2018年12月20日 星期四

投資和賭馬

最近睇書又睇到一個比喻, 就係買股同買馬係有驚人的類似

呢個比喻己經見過好多次, 最有印象就係窮查理講的同彩分注

今日睇<下重注的本事>講到凱利公式, 又再提起呢個概念

散戶買股, 運氣佔大部分, 再靚再好再強的股, 一個造假已經收皮

只有用注碼去分散先可以提高勝率

只要有運氣的成份, 都唔可以孤注一擲落個股 (除非間公司係我開GE....)

照咁講, 唯一可以唔執粒同唔衰退的就只有ETF

結論:

1. 平時買個股, 要以勝率分注 (勝率又係另一個topic)
2. 沒有永遠可以長渣的股票
3. 出現孤注一擲的情況, 只能買大跌下的ETF









2018年12月17日 星期一

2018 結一結

今年....其實以前幾年一樣...唔覺得自己做得特別好

係1883 單天保至尊, 不過由於我2.4 沽左1/3, 所以唔算食得多, 不過做股票就係咁, 完美情況只會係幻想中發生, 唔好成日諗早知XXX, 無用的

1883 係第一隻我由2.6到2.2 到1.9 到番2.9 都仲有貨的股, 係一個非常好的經驗

2018最傷的係誠哥系, 不過我知道回升只係遲早的事, 係必然會發生的, 所以都無乜感想

總結, 2018 應該打和或超微賺吧, 沒有刻意去紀錄, 一來懶...二來都係懶...


最開心係同各位blog 友不斷交流同學習, 大家背景, 理念, 飯數都不同, 呢樣真係現實世界俾唔到

一來...現實好難大家坦蕩蕩咁交流, 我從來唔會同身邊任何仁透露自己渣咩股, 以免害人無FD 做

二來...討論(爭論?)得太多, 真係難免傷感情, 哈哈



2019我自己睇得唔係咁差, 大家成日話脫歐, 意大利債務, 法國又示威, 又貿易戰, 又封殺華為

我依然相信, 世界無一日沒有危機, 天下無一日沒有新聞


借用blog 友提到的斯托克代爾悖論:

//對前途充滿信心,但又直視殘酷的現實。

堅持你一定會成功的信念,同時,要面對現實中最殘忍的事實,不論有多大的困難,不論它們是什麼。//



祝各位聖誕快樂, 2019 投資順利 :)



2018年12月13日 星期四

換馬

沽出1883 7000@2.92
沽出173  5000@3.95
買入001  500 @ 79

突然係度諗, 究竟我係想炒出炒入賺十萬八萬( 如果我得), 定係想制造一個可穩定提供現金流的投資組合呢?

Blog 名叫"挪亞方舟打造計劃" 雖然有D 柒, 但其實係提醒自己係目的係打造一隻救生艇, 以供日後退休之用, 而不是炒出炒入

2018年12月11日 星期二

長和功課: 歐洲電訊業的前世今生

長和最近係咁拼購整合歐洲電訊業, 作為長和微股東, 研究下歐洲電訊業係3G 年代的慘痛經驗.

話說當年岩岩發展3G, 歐洲想借3G 一野成為世界大哥, 係咁發債擴充同買牌, 可惜事實只係另一個泡沫

誠哥的和黃當年雖然借3G 千億賣橙, 但係佢係歐洲 3G 上都燒左過千億, 最後仲蝕足十幾年, 所以誠哥係呢件事上究竟係受益定受害?

而最近長和中報電訊對長和都貢獻23%, 半年賺70億, 睇得出電訊對長和影響力慢慢增加, 誠誠呢個底抄足成廿年, 邊個夠佢玩?



再次証明就算你估到未來科技趨勢 (當年3G), 同你是否可以買中賺到錢係兩件事

諗起之前睇過, 話當年香港岩岩流行彩色電視, 大家都好睇重當年一隻叫香港天線(好似) ge 野, 話係大勢所趨, 最後都係88

而家最為人津津樂道的科技趨勢, 不外乎係AI/電商/區塊鏈


//第三代行動電話(3G)曾是一個帶著無比魔力的名詞,讓歐洲的電信業者不惜斥資數百億美元競標3G營運執照,然而對照今日電信業股價暴跌和深陷債務泥淖的慘況,證明了3G是歷來僅見、幾乎毀掉歐洲的大泡沫。
  歐洲的電信業巨人自2000年以來共花費約5,000億美元在買執照、併購和網路建設上,如今這些業者都擔負龐大的債務。德意志電信公司為600億美元的債務而急於出售資產;威望迪環球公司董事長梅瑟、法國電信公司的伯恩都曾是電信業的金童,現在卻連飯碗都快保不住。阿爾卡特、飛利浦,甚至易利信等公司都想退出市場,而諾基亞公司也眼看股價下跌75%。

  最熱中3G的伏得風集團也慘淡經營,2000年初,伏得風在談笑中以1,630億美元的股票和現金收購德國曼尼斯曼公司,現在伏得風董事會正辯論要不要註消250億美元到500億美元在泡沫高峰時收購的資產。

1993年宛如夢幻般的3G概念,在1990年代中期以前完全成為市場主流,背後的主要推手就是摩爾定律(Moore’s law)。由於微處理器的價格更便宜、威力更強大,以及體積更袖珍,研發人員不僅打算在新千禧年到來前把整部電腦縮小成一具手機,並且付諸行動。//


出處:
https://www.sogi.com.tw/talks/%E9%9B%BB%E4%BF%A1%E6%96%B0%E8%81%9E_3G%E6%B3%A1%E6%B2%AB%E7%A0%B4%E6%BB%85%E6%AD%90%E6%B4%B2%E9%9B%BB%E4%BF%A1%E6%A5%AD%E7%BE%8E%E5%A4%A2%E6%88%90%E7%A9%BA_/4154696

2018年12月9日 星期日

關於超折讓股

曾有一段時間我非常沉迷超高折讓股, 什麼金朝陽/博富臨置業/廖創興/聯合/英皇我都有買賣過

早排合和又係一隻經典, 最後38,8 提出私有化

我只能講, D 散戶真係執到, 但竟然有好多人話出手太低, 咩NAV 六十幾蚊等等

are u kidding me?

比著我真係將幾十年食過的飯都Lur 出黎應成啦

呢D 超折讓股, 其實全部係因為呢十幾年樓市大升下的畸型股, NAV 幾百億的資產租金收入可以係2%, 然後話超折讓, 你試下用NAV 市價賣一棟商業中心比我睇下? (呢度又要讚下我偶像誠誠)

林少陽有一篇講超折讓股的文講得勁好

買超折讓股其實係守豬待套, 根本係一D 分別都無, 間唔中食到一野, 你會以為好快會有下一隻, 然後...回首己是百年身

建議大家睇NAV 順手睇埋資產回報, 低得可憐的盡量唔好掂, 而且都未計租金下滑帶黎的風險

另外什麼手持大量現金, 人地唔係今日先手持大量現金, 憑咩你一買入就要我派比你? 等下啦世侄!

鬥長命唔係問題....有幾大機會鬥得贏先係問題

2018年12月3日 星期一

減持嘉華

今日有財演唱好嘉華, 加上尋日大戶借中美變暖挾爆淡友, 減持10000 股 173@3.99, 留作日後增持1113 或1883 之用, 如果再升可能再減少少

話說當年由4.2買入15000股, 之後一下爆到上5.7, 死都唔走, 然後一路跌到3.2, 溝到變43000股, 今日平手走1 萬股食下花生先

其實買股應該學誠哥同東哥咁, 平未買少少, 大跌? 笑笑口, 無影響心情, 咁樣係最好, 可能你覺得係廢話, 但係明白左個心情會去左另一境界

原因其實只係三個字: "有底氣"

(今次算係"策略性減持", 哈哈, 聽個名都型)




2018年10月25日 星期四

長實筆記 (2018 H)

2018 H
半年:247億
核心:120億

一次性
中環中心: 116億
上海世紀: 69.89億
= 185億-28億稅 == 158億

非一次性
賣樓收入: 22.34億
物業租賃: 35.84億
物業管理: 1.82億
酒店:    8.7億
飛機租賃:  5.9億
基建三巨頭: 22億
=96億 (固74億+22億賣樓)

當下半年又係固收74+22 即全年247+96 = 343億, PE5.4左右

2019年假設海之戀賺100億, 其他賣樓40億, 固收維持74*2 = 148億, 新倫敦大樓4億, APA 3月成事當5%回報 = 750億*60%*5%*9個月 = 16億

2019都有300億掛!

=========Apple Daily=======
從長實剛公布的上半年業績,已簽合約但未入帳的物業銷售額高達784億元,按年增加14%;其中香港部分佔約577.26億元,大增1.06倍,但確認入帳收入卻倒跌近六成至91.9億元 (純利22.3億)。

長實執行董事趙國雄年初時透露,集團今年將推出4個新盤,以豪宅為主,包括

淺水灣道90號、                 (中報沒提) --- 項目已累積售出3幢洋房,套現逾15億元。

半山波老道項目第一期、----10月獲批--涉及115及66伙

長沙灣海壇街項目            (中報沒提) ----10 月申請預售待批--876伙

將軍澳日出康城第8期,  (中報沒提) ---- 仲未動工?

星漣海                                 長實旗下馬鞍山星漣海已獲取滿意紙,會在短期內向買家發出收樓通知書。長實高級營業經理楊桂玲表示,項目累售405伙,套現75億元,佔整體約89.2%。

雖然日出康城項目涉及伙數達1,422伙,惟仍未申請預售,故年內推售機會成疑,預料集團今年售出伙數較去年大跌一半。
集團今年首個項目淺水灣道90號於上月初上載樓書,據悉已經安排準買家睇樓。項目上月中推首間洋房招標,銷售安排顯示,90 Repulse Bay Road推出12號屋及兩車位招標,截標日期為本月15日。大屋實用面積5,915方呎,連933方呎平台、307方呎花園及161天台。
另外,半山波老道項目第一期涉及115伙單位,現正申請預售樓花同意書,計劃年中推出。至於深水埗海壇街項目及日出康城第8期項目,料今年中申請預售,最快年底推出。

預計2018年HK 項目:

















土儲
HK: 500萬平方尺
內地: 1.6億平方尺
海外: 400萬平方尺
物業存貨: 1370 億
現金:    550億
負債:   580億


2018年10月24日 星期三

溝貨的心理改變

最近低住加注左幾次嘉華同長實, 倉位也慢慢漲起來, 原來心態也會隨住倉位慢慢改變

因為每次低位加注後, 雖然平均買入價會下跌, 但由於倉位越黎越大, 相同資每次再加注對平均買入價的影響會越黎越細, 意味住你要用更加的錢可以拉低買入價

而當你倉位慢慢上漲, 你心理也會出現變化, 原本比較客觀和輕鬆的心態會慢慢變得主觀和緊張, 之後每升跌一格對你的心理影響會越黎越大, 最後可能你會因為主觀而覺得係市場的錯, 於是孤注一擲去"博反彈"

所以每加一注, 其實影響係好大的, 唔好睇小每次加一兩手, 慢慢之後會好似吸毒咁發現原來倉位己經大到自己接受不到, 之後只有兩個結果, 就係忍痛止蝕, 或者孤注一擲

可幸而家手上仲有超過一半現金, 但己發覺自己心理上的變化, 所以即便對比買入價跌左20-30%, 要下注, 都一定要慎重, 同考慮之後心理上隨住倉位的變化, 是幾何級數上升的

其實我對嘉華同長實的基本面到呢刻都無改變, 但究竟是不是我的倉位影響了我? 我也分不清楚

引用一句: 在趨勢面前, 基本面和估值只是一張紙而己

2018年10月10日 星期三

勿忘初心

恒指如無意外今日應該就穿25000了

回想上年個市未大升前的想法, 而家仲apply 到嗎? 有被大升市扭曲初心嗎?

之前所定的投資計劃, 還可實行嗎?

勿忘初心, 大家坐穩了


2018年10月8日 星期一

買入長實

賣出長建1500 @ 61.2

買入長實500 @ 56.2, 共有6000 股, 目標增持至一萬股

2018年9月29日 星期六

"先入一注"的問題

我相信好多人買一隻新股都會用"先入一注"呢個方法試探試探

但我個人的經驗係, 十次先入一注, 九次都會蝕錢!

表面睇先入一注好似好彈性, 進可攻退可守

但有時買股票就衰係呢個 "進可攻退可守" 之中, 好聽就有彈性, 唔好聽就無淩兩可

我經驗係, 好多時買左一手之後

1. 升, 嫌佢賺得少, 又覺得佢己經升左, 唔敢溝貨, 又唔想咁快賣!
2. 跌, 又覺得無左幾千好肉尺, 唔知佢會唔會再跌唔敢溝貨, 止蝕!
3. 唔升唔跌, 買你一手都磨咁耐無搞作? 平手走!!

其實諗深一層, 點解要買一注?

 如果你覺得佢好大機會會升, 點解唔一次買足?

如果你覺得佢會跌, 點解唔等佢跌先買?

講到尾, 先入一注對我黎講係一個好差的手勢, 因為咁代表我睇唔通呢隻野, 又唔知佢升定跌, 但就總之想買左一注先啦咁

雖然隻隻都係輸少少, 加加埋哥度都幾係野

改善方法

1. 唔加入新的股票, 只買賣最有信心幾隻
2. 一開波就定左要買幾多貨, 分幾多注, 咩價位入



2018年9月24日 星期一

卓悅控股

有一套電影曾經講過, 人生總會遇上幾個仆街.................

我相信每個投資人都一樣, 係投資生涯上總會遇上幾隻仆街股............


而我遇過最仆街的仆街股, 就係卓悅控股







(呢個戶口因為卓悅而俾我封印左, 得番另外一隻123 的碎股, 哈哈)



己經耐到唔記得幾時買, 應該我我初出茅廬大概2010-2011哥陣吧, 仲記得哥陣大家都鼓吹買股收息(仲勁過而家), 咁岩有個財演推呢隻, 哥陣有成六七厘, 仲十送一, 哇!! 我一度以為自己買到六七厘的煤氣架!!


哥陣仲專燈行過幾間卓悅, 見到好鬼多自遊行, 心諗我今次仲唔做足功課? 呢個世界仲唔係我GE?


於是大手買入左幾萬蚊, 印象中收過一次十送一, 之後我都唔記得咩事就一路暴跌, 好彩我係1 蚊哥陣走左一大半, 最後就淨番上圖............



之後好耐都無再留意佢了, 淨係記得佢好似不務正業買左好多投資證券, 己經被我classified 為人生最妖之妖股, 沒有之一


轉眼間來到2018年, 卓悅依然好多自遊行幫襯, 我老婆都有幫襯佢做facial, 但佢唔會知佢老公係呢隻股上輸的錢, 應該夠佢做一年的facial

2018年9月19日 星期三

一個狂想

有時我會諗, 其實咁幾十萬幾十萬咁買股, 出出入入, 比你執到十零廿萬一年, 其實對你的人生有什麼幫助呢? 是否可以令你改變現有生活呢?

而且出出入入賺下輸下, 倒不如我一下炸幾球落一隻最有信心的股

佢爆升就收手, 會唔會仲加直接?

因為個結果係顯而易見的, 學勁WIN 哥講

1. 贏, 就可以改變
2, 輸, 保持現狀而已

總好過每日三心兩意, 又想買呢隻又想買哥隻, 跌10%又話要止蝕, 升20% 又唔知走唔走好呢?

什麼貿易戰基本面分析一大堆, 對收益真的有幫助嗎?

哈哈, 一個狂想而己, 大家唔洗話咩同賭錢無分別, 放晒同一個籃之類, 當brainstorm 下

2018年9月10日 星期一

中信國際電訊

好耐無寫下呢隻重倉股, 今日見到一段幾有意思的新聞:

集團主席辛悅江指,澳門電訊的定位是以澳門為基礎,向內地及海外延申,會逐步走出去。基於數據保護問題,澳門及內地的數據只能儲存在當地,不過現時有突破,澳門電訊已獲政府批准,將數據儲存在香港的數據中心,本月中會有正式合作儀式。另外,在香港中信電訊大廈的數據中心,3A期今日正式竣工並投入服務。

幾有趣的突破, 如果澳門電訊的數據可以儲存係香港, 咁様所有係幫襯澳門電訊數據業務的公司都可以經澳門電訊SAVE DATA 係香港, 即名義上係澳門, 實際上己經沖出澳門, 即以後再無分澳門或香港的數據中心, 兩者合而為一, 而我估第一個由澳門幫襯中信香港DATA Center 的, 就係澳門政府

另香港數據中心己完成四分一並係八月投入服務, 下年年尾會再完成四分一, 不錯

不過都要提提, 1883 的固網, 短訊業務不斷下滑, 賣電話就海鮮但無乜毛利, 而寛頻係澳門政府壓力迫佢減價下能持平己經好叻仔, 所以下期業績看不到會有大爆發, 希望KEEP 到大派息咁股價應該可以反映

PS, 其實我定期都會Search 下1883 有乜NEWS, 以前係從來無人推, 但今日竟然search 到有兩三篇扇稿話佢係抗跌奇BA, 高息穩定一流之類

我心諗佢由2.6直插到1.9 哥陣唔見你地話佢抗跌奇BA??


利申: 本人持有上述股票


2018年9月4日 星期二

長和系 -- 還有第二間嗎?

長和系係VICTOR 仔接左手後接連出招, 仲用左一招超有創意的財技, 型

其實大家話佢咁搞法三間公司的定位會好模糊, 特別係1113 又基建又地產又公用

但係在我看來長和系的定位從來都係用最少的資源賺最大的回報

又點解要分什麼基建地產公用? VICTOR 一開波講明邊度賺錢就做邊飯, 無人記得??

買長和係因為鐘意佢的行事作風, 唔會出古惑坑D 小股民, 做事靈活唔會綁手綁腳

正如一個人樓高時賣樓, 股平時買股, 不是最正常的事嗎?

長建應該係誠誠埋下的第一粒種子, 當呢個模式熟練左, 就可以套用到成個長和系身上

基建, 地產, 公用 都係長和系的拿手野, 如果有一日長和系係做做下走去搞長和醫療, 又走去搞下長和娛樂, 又走去搞下長和足球隊, 咁我就真係要同佢88 啦

曾經睇過有人話美股強, 因為佢地係會用閒錢黎回購推高股價, 但中港就興收收埋D 錢係個倉度唔知做乜, 有D 仲走去買番其他藍籌, 又或者高價買D 物業番黎都唔肯回購

一間作風穩, 大股東不坑人 (雖然唔知點解個個都話VICTOR 奸), 現金流強, 業務分明, 又肯回購的公司, 市場上不知有無人搵到第二間?

如果有人話長和都有坐艇的時候, 或者隻艇唔係誠誠叫你坐, 係你自己坐架WO

2018年8月16日 星期四

持股終極一插時機斷估

1113/ 173: 香港樓市逆轉/ P 真正加息之時

1038 : 英國硬脫歐/ 維持唔到派息年年加之時

1883: 供股/大減派息之時

暫時戰況全線見紅但唔算激烈, 最傷1113, 但有信心仲暫時頂得住, 要明白信心係會隨住股價下跌而動搖的, 人心肉做, 你估跌到20蚊我仲敢唔敢加?

最叻仔算係1883, 叫做賺左派息, 無計之前2.6開始建倉, 太早

睇到之前D 強勢股隻隻腰斬, 更覺得我呢D雞股可貴之處

要提醒自己唔係想一朝富貴, 只係想有系統地管理自己的財產

引用一句: 真正的風險, 就係因為投資而影響到實際生活

大方向, 維持現金>50% 直至25000先算
173 --不再加注(穿4考慮下)
1113 --50 蚊加
1038 --50 蚊加
1883 --2 蚊加(大減派息唔加)




2018年8月10日 星期五

李澤鉅

再次買入1113 500 股

大家可以留意下李澤鉅的磨鍊係異於一般富二代, 被綁架, 由低做起, 讀書做兼職, 搭公交, 以致最後順利接棒

香港富商之中的富二代, 我只信李澤鉅, 我信佢會係另一個傳奇, 佢可能不是一流的創業者, 但一定係個一流的守業者

如果我信錯人, 唯有認命吧, 哈哈

https://www.youtube.com/watch?v=Nsn4teMzHNQ

2018年8月2日 星期四

買入長實

買入長實 500 @ 58.25

問問自己係溝淡定係逢低吸納, 兩者有根本上的差別

2018年7月2日 星期一

心若冰清.天塌不驚

今日爽呀, 一野插800點

不過你話而家係股災? 我真係唔覺

大家對蛾六招同貿易戰好似好激動, 但忘記左其實每日都一定有新聞

投資世界需要新聞, 大戶需要新聞, 散戶都需要新聞

不做預測就無問題, 投資人要做的係制造一個可盡量應付所有情況的計劃

如果你己經有呢個計劃, 咁即使股災, 都只係你預計的其中一個case

既然你已在你預計當中, 自然可以做到 "天塌不驚"

2018年6月26日 星期二

市場過熱指標

雞湯金句:

"雖然我地無方法可以去預測市場走勢, 但我地絕對有能力搞清而家係咩位置"

試下列出我覺得肯定的事, 大家討論下:

1. 香港樓市肯定係極端高位
2. 利率肯定係極端低位
3. 個人/企業資金肯定非常易取得
4. 投資者非常湧躍入飛IPO
5. 因為QE, 越來越多人相信this time is different

最後一點, 係我係身邊朋友度觀察而黎, 佢地普遍性相信QE後我地己走向一條新的道路, 以前的舊經濟所謂的週期已不存在, 而港樓係中國強勁的熱錢流入下加上借貸只佔樓價一半, 爆煲的風險已不如2007.

我基本認同, 我都諗唔到有咩地方可以反駁, 所以我都換左樓

但係當大部份人認為風險己經不存在的今日, 會不會就係最大的風險?

俗語話, 當最後一個淡友變成好友, 因為市場己經無新買家, 自然只有向下一條路


大家點睇??

2018年6月25日 星期一

買入長和

買入長和@83.5@500 , 現價為2016年中 2 萬點股災價, PB 7.5 PE 9, 息3.4%

cash 40%

2018年6月9日 星期六

和記電訊的不負責分析3

最近和電又落番2.84, 本來想收集下等12 月佢派息, 之前毛估估所以唔係好準, 業績出左後試下用最新的資料, 計下當佢派晒D 錢後會變成點?


現價2.84
股本48億
市值137億
現金 137億
總負債65.3億 /1.28億利息, 成本約 2 厘


2017 全年收入不計賣固網5.43億, 流動業務收入 = 5.43-3.21 = 2.2億


情況一, 無負債公司一間

淨現金=137-65.3 = 71.7億, 盡派, 每股派 1.5, 除淨後股價 2.84-1.5 = 1.34

得出淨現金盡派後, 淨番流動業務的無負債公司一間:

股價 1.34
股本: 48億
市值: 64.3 億
收入: 2.2億, 即每股 0.046
PE: 29倍
當佢因為無負債, 每年賺幾多派幾多: 0.046/1.34 = 3.4%

=========================================================


情況二, 派100 億, 有負債公司一間:

派100 億, 即係可用37億還債, 每股派2.083, 除淨後股價 2.84-2.083 = 0.81

股價 0.81
股本: 48億
市值: 38.9 億
收入: 2.2億, 減去利息支出後, 即每股 0.034
PE: 23倍
負債: 28.3億, / 利息 2厘約5500萬

照當佢每年賺幾多派幾多: 0.034/0.81 = 4.2%


============================================================

情況三, 派130 億, 得出超重債公司一間:

派130 億, 每股派2.7, 除淨後股價 2.84-2.7 = 0.14 (囧)

股價 0.14
股本: 48億
市值: 6.72 億 (囧)
收入: 2.2億, 減去每年利息1.28億後, 即每股 0.019
PE: 7倍
負債: 65.3億

當佢之前咁派7成: 0.0133/0.14 = 9.5% (囧)

===============================================================

情況三真係無得輸, 仲可以博私有化或賣產, 不過成65億債一蚊都唔還仲要無乜現金係手, 有咩事上黎真係靠供股, 無左固網融資都無之前咁順手, 所以我估都係情況一, 二比較合理

PS. 純綷毛估估, 本人並無任何會計知識




2018年6月5日 星期二

關於不懂不做

我相信好多人初初買股票. 總會覺得周圍都係機會

好似今日見到銀行股, 又覺得好穩陣, 收息幾好
聽日見到公用股, 又覺得幾好, 跌市都唔會點跌
後日見到科技股, 又覺得幾正, 日日升唔停

其實我自己搞左股票咁耐, 到而家都仲係有呢個心態

好似睇人地推介某股, 自己再睇下, 又係WO, 好似幾抵WO, 56週新低仲唔係機會? PB 咁低, PE 又唔錯WO, 仲唔係機會?

不懂不做, 能力圈, 等等其實一早都聽過, 我相信所有有睇過巴老書的人都會知, 但係我自己真係做唔到, 硬係覺得全世界都係機會, 唔係唔買下

直到我睇到一個叫大巧不工的Blog, 我覺得睇佢每一篇文同每一個回應, 都會令我個腦被人用棍仆一下咁, 唔知點解, 哈哈

佢話對於投資, 唔明白就唔好買, 永遠不明白就永遠唔好買

其實都係講緊能力圈, 但唔知點解我突然明白了什麼? 重點係最後哥句 "永遠不明白就永遠唔好買"

係囉, 點解要迫自己去買? 點解去商場一定要迫自己洗晒全部錢?

別人睇到的係機會, 但係你盲跟就係陷阱

又或者話機會係相對的, 當你發現成個股市都係陷阱而不是機會, 你距離獲利不遠鳥


2018年5月11日 星期五

大行目標價

丘鈦科技發盈警,並被大行大削目標價,股價曾下滑逾30%。

摩根士丹利將其目標價由11港元,大降至4元,評級由「持平」降至「減持」或「與大市同步」。野村亦下調其評級至「減持」,目標價由13元降至7元。

==========================================================

由11 蚊可以直接降到落4 蚊, 呢D 所謂大行價真係無聊至極, 之前大時代己經話港交所目標400 蚊, 任佢講, 完全精神分裂

所以話免費最貴, 至理明言呀

2018年5月8日 星期二

試論按揭還款的78法則和換樓

78法則係指按揭的利息實際並不是分開每個月供相同金額的, 因為係銀行都要搵食, 所以通常係一開始還勁多利息, 去到尾就還勁多本金

用78法則去計下小弟個loan:

total借款的總利息約215萬
分35年還, 約35X12 = 420期

利息單位: 1+2+...420 = 88410

即係:
第一個月還420/88410 X 215萬 約等於1萬蚊利息
第二個月還419/88410 X 215萬
第三個月還418/88410 X 215萬 如此類推

假設我供到一半210期, 其實己經還左的利息係:

88410 - (210+209+208....+1) = 66255 個利息單位

即係215萬X 66255/88410 = 161萬!!!

係還左75% of 成條利息數!!

========================================================

結論:
1. 當你供左差不多一半的時候, 千萬唔好選擇提早還晒條loan 佢, 因為你餘下的利息己不是當年的%, 當然如果佢話聽日加息五厘, 咁另計啦

2. 照咁計, 的確係有趁平息早D 開始供的道理, 就算我供到五年佢加息, 由於我頭五年可能己經供左勁多利息單位, 越遲加息對我影響越細

3. ML 戶口可以某程度上防禦加息, 但因為你一開始供勁多息, 而ML 係每月計番個rate , 所以係不成比例的, 更何況隨住你供的本金越來越多, 你個ML 戶口可放的錢會越來越少

4. 咁如果換樓, 當我十年換一次, 就算供款只係供左三分一(三十年計), 其實個利息可能己還左50%, 係咪即係原本條Loan 係2厘, 因為你提早還, 就變左4厘或更多??

......好傷......




2018年4月30日 星期一

巴菲特名言?

終於睇左巴菲特給股東的信, 回想巴老的兩大金句, 發覺同我的認知好大出入

1. 別人貪婪你恐懼, 別人恐懼你貪婪

呢句終極明言, 我印象中書入面的確係有提到過一次, 但佢全句係話" 如果你必須要揀時進出, 那就盡量做到別人貪婪你恐懼, 別人恐懼你貪婪", 重點係第一句"揀時進出"吧? 點解無人提???


2. 價值投資 & 持有十年

巴老講到明價值投資的重點係在於評估價值, 你必須要知道公司的價值而進行 buy and hold, 但書入面都提到普通人係極難做到分析價值, 所以不斷強調散戶最好就係買入指數基金搭順風車, 只做簡單的事就得

==============================================

其實原本我係睇緊反脆弱, 但個作者真係超級東拉西扯同長氣, 佢之前本隨機騙局己經係咁, 我因為自己買所以都捱到睇完, 黑天鵝簡直係三分一都捱唔住, 不斷豬up 其他野呃字數, 其實佢簡簡單單講唔得架咩? 失望

2018年4月3日 星期二

換樓完成, 30000點重新出發

小弟早前2 房換了3 房單位, 由於之前舊屋只借了5成, 樓市升幅加上今次借7成, 換完樓反而套到少少錢, 適逢有師兄提到現在其實可能是熊一機會大於牛三, 決定用今日的倉位做baseline, 約70萬左右的貨, 今年內如非大跌或大升不會主動出擊, 因為雖然手上多了錢但係增加了一倍的負債, 如果風平浪靜就放ML 等機會

現有貨值70萬 (2018-04-03)
手上現金扣除裝修後約180萬
100 萬放ML 戶口做生活基金加終極待熊
80 萬放ML 戶口作為熊市加倉準備金, 每20 萬一注

如果一路飛升? 咁未由得哥70萬讓子彈飛吧, 雖然誠哥D 股...你懂的....

=====================================================================
剛睇完<<小島經濟學:魚、美元和經濟的故事>>

從宏觀經濟上好多書或人已講過最後銀紙會變零, 我相信呢個已經係不爭的事實, 美元連石油地位都不保, 最後必定game over, 港元痴住美元相信都無運行, 但同時大家又話資產泡沫一定會爆破, 咁最後個結果係點呢? 銀紙又會變零, 資產又爆破, 真係渣金先有運行? 而家美國政府將全個國家的債咩上身, 去制造假繁華景象, 相信係老美滅亡前都不會俾自己出事, 假設美金仲可以玩多十年, 但又貶十年, 資產繼續升十年, 十年後淨下的最強資產是什麼呢? 是樓? 是金?

終極爆破的契機又是什麼呢? 戰爭?

2018年3月29日 星期四

雪球語錄

做股票的人分三種:
1. 啄磨別人
2. 啄磨公司
3. 啄磨自己

2同3 最易賺錢, 可惜大部份人係1

=======================================

做股票一開始覺得自己無所不知, 之後蝕到一敗塗地先發覺自己原來一無所知, 但當你明白自己一無所知時, 你離賺錢不遠了


有趣有趣


2018年3月1日 星期四

好書: 投資最重要的三個問題 +1883

睇緊呢本野, 唔知邊個Blogger 推介過, 幾好睇

最深刻係作者話資金配置會影響你九成的回報, 選股只係影響一成, 因為資金配置係講緊大方向, 你渣現金, 債定股

我諗好多人包括我自己都係一開波就睇有咩股好買, 有咩股收息好, 成長好, 之類, 而忽略咩時候應該持股, 應該持股幾多% 之類應該無諗過?

作者話應該用漏斗型去諗:

1. 先睇經濟, 信心, 政策去決定哥年係渣股, 債定現金
2. 再決定渣咩版塊的股
3. 最後先係版塊入面選出你要渣咩股

1 同2 先係最影響你回報的決定, 最後選股只係佔十分一

其實我自己選股都係無厘頭, 一開出黎睇, 乜股都有 而從來無諗過點配置, 最多都係股/現金咁去睇

而家好D, 以前渣成廿隻, 乜都買D. 而家基本就係四隻, 希望可以做到核心持股

1883 --> 表面收息股, 其實係成長股
1038 --> 表面公用股, 其實係成長股
1113 --> 表面地產股, 其實轉緊公用股?
173 --> 表面地產股, 其實真係地產股

希望呢四隻可以陪我十年以上

================================================================

1883 業績靚仔, 表面係持平但佢係轉型中, 新datacenter 未投入, 手機繼續跌但只佔收入一成多D, 企業服務大增, 新收購都有收益, datamall 收入大增, 最好笑係管理層話佢地現金流太勁所以要加派息?? 而且股價太低不合理要加強宣傳?? 哈哈哈, 呢班管理層真係太有趣了


另, 3月16 長和一次過出業績, 好刺激WO, 唔通有搞作又或者誠誠宣布退休?

2018年2月26日 星期一

和電的不負責任分析2

尋日和電出左業績, 竟然1 毫子特息都唔派, 出現左我之前講的最壞情況:

和電的不負責任分析

其實大家成日話佢現金己等於佢成隻股, 我之前都話, 其實好多股都有呢個情況架, 但大家好似只係睇到呢樣野咁.

講真要數"清算價值" >股價的公司真係一大堆, 基本所有地產股都係, 可能你話現金唔同地產價值, 但係大股東手上, 現金同物業又或者其他資產有咩分別???

而且派特息一定有利嗎? 如果管理層可以搵到回報>10%的投資, 點都好過你收左一萬幾千拎去買iphoneX 吧?

Anyway 我都係馬後炮. 其實佢升到3.2 我都幾後悔2.8 走左, 但係我絕無幸災樂禍的意思, 只係分析下呢個 "會計上的錯誤" 或者唔係真係咁錯

今次單野引申左另外兩個問題:

1. 電能今年會派特息嗎?
2. 長實賣中環中心今年會派特息嗎?

市場先生, 不愧係偉大的羞辱者

2018年2月8日 星期四

做股票, 就係做心態

今日終於插穿3萬點, 其實個市升左咁多回一回, 大家就咁大反應係咪即係証明左一樣野?

大家都係高位追左貨?


小弟因為係主力誠誠股, 受惠唔到大升市, 所以而家只係打回原型

有一句說話blog友講得好岩

大家係咪成日都恐懼得太早, 貪婪得太遲?

基本面無變, 點解700 300蚊覺得貴, 400蚊又覺得平? 

建行5蚊好貴, 但9蚊好抵買?

當然個氣氛係好正, 大家都買買買哥陣入市, 係同大家同一條線, 

其實我覺得大家最驚唔係大跌市, 係人升我唔升, 我跌人唔跌

大家一齊跌, 雖然大家係會上 hk discuss 吹下水, 但你見個個都傷, 你反而無咁傷, 你覺得大家一齊唔見5萬傷D, 定人地執100萬你執5000 傷D?

Anyway 林少陽講得好, 呢D 跌市大家係時候番番基本面, 睇下咩股係值得你渣到退休, 咩股係你純綷一齊升升升所以買入?

長建65 蚊. 下年息己去到3厘8, 由開波到而家無減過息? 再一年就4厘

1113, 173 今年肯定爆數, 173 又係接近4厘, 下年至少有千幾個單位賣, 怕嗎?

1883 話明會考慮加派息, 接近7厘 (當然佢話je, 吹下水可能)

置富 都去番6 厘, 大哥, 14 蚊NAV, 想點呀

當然股災就係沒有最平只有更平, 曹仁超講過, 當年和記由三十幾插到7蚊, 佢先入場, 一路跌一路溝, 最後去到1 蚊, 呢個故事我一直記住

呢個世界的危機其實一直都在, 世界何曾有一日靜止過?

最緊要係知自己做緊乜, 你知唔知自己做緊乜?

做股票, 就係做心態呀!

2018年2月5日 星期一

插1500 有感 + 北水最後入市日

今日又大插1500 點, 突然諗起一個有趣問題:

你會唔會有時覺得沽早左, 沽遲左, 買早左或者買遲左?

我試過50 蚊買入1113, 45 蚊沽出, 之後跌到38 蚊, 而家係70 蚊, 請問45 蚊沽出做對了嗎?

2.2 沽出1/3 1883, 之後升到2.4, 而家2.14, 請問做對了嗎?

5.5 買入香港建設, 6.5 無沽, 之後5.6 沽左, 請問做對了嗎?

其實好多時對錯係相對的, 45 蚊沽出1113 對出之後跌到38, 係對的, 但對之後升到70, 係錯的, 其實每個決定都沒有對錯, 重要係做你覺得對的事同資金風險管理, 就算結果最後不似預期都唔係你可以控制到, 因為跟本就無人可以成功預測股市


========================================

溫馨提示:


南下「滬港通」及「深港通」將於2月13日至22日停市, 撈貨的朋友們請注意~~


PS. 沽出長和, 留D 現金過年前加倉地產恐慌股


現金: 45%

2018年2月4日 星期日

經濟太好都係大跌市理由??

第一次聽到經濟太好, 好到怕要加息都係大跌市的理由, 乜股票唔係睇公司盈利架咩? 幾時變左太好景所以要跌下先? 真係要造市跟本唔需要理由, 不如話今日領導人出門口跌親所以要全球股災??

anyway 為跌市做少少準備, 沽DD 股票等入愛股

如果唔係高追左的, 應該少D 看股票機, 唔好比佢影響情緒, 開開心心過年先算

2018年1月30日 星期二

560珠船BB

成日聽人地話咩咩國策跟住相關版塊就會爆升

我由於係誠哥死忠基本無享受過呢D 好康

係沽升淚939 (仲爆升緊) 後一路想加入番多D 內地元素係自己組合, 但自己又細膽

咁岩早幾日見有人介紹560 珠船BB

今日決定沽出東江水換入, 增加下我組合的內地系數

睇下食唔食到大灣區條水先!!



https://hk.finance.yahoo.com/news/%E3%80%90%E5%A4%A7%E8%8C%B6%E9%A3%AF%E3%80%91%E7%8F%A0%E8%88%B9%E9%A3%9F%E6%AD%A3%E5%A4%A7%E7%81%A3%E7%89%A9%E6%B5%81%EF%BC%88%E9%9D%92%E5%86%B0%EF%BC%89-003440985.html


2018年1月22日 星期一

最後的盛宴

建行係我強大的燈力下一沽即爆升多2 蚊, 我都唔知講咩好...渣左一年的收益都不及佢呢一個月的爆發, 又被市場懲罰了

另外1883 終於今日番到家鄉, 持股差不多一年, 跌足一年, 跌到我懷疑人生, 當中有諗過all in因為真係睇唔到佢有咩問題, 當然最後無咁做, 仲係2.2 哥陣走左1/3, 証明我功力不足

而家持有的股多數係誠哥的落後股, 同一D 我覺得來緊業績會超靚的, 如嘉華(再次多謝小伙子推介), 當業績公佈而咁好彩如我所料爆升, 可能都係時候減持一半股了?

現時股票現金比:

80% / 20%

應該會係出業績前全倉誠哥, 希望食到最後的盛宴

2018年1月16日 星期二

再加注偶像李嘉誠

再於100.8 加注長和

現有誠誠系股票:

001- 1000
1113 - 2500
1038 - 2000
778 - 5000
006 - 500

誠誠, 我絕不能失去你!!