沽出巨騰和太古B, 買入中人壽和長地

今日沽出左巨騰和太古B, 因為自己始終唔係好睇得透巨騰, 我依然犯住呢個毛病, 唉

太古出左業績, 估計己維持唔到5厘的股息, 之前買入係因為佢有大折讓同想係組合加入綜合企業, 不過業績強差人意而且我估未來都唔好得好多, 就算有大折讓無奈好多業務都好不如意, 就算係零成本擁有唔賺錢就係唔賺錢, 例如國泰, 我自己都成日去旅行, 我都明白佢有幾難捱, 短線一定唔會諗搭國泰, 長線靠香港中轉客但係面對中國D airline 大解放, 國泰只會捱打.

石油業務又係蝕得好緊要, 睇唔到前景, 飲料係我最睇到但今年都係盈利倒退, 得番地產我不如直接買太古地產好過

買入中人壽想食下A股條水, 而家組合得隻939佔比好仲要好低, 買中人壽想加重大陸比例, 加上我個人相信大陸人會越來越對保險open mind, 遲早知必需品, 市場好大, 不過內險己升好多, 短期可能要捱價希望我守到...

長地同長江基建我諗左好耐, 長地話要轉型我要俾10萬個LIKE, 超人睇野一定有佢原因, 唔食死地產一條水, 不過轉型做乜未知, 變左其實都幾博, 諗緊好唔好轉為長江基建, 而家D 人仲驚緊脫歐對佢影響, 電能都由68 彈番去77, 佢只係由63彈到67, 不過一手要六皮好甘, 又想留番D 錢入REITS, 又想hold 番個現金比例到20-30%, 好難諗