芒格叫我地多看書

之前睇到一個台灣Blog, 佢因為想改善投資成效而研究左好多投資名人的方法, 仲加上用番工放工的時間不停大量閱讀, 終於比佢研究到一個自己的方法仲成功埋, 雖然佢有提到好多其他有用的資料, 但最影響我的係佢的閱讀態度

其實我都好鐘意睇書, 乜書都想睇, 但人大左唔知點解真係開始集中唔到, 睇幾睇就會好想訓, 唔係本書好悶, 係我個人精神難集中, 唔知係咪開始退化?

Anyway 睇完佢個Blog 之後決定要學下佢咁去學下芒格, 狂睇書, 佢話世間萬物其實都係有一定的關係, 數學同投資有關, 物理同投資有關, 心理同投資有關, 工程同投資都可能有關, 什至可能種花都同投資有關, 只要你多閱讀, 了解世界所有野的基本運作, 對你的投資或做人一定有幫助

而且恒指去到咁高, 為左令自己轉移下注意力, 睇多D 書好過日日開住個AAstock 同經濟通啦

所以決定係度都記錄下自己睇完的書, 又可以吸引下大家一齊討論下有咩正書推介:)

順便講下呢排睇緊的一本書:

國富論你就聽得多, 無得聽過道德情操論?

兩本書都係偉大的Adam Smith寫的, 但係因為國富論太勁太hit, hit 到無乜人留意佢有另一本講人性的書, 作者用好多時間睇完消化左再寫左呢本簡易版出黎, 講真, 估唔到咁好睇

作者話會去研究道德情操論係因為奇怪點解同一個人, 可以寫出兩本完全相反的書?  國富論指出人的自私就係推動經濟的重要動力, 但情操論又話人其實又要有同理心同仁慈先可以維繫社會, 呢本書除左探討人對錢, 名利, 地位, 快樂之間關係, 仲講出Adam Smith 認為點先可以成為一個好人, 一個受歡迎的人, 一個對自己同對所有人都負責任的人, 正~~

我的足球陣

無意中見到其他blogger 提起黃國英的足球陣, 我又整番個自己組合的足球陣先, 順便紀錄下持股同佔比

係個市升到無日無天的時候, 我的組合終於有番10% 的升幅了, 當然我個升幅係衰過恒指的, 但正如blog 友所講, 呢個世界唔係下下都要講 "跑贏大市", "跑贏指數" ge, 雖然我個組合升幅係雞雞地, 但佢地每隻都係我自己揀出黎同克服好多野先可以渣到而家, 當中學到GE 野唔係淨係一句跑贏大市可以cover ge, 哈哈哈

(唔好奇怪點解我會咁布陣, 其實我係亂Q 咁黎.....前鋒哥兩隻己經係我個人可承受風險的極限了...)

轉載: 另類的投資心態

轉載自雪球:

https://xueqiu.com/6679352168

一個叫我是丁蟹的退休投資者, 佢的投資理念係有D 另類, 但大獲在我覺得佢講得好岩 :P

資金管理才是王道, 其他只是不能控制的混沌

沒有冒犯任何大師的意思, 純分享:)


1. 沒有任何股票值得終生持有，因為任何公司都會倒閉。終生持有某些股票的下場只有一個——破產，即使自己不會破產，後代也會破產。長期投資並非長期持有某些股票，而是長期持有投資組合，組合中的股票則是動態變化的

2. 選時和選股沒什麽用，基本不用考慮為什麽的問題。能夠通過人類主觀努力而提高投資收益的方法只有【資金管理】。我認為：格雷厄姆和施洛斯等人獲得不菲的投資收益，並非依靠他們的選股能力，而是他們有意或無意的使用了可靠的資金管理方法所起的作用。從資金管理的角度研究格雷厄姆和施洛斯的著作，可以發現一片新天地。可遺憾的是，幾乎所有人都只關心他們怎麽選股

3. 我的建議是：不要把“股神”們的話當教條，它們只不過是一些運氣好的猩猩罷了。如果這些猩猩運氣總是很好，它們就會認為這絕不是偶然，而是由於它們擁有了某種“能力”，它們會努力尋找這些“能力”，並編撰成書，例如第一本書的名字就叫《證券分析》。遺憾的是，它們在書中所寫的教條，與投資結果沒有任何必然的因果聯系。為什麽？價格圍繞價值波動，偏離價值的價格終會回歸價值。這當然沒有錯。但是企業的價值和股票的價格，都是混沌事物，人類當下還不具備處理混沌事物的能力。所以企業在過去、當下、以及未來的價值都是不確定的。就更不可能基於企業價值來判斷股票價格的貴賤了。因此價值投資理論只是徹頭徹尾的空中樓閣理論，看起來似乎有用（價值理論是真理），但用的時候卻發現無處著力（價值不確定），這導致任何對價值的分析工作無異於撞大運。總之，空中樓閣的價值投資並不比馬後炮的技術分析更高明。一言以蔽之：價值投資和技術分析一樣沒用。最後，請不要告訴我看財報，因為賬是做出來的，不是記出來的，賬怎麽做，全看會計如何“創作”，請允許我用“創作”這個詞

唔知咁樣轉載有無問題? 如果有麻煩同我講聲:P

太古真的叻叻豬?

早排買左兩手太古B @ 13.2, 呢幾日終於回升了, 買入因素如下:

1. 分拆概念
2. 高折讓+藍籌
3. B 股合股
4. 業績恢復
5. 少有地回購

雖然我之前覺得佢係一隻慘慘豬, 但君不見瑞聲, 咁大隻都可以(可能) 造假, 如果呢單野係堅, 咁我諗市場會開始關注一D 無咁大機會造假的股, 人們可能會開始肯比出高的PE 去買一D 誠實的股, 起碼唔洗停牌

有人曾經講過令散戶輸得最多的一定不是老千股, 因為多數人買老千股係膽博膽, 一係佢地唔敢大注, 一係佢地會狠心止蝕

令散戶輸得最甘的一定係比到信心, 又大隻, 又睇落好健康, 呢D 股通常係D 老人師奶訓身之選, 越跌越買, 永不回頭....表表姐如思捷.....(朋友媽媽當年就係訓身呢隻....)

希望太古真係做番次叻叻豬比大家睇啦

用PE 買2800 可行嗎?

首先好多謝各位blog 友熱心的回應, 估唔到我個雞BLOG 都係有人留意的, 好感動

由於買個股成日奶野, 我開始研究買2800, 坊間有好多師兄都提供用PE 買2800 的方法, 如13 倍就入, 再跌再入, 20 倍就放之類

但我就咁禁開恒指PE 的歷史, 發現一個好怪的現像:

圖中所見恒指係2015 大時代年同2016 年10月的PE 都係11點幾, 但竟然可以相差成4000點...

咁搞法又要睇埋佢恒指的PE 計算方法...分分鐘又要拆開每隻成份股佔幾多...每隻PE 有無特別, ...有無水份.....哇...未仲複雜過睇個股.....如果呢招WORK, 咁睇PE買939不是仲簡單過佢嗎?

我亂了....

我的過錯

之前己經誓神劈願講過唔會再犯同樣的錯, 但係呢幾次的操作都係失敗收場, 我覺得自己真係好無用...定落的規距一樣都遵守唔到

1. 高位追入左香港建設, 然後幾日後被震走
2. 高住追入左華能新能源, 今日無LALA 又爆出低位配股又被震走
3, 低位入左南航, 升左加倉, 然後一跌又被震走
4. 低位入左國航, 升左加倉, 又係被震走!!

我真係對自己好失望好失望, 明明講左恒指24000 後就唔再買賣, 一樣都做唔到, 升就驚唔夠貨, 跌就恐慌, 經常懷疑自己的判斷, 左搖右擺....

我唔會怪罪市場同任何人, 呢個係我的問題, 克服唔到我一世都不會成功

有無人可以教下我點先可以做到嚴守紀律?

長建和電能的債務?

最近不斷在研究核心持股, 其實小弟只係追求小小的年回報5% 就己經心足, 本來搵到長建和電能, 一隻收息3.6% 一隻4%. 又大隻又少負債好似好穩定, 股息年年增長, 又公用股,  本來諗住MAY 埋眼4% 都殺, 不過之後屎忽痕又走去周圍睇下呢兩隻野, 發現佢背後原來收埋好多野 (可能大家都知不過我都係岩岩先知), 唔知大家點睇?

由於呢兩隻野不斷透過聯營持股公司去做大塊餅, 即係每間收購都公司都唔超過某一個百分比, 所以長建同電能係唔洗將聯營公司的負債納入年報, 但又可以將佢地分派到的錢納入年報WO!! 所以睇埋佢地盤數係極靚仔, 收入又高, 堪稱強無敵, 最啜核GE 係長建成日同電能一齊買公司, 每間公司都唔會超過特定的股權, 而家仲拉埋長地落水, 好似買DUET Group, 長地, 長建同電能都只係各佔一部分, 真係玩晒

跟據林博士稱, 電能背後收埋的聯營債可能高達千幾億, 即時將電能手上的四五百億現金由正變負, 只能講散戶可以得到的訊息真係太少, 連自己買入的公司實際欠人幾多錢都唔知

公用股都財技到咁, 隻1 號仔我諗都唔洗點睇, 哈

不過根據經驗, 每次我挖黎挖去搞到自己唔敢買/ 落重注, 市場都會懲罰我, 哥隻股之後都會升...或者正如價值兄講, 我地的角色係去承擔風險, 如果有一隻股係無風險就有回報, 個大股東做乜要同你一齊分錢? 如果真的有呢D 大股東, 咁佢真係佛心得有如派錢一樣...哈

=========================
另早幾日發夢英皇酒店升到6蚊....買左10000 股測試下...各位唔好亂試...:P