如無意外.....枉我尋晚仲緊張到訓唔著教...草....

其實我都還好GE...借唔到都可能係天意....可能我避左一劫呢...haha~
唯有專心慢慢磨吧...遵從每月的投資方法~大跌市就用我夫人的漲爆基金掃貨~!!

呢兩日極速睇完呢本書:

雖然個名真係好雞...好似D 傻仔書, 但真係幾好睇, 重點係:
1. 複利公式的重要
2. 跌市要開心
3, ETF 先係王道
4. 資產分配係最最最重要
5. 主動型基金都係垃圾..............

最令我深刻係2, 因為跌市係掃貨的機會, 點解D 人會跌市哭升市笑呢? 本書話正常應該跌市笑升市哭呀, 因為升市我就唔可以買我心愛的股!!

無錯, 跌市笑証明我係買緊一D 我有信心而我覺得我了解的股, 我係入股佢的公司, 我買的係商業, 而唔係一個number !!

記住, 我係買佢間公司, 我係買佢間公司, 我係買佢間公司!!

所以我又睇番自己個profile, 跌市我會開心嗎?

於是我二話不說減持了939.......(原諒我再次矛盾吧....)
因為佢玩股換債, 係可以顛覆以前所有數據的, 可以插到2 蚊, 而2 蚊我會掃貨嗎? 唔會!!!!哈哈

下一步就係諗下ETF 同資產分配, 係咪要加入債券ETF 去balance 番個組合呢?

人應該追求自己認為快樂的生活

今日終於睇完呢本書, 最印象深刻的係其中一個忠告:

投資係注定孤獨的, 無必要去分享你的投資策略或尋求別人的認同, 因為你只要為自己負責.

另一個係叫我地千其唔到借錢投資, 因為有借貸成本下你就唔可以自在咁做決定, 會被借貸成本迫你去落注, 因為由你借的一刻你己經開始扣緊錢...咁我應該借嗎?

最最最正係係最後一個忠告:

人應該追求自己認為快樂的生活, 一個人最大的成功應該係通過個人努力而得到的成功...

如果係咁...我而家過的日子有意義嗎? 我知道何為有意義嗎?

如果我有仔女, 我一定會盡我的能力令佢地有自己的夢想/理想/興趣

因為無理想可能係我一生最大的憾事....人到三十都唔知自己呢一生想點過...真係好悲哀

財務自由之後?

"其實財務自由對人是一種挑戰,很多人對財務自由是葉公好龍,甚至是恐懼的心態,比如說幾億資產才有資格談財務自由,設置一個不可能實現的目標。 因為對大部分而言,並不具有支配自由時間的能力,很多人如果沒有一個職位或者頭銜,他們不知道自己該幹什麼,這樣的人不適合做自由職業者,更不適合做職業投資者,勉強走這條路只會增加痛苦,只有當你知道你的時間該用來做什麼的時候,你自己想做什麼的時候,這條路對你來說才是有幸福感的。"

長渣必勝之退休的迷思?

呢份工真係令我有幾多時間...hehe

話說岩岩睇左70 後的blog, 又諗左好多好多野..

點先為之財務自由呢? 財務自由左之後我又會點呢? 我有自己想做的事嗎? 我有理想嗎?

其實我係唔想自己隨波逐流的, 但偏偏我又唔知自己想做D 乜....

或者如佢所講, 財務自由唔係萬能, 錢都唔係萬能, 但錢能BUY TIME, 可以令你多D 時間做D 自己想做的野....但我有自己想做的野嗎??

講番投資, 之前有個朋友仔極力主張種樓概念, 即係不斷一開二二開四收租到死都唔賣....

以前覺得佢好岩...但而家覺得佢好病態....

放落股票, 未同哥班主張一路死渣賺息舌價高低都不放聲稱可以靠股息退休的人一樣?

WELL, 其實直到今朝我都仲諗緊借銀行100 萬買股收息到死....
諗番我可能都係一個偽價值的傻西而己...睇兩野年報分析兩野就覺得2萬點恆指好抵入...

唉, 我迷惘了....what should I do?

或者買入收息股收息同買樓收租都只係一度門, 而不是一個終點吧....
呢個世界唔會有一種訓十年就有幾百萬的投資的....強如巴菲哥, 佢都係每日要貼市去經營的...

希望我可以突破到呢一重財務自由, 收息萬歲, 長渣不放的迷思....成為一個有獨立思想的人....

記住強如匯豐銀行, 今日都只係跌到4X 蚊...有咩股可以渣一世???????

風險高低?

最近研究緊內銀的話題, 我都有6萬蚊買左建行@4.8 ( 現價4.9)

其實之前曾係4.7 時買過10000 股的, 但睇完人地分析又驚死放左5000股...

到今日業績公佈, 減10% 派息, 每股減晒野後約派287, 約5.6% , overall 其實係OK 的, 但始終有一班人出來唱內銀造數, 中國唔掂, 壞帳, 等等

其實我自己本身真係唔介意佢做唔做數, 只知現價低過5 蚊係好入得過, 我買係買中國經濟咁解..如果內銀死-> 中國死-> 全世界都唔會好過的....

有時又諗番, 其實做D 乜買D 乜係無風險? 風險高低唔係講緊事件本身, 係講緊你有幾理解件事的風險, 你點去做plan B plan C 等, 你了解的話, 風險就會低, 唔了解, 其實定期都一樣有風險...

可惜我依然改唔到驚死同耳仔軟的毛病....GAP......

十年後股息表

今日屎忽痕計左條數, 假設每個月我投入12000 落去買股, 只求股息五厘, 要十年之後先
有可能有接近10 萬息一年 (8000/月)

總投放金額係144萬, 預計戶口價值係190 萬, 複式都有46萬...


果然只靠股息真係條好漫長的路.....

但係對於我呢D 天生唔受得風險又唔識揀爆升股的人可能係最好選擇...

目標只係希望打敗哥D 無投資的人會好D...哈哈

　

	1	2	3	4	5	6	7	8	9	10
每月	12000	12000	12000	12000	12000	12000	12000	12000	12000	12000
每年	144000	144000	144000	144000	144000	144000	144000	144000	144000	144000
息率	5%	5%	5%	5%	5%	5%	5%	5%	5%	5%
總金額	151200	309960	476658	651691	835475	1028449	1231072	1443825	1667217	1901777
年收息	7200	14760	22698	31033	39785	48974	58622	68754	79391	90561

反反覆覆的我

今朝終於都係放左中海外同長汽....

我再次為我的反反覆覆感到不爽.....

諗番咁多年, 到左今日自以為己經有番D 修為的我, 原來始終都係原地踏步....

不過呢一種反反覆覆總比死守的偽價值好吧?

諗番其實呢種做法都救左我好多次, 如澳博, 永利, 中海油, 卓悅......

到今日上述股票比當年跌超過50%, 如果我堅持死守我諗今日己經唔會再有彈藥入市....

又或者咁睇, 原來我買買埋咁多無無謂謂缺乏分析的股, 哈哈...

如果我可以再慬慎一D, 我真係可以慳番唔少....

粗略計過如果我由頭到尾只買405, 我回報起碼比而家多50%....

而家渣住幾萬蚊, 又再想找蠢蠢欲動, 彷彿唔買野個心唔安樂, 定D 來吧....


目前搵到最令我舒服的方法:
1. 買香港本地股
2. 買REITS
3. 如要買非1, 2 的買不超過3 萬蚊

我又係咪可以做到巴菲特當年科網咁...睇住佢暴升都同自己講, "呢D 唔係我杯茶" ?

入了中海外

上星期六聽完施淩分析, 今日入左五萬中海外, 收市跌左2 % 後我己心神不安...

其實咁多年的投資己話比我知, 每次我唔遵守自己的紀律, 市場就會懲罰我 (輸錢)..

今次入之前其實己經有左心理準備, 完全係專反彈, 如有閃失就收檔, 既然如此點解仲會咁不安呢?

看來我修練仍然未夠.....缺乏自己分析係唔會支持到跌市的....

亦即係我所謂 "要買一D 跌市的會舒服的股"

而我暫時搵到的, 就係REITS.........