爆虧恒大

第一次接觸恒大係財自哥的Blog, 一兩百萬孤注一擲3 蚊恒大, 最後一戰成神賺過千萬

恒大最新負債2.5萬億, 年蝕5000億, 我都唔係好知呢兩個係咩數字, 要知道廣洲一年的GDP 都只係兩三萬億, 佢一個負債已經等於一個一線城市一年的GDP, 每年蝕緊5000億, 所有港股最賺錢的公司, 宇宙銀行工商, 2022年都只係賺4000億, 我愛股941 一年都係賺1300 億, 陰公豬

內房我係賺過錢的, 哥陣真係求其買都賺, 講緊係邊隻賺多D 咁解, 記得玩內房之前只敢玩香港發展商股, 睇死內房好快爆, 之後內房突然爆勁, 我亦一改睇法, 加入陣營, 金茂, 合景, 旭輝, 最垃圾的佳兆業, 我都賺過錢, 因為係風口, 豬都會飛, 呢D 就係曹仁超講的"勢(si !!!, 第四聲)"

過左十幾廿年, 終於爆煲, 同我十幾廿年前的預測一樣, 我正確了嗎? 哈

同末日撚一樣, 地球總有一日會玩完, 停左的鐘都會一日岩兩次

預測如果唔加上一個期限, 即係廢話, 一年好似好短, 但你親身入市就知一年有幾長, 唔好話十年, 二十年, 當你五年後比你最終正確, 你都輸左時間

所以炒股通常勸人盡量避免左側, 但我都做唔到, 成個倉都係左側, 即係所謂收息撚假頭

點解老散咁鐘意左側, 因為左側你仲可以比個假希望自己, 右側你一睇錯方向, 或者走唔切, 好似內房科網咁, 一世都無可能回本

對一般投資者黎講, 唯一可以較大機會識別的, 只有股票的便宜程度, 咩行業景氣, 大國經濟, 資源危機, 真係講句算撚數啦你

沽清利福, 買入慶鈴

慶鈴垃圾, 派左廿年息竟然唔派, 手上渣住五十億係度煲藥

市值20 億, 過往每年賺兩三四億, 上年蝕500 萬就咋咋帝唔派息

如果賺錢係派息的大前提, 或者會發生幾個可能性

1. 全年賺1 蚊, 係咁意派少少 

2. 全年恢復以前一半, 派以前一半

3. 全年恢復以前大半, 派以前大半

4. 全年繼續蝕

按上兩年派0.12, 今年如果派0.06, 差不多8厘吧

加點聯通

呢幾日加左三萬股762 @5.1 /5.02/ 4.9

連跌12 日, 一個字, 服

慢慢買....可能仲有得跌.....現持有16萬股

《經濟通通訊社28日專訊》中國聯通(00762)在上海世界移動通信大會期間發布圖文大模型「鴻湖圖文大模型1.0」。

　　中國聯通稱,鴻湖圖文大模型是首個面向運營商增值業務的大模型。鴻湖圖文大模型目前擁有8億訓練參數和20億訓練參數兩個版本,可以實現以文生圖、視頻剪輯、以圖生圖等功能。

新創建竟然私有化

睇番上一次講創仔, 2020 年頭十蚊, 2020年尾5.5, 收左三年息, 私有化9.15, 真係唏噓

創仔為我賺過錢的, 只係當佢狂買公路又用自己錢買17 的5厘債券又話回購點知吹水又賣晒D 優質野之後, 我地就分手了, 所以我地係和平分手

真係估唔到創仔會比私有化, 因為17 幾窮大家都知, 更估唔到係周大福呀媽一野食晒, 買埋17 哥份

記得和記兄講過創仔係當年純純搞亂檔被迫分拆出黎救老母17 的, 全部都係靚到乜咁的資產

可惜係659 在位多年都坑唔少人, 其實後兩年佢有左派息承諾之後, 如果唔係亂咁買野同賣野, 659 真係一隻拍得住941 的靚股

太可惜了, 純純系的股的確難玩, 不過都曾經為我帶來快樂, 祝你地以後白頭到老, 以後無咩唔到再分拆啦

加息深水炸彈

差不多七八年前我曾經諗過低息環境可唔可以持續, 如果逆轉肯定有一場大陣痛

之後巴馬同侵爺上場虛張聲勢話要加息, 我曾經以為真, 哥陣曾經短暫清過倉, 因為好早之前已經覺得下一水加息週期威力驚人, 點知佢狼來了左幾次之後, 漸漸忘記左呢件事

到今日, 加息己成事實, 係唔係上升週期大家都係靠估, 但副作用無乜可能唔出現, 除左內房爆煲, 全世界一個似樣D 的副作用都無, 2008 開始玩慣左極低息, 到今日五六厘, 一D 事都無? 你信嗎?

咁即係只有兩個原因, 一係爆左我地唔知, 一係個巨型炸藥仲係醞釀之中

如果又係一次狼來了?

如果呢架火車係真衝過黎?

當我地知道有個傻仔拎住個火把係火藥庫週圍走黎走去, 我地要做的唔係估佢幾時爆, 而係走呀

睇淡不做淡, 保持兩三成現金, 繼續做收買佬...

暴風前夕

暴風前夕, 天氣悶熱, 空氣靜止

清空了一堆垃圾遊戲倉位, 慢慢靜待暴風洗禮

最終想買的, 還是我大移動, 沒有之一

老火雞, 又係你出場之時

淨現金股傳奇之591

最新發現一隻傳奇淨現金股中國精密591, 停牌11 年復牌

最搞笑係佢渣住14億淨現金, 市值2億, 十幾年前上市CAP 水最高炒到7 蚊

停牌原因都係匪而所思, 話其中一間子公司 (福洲XX...姓福的比較易停) 因為涉及生產國家機密產品唔可以透露, 當時的核數師畢馬威對唔到條數, 591 又解釋唔到, 所以要保留意見停牌

之後搞左十年, 換左間天健, 搞笑在呢十年天健博老命咁証明591無問題, 到2022 年6月復牌前突然唔做, 轉左比一間叫咩國浩的核數師, 終於用說服証監比佢復牌

但奇在完全睇唔出佢呢十年究竟提供左D 咩, 亦唔知最後証監點解比佢復牌? 就算佢唔可以提供敏感產品資料, 都無理由條數都對唔上架, 香港大拿把國家機密公司啦,  唔見佢地停牌?

出於對佢帳上14億的尊重, 0.255買左十萬股, respect.

btw 原本我想講淨現金股的好處, 例如手上的亞太衛星 (18億)同中海化學 (80億), 點知591 一野証偽左淨現金股, 唯有加個條件, 淨現金國企股囉