1883 的特許經營權 + 2023年結

竟然大意忘記左1883 的澳門特許經營權係12月31日到期, 真係估唔到玩到今日2023 last working day 澳門政府都未同澳門電訊簽約, 我估最大可能係跟固網續到2024 年9月

特許經營權合同講明澳門電訊有權用政府的一堆"特許資產", 包括佢地而家用緊的大樓, 線路周邊野一大堆, 唔係業內人跟本唔明, 簡單講呢堆野係阻住其他電信商入澳門的重要障礙, 所以好多人都好想政府收番澳門電訊呢堆野, 但由於太複雜, 澳門政府一路都拖字訣, 由2011 年開始話收, 續下續下就拖到2023

呢堆野對澳門電訊其實都幾重要, 因為佢迫住其他電信商入澳門就要租佢地的設備, 但如果收番入政府, 變相就會開放澳門電訊市場, 大家都去租用政府的呢堆資產, 澳門電訊我估影響唔細

1883 中報入面賺七億, 一半約係澳門電訊度黎, 即係約3.5億, 如果比番經營權, 毛估估澳門電訊利潤少1/3, 即係對1883 黎講賺少2億左右

又睇下31 號前澳門政府係咪會加班同澳門電訊講數? BTW 如果我記得, 今日3.25 應該會沽三分一睇戲....

中信國際電訊(01883.HK)  -0.010 (-0.304%)    沽空 $8.20萬; 比率 0.752%   公布，其附屬公司澳門電訊與澳門政府於2021年11月24日訂立的《公共電信服務特許合同中期檢討公證合同》的附錄合同的期限將於今年12月31日屆滿。截止目前，澳門電訊與澳門政府仍在進行磋商，未就特許合同期限屆滿後的安排訂立書面協議。

=============================================================

今年過得特別快咁, 上年仲陶醉緊2136 同762 爆升四成的快樂, 今年港股就黎個第四年大跌,

年內重倉股883 941 都叫做過得去啦, 762 基本已換晒941, 當時941升到70 蚊真係爽, 話咁快又跌番61, 年尾都係去唔到65, 但64.8都收貨啦

今年繼續正回報, 雖然唔係好勁, 但暫時都守得住年年正回報, 最開心係個倉的收息已超過半百, 希望有朝一日可以收到七位數息啦

下年我估應該比今年易, 手上941 883 守尾門, 一堆垃圾殘國企做爛頭卒, 搭多隻酒店股鷹君, 希望羅嘉瑞唔好令我失望

仲有希望1883 續約成功啦, 都渣住成15萬股架

執垃圾時間到

沽出少量941

入371, 257, 1310, 信利, 譚仔, 大唐發電, 762

個倉一褲都係941, 難得升番64, 減少少買下其他垃圾先

珍瓏棋局, 餵鷹割肉

割肉呢家野肯定係越遲越難, 我割過的肉真係唔算少, 有D 錯有D 對啦, 但買股票只要做對時大對, 做錯時小錯, 慢慢就會累積到利潤

當年割內房, 我真係割到滿手鮮血

割科技股好D, 因為本身已有一舊浮盈, 只係歸還大部份

再之前割長和長實, 都係平手左右

跌得多唔應該係唔割肉的理由, 問題係跌得多, 就要搵出跌的原因, 係咪自己先係傻嗨

如果發現自己係傻嗨, 就算得番一半都要割

如果發現人地先係傻嗨, 當然開心, 但應該情況我經驗真係好少

市場傻嗨的時間係好短的, 我印象只有當年941 883 被美國殺, 同埋上年10月的流動性風險

哥陣真係傳統中的用桶接啦仲用盤, 求其豬一隻都發發聲

買股咩buy and hold 真係唔好太迷信, 唔岩就閃, 睇定再買入, 真係唔好比太多包伏比自己

長實集團, long time no see

最近1038 爆升, 又番去睇番好耐無留意的長和系, 其中一隻惜日舊愛1113

不知不覺1113 已經有一半利潤來自同樓無關的業務

睇番中報100億利潤的構成

賣樓 -- 35.3 億, 香港中國各佔一半

租金 -- 23億, 香港19億

管理-- 4.5億

公用事業 -- 40億

敗家酒館 -- 5.8億

市值1350億, 每年保守都應該賺到200億, 派息6厘, 淨現金120億, 其實真係無乜好講

未來賣完樓唔補地, 應該都繼續變身1038, 慢慢公用事業佔大頭, 派息應該可以增長, 走1038 模式

睇番當年用250億買酒館, 每年賺10 億, 不過不失啦, 收購之前酒館每年都賺到4億英磅, 當你一半每年賺20 億應該得掛

誠哥鉅頭睇野, 又點會好似我地D 凡人咁睇三五年?

回歸初心- dry martini

問問自己, 如果而家係恒指30000點

你最後悔無係16000點時加倉咩股? 

你最可惜係無買咩股for 你退休收息之用?

又或者諗下你十年後係加肋脾海嘆緊dry martini, 你最慶幸16000時大手買左咩股? 就算身邊的人都叫你唔好買?

鷹君集團(41)

研究左好耐英軍(41), 最終呢幾日用緊餘的渣華換入, 原因係英軍其實有一半利潤來自世界各地酒店, EBITDA 都成四五億, 其餘四五億就由中港收租物業同冠君貢獻

如果長遠香港租金同地產發展應該都唔得掂, 咁英軍都唔會差, 而且英軍實在太平, 90億唔夠, 中期息增, 黎緊賣完朗濤賣何文田, 不過何文田都未必咁好賣, 隔黎瑜一好似都有D 獲氣, 希望賺到十億八億派特別息就夠

羅家渣住七成, 但睇佢地都唔會私有化, 因為爭家產誰也不讓誰, 可能等羅老太.....但越不和派息誘因越大, 因為大家都唔想羅主席拎晒D 錢, 有錢就分, 特別羅老太, 唔好蝦佢老人家呀, 有錢就派多D 比佢啦, 嗚, 

買之前睇晒佢地爭產的故事, 真係有趣, 首先羅家有九個兄弟姐妹, 咁一定出事啦, 九個出一個唔生性的都有排煩, 你睇下四大家族都係兩個居多, 一個唔掂有一個後備, 你生9件真係攞黎煩, 仲話老羅生心願係九個一齊打理公司, 點打呀, 九個皇子公主一齊治國? 唔互片都偷笑啦, 從來無發生過, 奶硬野 (之後睇到有報導形容羅家係<九子奪嫡>, 真係笑左, 貼切都暈)

然後出現二佬夾外人反收購老豆的酒店, 有趣。孻仔就夾佢呀媽想拎番佢失去的野, 仲話只係想保住家族, 有趣。羅主席係少有的醫生專業, 有趣。老母九十幾歲幾開始驚比仔女夾走晒D 錢, 有趣。匯豐又真係可以無視羅老太的order, 仲要勝訴, 有趣。

/////鷹君集團創辦人羅鷹石遺孀羅杜莉君（羅老太）控告滙豐國際信託（下稱滙豐）案，昨在高院進入第十日審訊。羅老太供述孻仔羅啟瑞被「Kick（踢）咗出」鷹君董事局時，她再度當庭落淚。她又指不滿當年返港不久的三子羅嘉瑞將「幫家庭賺唔少錢」的二子羅旭瑞踢走。不過最戲劇性的是，羅老太在庭上竟說羅嘉瑞抹黑羅旭瑞貪污，令風波中支持與反對羅老太今次訴訟的羅家兩大陣營急急「齊心」澄清。

代表羅老太的資深大律師余若海問她是否記得滙豐建議給她一億元的事？她答說：「滙豐向我提議，信託分九份，畀一億我養老，限我五日答覆。」她不接受這提議，因為「成個鷹君冇晒囉，成個家冇晒囉」。//////

如果羅老太百年歸老, 咁呢個Trust 會點分配手上的3成41股分? 分9 分每人3%? 羅主席私人名義拎住27%, 佢最好的兄弟羅鷹瑞拎住5%, 之後可能都係亂局, 分錢算啦, 唔好搞咁多野, 其實41 係羅主席帶領下真係唔錯, 無盲目投地擴張, 海外搞的酒店全部係核心區, 有真錢入的, 疫情都派1.8特息, 無搞財技, 就算分拆1270 同2778 , 41 都係拎住超過六成, 你睇下其他REITS 邊有, 甩左就無眼睇自生自滅啦, 派息五年加埋都派成6蚊, 真係算唔錯, 可能唔團結先係對老散最有利, 團結或者單一股東, 都一樣G9G 做低個股價私有化。

現息7厘幾, 每年派7億淨係酒店哥PART 都夠玩, 利空就係1270 同2778 未來債務大軍殺到, 再咁落去就要私有化或供股了, 到時英軍又要拎一百幾十億出黎

結論：英軍係一半收租股, 一半酒店股, 配置下都有趣, 而且可能41 就係大劉講的6厘幾, 又有錢投地, 佢又有渣住, 未來派十幾厘的股呢?(華置岩岩同英軍合投左啟德地, 係咪FD 底?) :P

參考: https://zhuanlan.zhihu.com/p/670067713

最新股權分佈究竟係點, 我查左好耐都查不到, 大差不差

後記: 年報持股

羅嘉瑞: 30%

羅鷹瑞: 5.44%

HSBC信託: 34.06%

街貨: 30%

現時41 市值90億, 當你出高4成私有化, 即係唔洗40億就搞掂, 出高三成35億搞掂

太古與長和

老王初初炒港股時, 太古與長和就好似東邪西毒咁, 兩大派息穩陣的綜合企業股, 又係世界級的業務

到今日, 發現同長和比實在太侮辱太古, 太古係肯同小股東分享成果的公司, 長和連原本答應要回購的金額都無, 西毒變毒西

可惜太古B 之前已賣晒了, 太古真係一隻另人安心又放心的股