2025 年結

2025 過得特別快, 彷彿仲記得2024年結 比位匿名大佬話我全部都係負回報, 哈哈

寫blog 10 年了, 睇番以前寫D 野, 真係好on J

就算係睇番2年前, 我都覺得當時的想法好幼稚, 唔知當時自己點會咁諗, 更唔好講再遠D

由以前覺得長和系香港地產股是寶, 到跟風炒TMT, 炒內房, 炒電力, 回歸941 762 883 收息捱過港股最暗時期, 然後捱到今年大牛市, 幸運地豬中妖才, 德林, 周生生, 黃金, 同埋最9 勁的哈電, 東電

反思自己都係無乜成長, 全部牛股都係撞手神, 核心思想, 都係想收息1 球

黎黎去去, 由想買REITS, 買1883, 買941, 買十厘細股, 到而家買215 315, 我都算堅持了自己的路?

但搞笑的是, 我呢十年賺的大部分錢, 都唔係靠收息, 係靠炒賣, 哈哈

最後悟到的是...你有番咁上下本金, 先好講滾雪球, 呢個係現實

衰D 講, 渣住幾廿萬收息, 比你收十厘好未, 幾皮野, 滾個屁咩....

投資無乜長進, 但思想上對財自都有左另一個認知, 雖然遠未達到, 但心態上有準備, 比沒準備好

咁就十年了, 慶幸有一班非常好的股友, 陪住我渡過港股黑暗時期, 到高光時刻

如果得我自己一個, 應該仲係度吊緊長和長實領展點解減派息

下年無乜展望啦, 每年展望都豬唔中的, 2026保住今年的利潤已好開心, 唔好有咩意外

善戰者無赫赫之功

2020  +21%

2021  +19%

2022  +11%

2023  +22%

2024  +25%

2025  +65%

人生最牛股: 哈電

2025 準備埋單了, 暫時條數都係靚仔的, 原本好Happy

順手又睇下如果一股唔賣哈電, 渣到今日17 蚊, 條數又點呢?

一計即時Cry Baby

不過, 人生邊有如果呢, 我認知只配食到哈電8-10 蚊, 無計

而家得番2 萬股, 留番個紀念吧, 不要想太多了

只係, 人生真係無幾可扑中一隻超級牛股, 仲要重倉, 可惜只食到魚頭

或者真係愛過已經夠了

無憾了吧~一起燒過煙花~~

增持中關村

中關村大股東場外增持5%, 都無反應, 含淚加十萬股吧

海通恒信加到出血了, 唔可以再加啦, 等市場証明我是對是錯吧

另外沽出baba, pdd, 一堆立立雜雜股

明年都係抱殘守缺算了, 一浪就出事, 多手呀

12月開局

好快又12月, 暫時開局因為215 一反常態地升, 收益不錯

1.2, 都係雞肋, 賣左, 又唔知買咩, 都仲有6.25厘, 有咩好選擇? 似乎沒有, 或者跌穿6厘再諗吧?

215 而家開左個頭, 事有Q K, 如果唔賭落去, 真係有點對不起自己呢個長期老股東

另外, 頭先計一計, 今年單隻獲利最多的肯定係1133, 應該係投資生涯之最

但如果我年頭一直持有呢一刻先放, 可以比今年暫時的全年總收益賺多3成...

而家沽淨2 萬股, 唔打算放了, 忍唔住獲利的衝動, 無計, 不過已好感恩啦

最新DRAM 爆升, 第一受害的肯定係賣硬件的, 第二受害的應該係無法轉嫁下游, 而又要狂買硬件的, 講緊係三大國內電信商, 特別係雲佔比高的

941 雲佔比唔高, 所以我仲渣住, 但應該唔會大搞了, 始終財務一直慢性中毒, 加上DRAM, 而家渣住的收收息算了

最新煩緊賣唔賣自住, 層樓已30 年, 加上香港最新單新聞, 真係好唔想經歷一次外牆維修, 就算無事, 生活質素肯定大降, 變左又要出去租屋, 硬食2 年租, 分分鐘貴過夾哥舊錢

睇下澳門派糖可否推高樓價, 好價就賣左佢, 轉做租租算, 最緊要有被動收入, 老左係大陸買間屋, 或者入安老院, 或者住澳門長者公寓, 似乎都好多選擇

不過賣樓轉租, 唔係我一個決定, 心理關口不少, 有咩好idea? 有諗過丟空間屋一年, 出去租下體驗下, 先再決定, 歡迎各位比下意見 :)

萬劍歸宗失敗

215 呢幾日有古怪, 可惜剔出指數之日用唔到萬劍歸宗, 連掛1.04 1.03 1.02 三注都失敗

今年大牛市, 明年難玩了, 大家都鎖盈了我就早早轉入固定收益股算了

一個屈尾十, 明年收息股可能成為香呠呠? 

下年主線, 收息+黃金

剛睇番原來中石油就黎9 蚊, 真係瘋狂, 內銀等一眾收息股已爆升了,落後的, 仲有什麼? 

明年可以保持收益吃吃息就不錯了, 每年10%增長, 滿足了

香港大火

今日時今日, 真係估唔香港仲會發生咁嚴重的災難

就係大家2025 牛市GOGOGO的時候, 年尾發生單咁的事

意外同明天, 真係永遠唔知邊個會先到

珍惜當下, 及時行樂

錢財身外物, 老生常談, 多少人真正可以看破凡塵的種種伽鎖?

身痕

今日又入番2隻妖仔

南方通信 @ 0.108, 英皇資本0.104

暫時都食過翻尋味 又每隻買幾皮睇下會唔會嘔突

另外加番少少亞太資源, 可惜唔知之前大跌仲未除淨, 6.7 厘金股, 全市獨家

另外小注兩隻科技股: pdd 同baba, 之前全清了, 無TMT 係手, 買番少少

PDD 已經4000 億現金, 痴孖根, 只要佢唔係造假, 買少少放係度唔會有問題, 造錢能力太強

BABA, 唔知佢搞咩, 燒錢搞AI, 市場好似好buy, 東方谷谷, 買少少當妖股玩

暫時仲有一成現金, 

11 月就要完了, 今日埋單, 微量正數, 全靠215, 希望捱到12月都可以正數, 今年完美收爐

再談和記

和記被剔出指數, 我原本準備左一舊錢接貨, 分別掛了1.04 1.03 1.02

點知尾盤一下2800 萬沽盤比人一下食左, 我連車尾燈都見唔到.......

尋日仲升多3%, 毛估指數沽盤盡出, 有人掃貨? 係咪春江鴨? 

無諗咁多, 市場硬收7厘的股又少一隻, 當8 仔, 315, 6823 都被資金追捧, 215 去番6 厘都唔過份

659 公眾持股恢復水平, 好事, 但應該8.95 盡沽, 7.5 再買番, 唔洗等佢12月尾出哥堆紅股同息

如果659 係誠哥的, 我一早炸幾球落去唔洗煩, 但鄭家.......都係冷靜點好

市場上合格的重倉收息股已無幾, 517 不錯, 其他的勝獅, 海通恒信, 應該都有9厘10厘

仲有咩? 823 又被蟲哥搞死了, REITS 都升到得7 厘, 求其租金滑多2 棍就6厘5厘

而家個倉極側重電訊股, 應該話係215, 已買到4 成, 1 成315, 941+008 1成

我都好想分散, 但強現金流, 淨現金, 保証派息的股, 暫時似乎無可取替

天下無不散之筵席

見到偉哥封筆, 真係有點唏噓, 見到佢以天下無不散之筵席為題, 更唏噓

係呢個近十年最牛的牛市結束, 真係一件幾特別的事

同樣我都係身體問題, 年紀大了, 今年係爽, 但同樣今年大部分時間都係炒股炒股炒股

曾經至少兩次因為回撤, 心緒不寧, 仲要只係回撤10 % 左右

雖然呢兩日又來個回撤, 但只係年度最高點回撤, 仲頂得住

坦白講, 我仲可以留係股市, 好大程度係因為215 仲有7 厘, 仲可以比我泊住最大倉位

他朝有一日, 215 無7 厘, 可能係爆升, 可能係出千減派, 我的投資生涯就會完結

215 應該會係我投資最後一根稻草

希望呢根稻草係一根好的稻草

11月24日 215 被剔出指數, 應該係我最後用萬劍歸宗的機會

人生每階段

0-20 歲 - 博老命讀書, 入好小學好中學好大學

20-30 歲 - 博老命入好公司, 博升職

30-40歲 - 博老命搞錢, 搞投資

40-50歲 - 博老命搞健康, 為下半場準備

50歲- ?? - 博老命Happy

首三階段算做得不過不失, 可惜身體真係太差, 成日病, 希望未來十年專注健康吧

全金屬狂潮

以前睇過一套動畫, 叫全金屬狂潮, 講咩已唔記得, 但覺得形容今次金屬狂潮好貼切

具體其實係黃金, 白銀, 銅, 以黃金為首, 一年升5成,  5年升1 倍, 其實又唔算好誇張

而且今次爆升唔係無原因, 實打實各國央行瘋狂入貨, 美元體系出現危機

咁升一倍到4000 係咪泡沫? 其實咩叫泡沫? 名不符實就叫泡沫, 咁而家金價係咪名不符實? 我又唔覺, 升到1 萬, 算唔算泡沫? 

BTC 由1000 升到10 萬, 算唔算泡沫? 納指升足幾年, 算唔算泡沫?

BTW 趁今次回調, 都係買番少少金股, 以免踏空呢個可能百年一遇的盛宴

萬一估錯? 真係泡沫? 認錯囉, 無野架, 倉位決定風險

首選紫金, 次選靈寶, 亞太, 買番5% 倉位,  以免被人笑, 周一再跌再買吧

運氣佔人生很大部分

之前睇過一個youtuber, 話人生成功同努力無咩關係, 我覺得唔可以話絕對無關係, 只能講唔係好大關係, 佢將人生遇到的好事比喻做綠色波, 壞事比論做紅色波, 只要你人生不斷遇到綠色波, 好似武俠小說主角咁, 幾廿個奇遇, 你點廢都有個譜

相反如果你經常遇到紅色波, 任你點努力, 點小心, 你避到幾多? 身邊全是壞人, 你真係避得幾多個

投資都係一樣, 今年能大賺, 係運氣, 其實無咩技俩, 守正出奇, 感恩自己因運氣食到呢波紅利, 但亦明白係不可持續的, 可能一生就係一波, 天時地利人和, 你有足夠本金, 係低位足夠耐, 買得足夠多, 你先食到呢水, 否則都係飲下湯汁

呢兩日現金提升到3 成幾, 加埋215 315 941 佔我倉六七成了, 其實其他股淨低無多

就咁樣過埋2025 淨低的兩個半月吧, 滿足了

萬劍歸宗

今日可能要使出萬劍歸宗了

只能用一次

希望唔會好似無名咁用完功力盡失 :P

週一大跌計劃

倉入面本身主力都係電訊股同國企, 最危的應該係直接同關稅有關的

但加加埋都係佔個倉唔到10%, 呢堆野我應該不問價清了

當然周一應該無機會少跌了, 今次應該仲喪過上次, 因為大家都有一大堆浮盈, 加埋槓桿

極可能螺絲式下殺, 唔知死成點, 有上次4月經驗, 加埋呢幾個月都算利潤OK, 今次心裏無上次咁驚, 最多未硬食

另外最凶險的應該係我浮盈最多的股, 1133 , 116, 亞太資源呢三隻, 佔我倉位都12%, 由於累積大量浮盈, 跌上黎影響我個倉都幾甘, 不過又唔打算賤賣了, 特別係116

唯一可惜係現金水平太底了, 得10%, 之前賣出持股時因為換入番一堆老登股, 又要硬接了

今年保得住50% 的ytd 嗎? 希望希望

有人問我, 點解知道一定會調整, 都唔提早賣股

我答案係, 回撤都係投資的一部份, 只要賺錢的amount 長期大過輸錢, 咁呢個音樂椅就可以繼續了

我由6 月開始話要閃人飛升, 但6月至9 月, 個倉又升多左20%, 就算10 月死番10%, 不枉愛過一場了

登是越老越辣

股市越升, 個人越驚, 無膽就係咁, 哈

慢慢買回國內人講的老登股, 其實未即係我以前講的廢老股囉, 

人棄我取啦, 越老越正, 年青人唔會明, 一試難忘

賣出青啤, 火電, 潤電, 減1133

買入 762, 2560, 2386, 2388

1.07 加215, 4.63 加315, 83 加941 

好彩倉入面仲有最後一隻金股, 亞太資源, 享受埋呢次升幅, 應該要同黃金說再見了

估唔到, 金股2個月升多5 成, 賣飛紀錄一下子增加多幾隻, 唉

7月，8月，9月

2025話咁快又去咗一大半

七月八月九月，的確係非常之令人激動人心

應該算係我生命入邊最特別的3個月

如果有一隻股，10年前你$5買入，突然三個月之內升到$15，但係你冇買出，最後跌返去$5，你會如何？

嗰種永遠希望佢升返$15的心情，應該係最煎熬

你都明白個$15係冇辦法再去得返

但係叫你$5賣出去，你又會不甘心

又有幾多人可以克服人性呢？

股場，不愧是人性的修羅道。

世上最易賭的股

世上最易賭的股, 就係賭佢可以繼續派高息的股

以前的008, 6823, 315, 517, 今日的659, 1905

呢個係最簡單的賭博, 只要佢可以KEEP 到派息, 現價就係低估

以前呢一招基本全部都有效, 只要派到, 就算唔升, 只要長渣一定必勝

659 現價除淨再分紅股後7蚊, 我只要再賭佢派到0.65, 已經九厘半

1905 只要賭佢KEEP 到派0.08 以上, 已經十厘

每賭中一年, 成本更低, 只要賭中兩三年, 基本無可能再輸了

當然唔係隻隻work, 但只要正正常常的股, 通常唔會賭輸

新創建業績

KEEP 到末期息0.35, 加埋十送一, 會唔會行恒基的舊路?

講到明係要維持番公眾持股, 當下年繼續0.65, 即係股息增加10%

///////本集團致力實現可持續及漸進的股息政策，旨在每年穩步提高或至少維持普通股息的港元價值。

無講係咪維持"每股"普通股息的港元價值, 所以都仲未知會唔會攤薄....當住唔會先囉

金融越黎越勁, 希望食到香港重新發展金融條水啦, 做埋財富管理

暫時正路, 繼續觀察鄭家二公子有無古惑, 每年只需維持0.65, 其他唔洗睇

暴風式吸入新創建

暫時持有12 萬股 659 @7.77, 看下9月24 可否係鄭家虎口奪食?

創仔, 會否願意陪我做今年最後一戰? 

大撤退

由年中6月開始, 我已經開始計劃大撤退, 點知到9月個市繼續升, 個倉亦都水漲船高

如果6回報已經係超預期, 咁9月係超超超超預期了, 係咪應該執行大撤退計劃?

但執行大撤退計劃, 必須要明白副作用唔係淨係賺唔到魚尾咁簡單

如果恒指KEEP 住3 萬點橫行2 年, 你就要空倉兩年, 橫行5 年 你就要空倉五年

最後必定會有一個位, 你忍唔住高追, 然後牛轉熊被悶殺

所以大撤退計劃不能亂來的, 係整個投資計劃的最後一步

唔好講大撤退, 萬劍歸宗番去215 315 941 收息, 都一樣有風險

或者世上本來無一勞永逸的投資方法, 除非真係熄機唔睇, 但身邊總有幾個人會同你講今日恒指又升左三千點, blablabla

而家個市係咪好瘋狂呢? 講真我都唔識衡量, 好似係, 又好似未係

估錯頂, 比估錯底更凶險100 倍, 2007 估錯頂, 係以十年為單位先回到家鄉

新創建, 又見新創建

市場上穩陣收息股無多了, 215 315 7厘, 941 6厘仲要交10% 稅, 淨番比較大隻加有派息保証的本地股, 應該只有8厘的659, 只係之前因為鄭家, 之前一直唔敢大注, 而家係時候買多少少了

萬一明哥遵守漸進派息承諾呢? 雖然鄭家有少少保留, 但8厘4加派息保証, 買少見少了

剛仔收皮後, 明哥而家就係鄭家的鉅頭, 加上659 又勁似長建, 你都唔好話唔橋

另外最新659 幾個操作, 都唔錯, 例如續回4厘債券換2 厘可換債, 買金融公司, 同埋出黎澄清同新世界無關, 用可換債同特別息增加流通量, 都係正面的, 另外傳暫停出售公路, 哥度都值百幾億, 你話吹風又好咩都好, 只要鄭家同明哥不出問題, 就不會出問題, 加上也算是美國減息受惠股, 值博率還是不錯的

數碼通業績

無驚無喜. 又派0.32, 現價6.9 厘, 最勁係現金由上年15 億增到20 億, 傻的嗎? 有息負債6千萬, 就黎追上215 的36 億淨現金

真係唔知215 用晒食奶的力加36 億4 厘定期先KEEP 到 每年0.0749 派息, 315 每年派0.32 仲可以增長5 億cash? 不是一年了, 由5 億到10 億, 10 億到15 億, 每年加5 億, 真係唔知點做到

不過要套息始終係215 的固定0.0749 好, 但315 新鴻基比較厚道, 所以, 都要買, 哈哈

215, 315, 941 牛市最後萬劍歸宗的好地方, 三隻股唔覺唔覺已買到35%倉位, 加20% 現金, 下半年注定要錯過大牛市了, 無計, 貪生怕死係我強項

===============================

開市沽清所有黃金, 靈寶, 紫金, 少量蒙煤, 夠了~慢慢繼續買315 215

215又多一個誘因

 《彭博資訊》報導，長和實業正評估旗下全球電訊資產的多項部署方案，其中在香港進行分拆上市被認為是最具吸引力的選項之一。長和已跟花旗和高盛兩家國際知名投行展開初步討論，探討潛在上市事宜。市場普遍預估，長和電訊業務估值可達 100 億至 150 億英鎊，折合約為 1050 至 1579 億港元。

215 原本的事件因素之前已講過, 一是私有化, 一是賣盤, 一是派特別息

今年三四月開始已吹緊001 分拆期下電訊上市, 我一開始覺得佢最多搞歐洲3, 對215 影響不大, 但最新的風開始吹到215, 有可能分拆會包埋215 的港澳電訊業務

001 由於港口賣出受阻, 選擇加速分拆其他資產都算合理, 但會唔會真係燒埋215 ? Well. 對於歐洲3, 先有賣塔套現, 然後英國3 合併, 再搞分拆可以加速資產回報, 如果市值1000 億以上, 咁215 的50 億市值真係對001 或新公司佔比太少了, 而且001 持66% 215, 其他由李家代持, 只能說算是個bonus 吧, 也比沒有強, 好似賣港口咁, 突然殺出來, 無人知幾時, 215 又多個事件因素, 外加6.8 厘收住等運到, 實在係非常適合牛3 撤退之用。

仆街美團

因為美團屎一樣的業績, 嚇到我業績前減左三分二BABA, 我真係想死

但講到尾, 都係自己無信心, 無話可說

否則, 今年就完美了, 竟然食唔到BABA 呢波, 由一月買到而家, 都係運吉

淨番三分一, 升但不香了, 唉

講到尾, 認知和財富不匹配的結果

無咩我都係番去215 315 941 先了

心已倦了...淚也乾了.....這一份深情....難捨難了.....

瘋狂業績期

瘋狂業績期終於過去, 最大倉位幾隻, 215, 941, 315 (9月先出), 都係保持寵肉不驚, 岩架啦, 我就係要呢D 做主倉, 最好出左業績我都唔知

最驚喜係 1133, 靈寶, 517, 116

今個月係116 加持下, 組合新高, 越來越想收爐, 但搵唔到收爐妙品呀

最下流係美團, 連帶巴巴都崩埋, 我已全清美團, 大減巴巴, 少減700, 不想再擔驚受怕了

另外下流的係海狗1919, 硬食了, 基建三傻都出了, 基本也是全滅, 星期一又要輸錢, 嗚

投機的373, 海螺材料, 880 都好彩走得快, 不過880 今日又買番, 來回差左13%, 小注

今日南方通信0.156 走了, 可惜呀~太垃圾中報真係, 應該0.17 走的, 不過算了都係投機

中關租, 海通恒信, 不過不失啦, 繼續收下息

另外加左新創建659, 賭鄭家仲有一C 良心, 保持漸進派息

現金係尋日瘋狂減持下, 升至2 成了, 老了, 唔想擔驚受怕

下半年如果係牛3, 我甘願跑輸大市, 因為前8 個月已經超晒預期了, 多謝上天賞飯吃, 今年比我再執多10% 就可以了 :)

黎緊如果大回調, 我都只會加廢物收息股, 留定子彈

老朋友鷹君

之前已沽清的鷹君, 今早買回, 原因係中期息加, 而且派1270

派1270 呢個真係無諗到, 唔私有化, 仲要派走, 唔錯呀

保底6厘+ 1270, 當佢1 派1 , 都多0.5

雪球好多人FF 盡派70% 1270, 一派3, 我想講真係諗太多

//完成實物分派後， LHI 將繼續為本公司之附屬公司。//

羅家未去到要完全放棄1270 的地步, 我估最多派到41 唔洗并表, 負債可以靚番, 咁向銀行借錢都會易D, 點都好, 而家個市收息買少見少, 41 下半年朗賢峰入帳仲可以再博下有無特息, 進可攻退可守

但你想係羅家身上拎著數, 就唔係咁易了, 1270 吹私有化再取消, 坑唔少人

所以如果為左派1270 買的, 我建議可以唔洗買

我又諗到一樣野, 41 派1270 , 1270 股價一定受壓, 然後羅家再自己私有化1270?呵呵

兩隻被市場忽略的金融股 + 自住樓廢UP

沽出1883, 減持海螺材料

加注兩隻被市場忽略的金融股

海通恒信, 中關租科技

越升越重危機感, 但想減又無咩好減, 手上一堆電訊, 周生生, TMT, 火電, 海油平安海控, 新創健, 西泥亞泥, 哈電

有咩可以減呢? 全部都仲係好平呀, 難度我屁股決定左腦袋? 哈

妖股南方通信, 真係妖, 升左五成了, 但睇下長飛, 都係繼續渣算, 8 皮野, 可能係下一隻爆升股呢

============================

最近收益的確不錯, 但澳門樓繼續跌, 我自住樓按買入價已跌了兩球, 都未計裝修

一計埋呢個, 股票收益即時不香了, 真係諗下自問投資收益都算係咁, 都要被自住樓隊一刀

如果普羅大眾, 用盡全力上車, 個兜一蚊都無, 再被樓市插一棍, 真係一世都唔洗翻身

係呀成日話計岩數就GO, 背後的opportunity cost, 可能係牛市無得放大財富, 每月供三四皮, 供到呀, 不過唔洗諗儲錢囉, 生活到呀, 不過月月清囉

其實借錢買樓仲有一個誤區, 就係供三十年的利息, 好多人係忽略的, 但呢個同你買股分紅複利效應一樣的, 借錢買樓, 係反複利效應, 你利息埋單係間屋原樓價的幾成, 如果你玩開股息, 你就會明白條數係非常甘的, 絕不是每月攤開幾千可以唔計

自住樓, 絕對唔係大家諗咁樣, 自己住唔洗理盲眼入, 犠牲的可能係兩至三代人的上流機會, 非常險

周生生

買周生生係因為持有15 億388 , 同埋見590 業績不錯, 誤打誤撞有少少運仔

有人話盈喜因為黃金大升值, 呢個真係要睇中報先知, 如果收入跟得上, 就有運行

相反如果真係一次性黃金大升值, 咁可能12-13 蚊左右已到頭了

但今波係無計入388 升值5 億的, 因為388 係自用, 唔計入投資收益

btw 牛市莫估頂, 德昌, 德林, 妖才, 錯過太多了, 116 長渣到牛3 吧, 反正8.4成本已不敗之地

另外之前買的妖股南方通信, 出左盈喜, 一開市先升5%? 唯有忍痛加倉, 之後爆升3 成

不過始終妖股, 只敢買幾皮野, 娛樂娛樂

低估的股越來越少了, 941 都要90 了, 等佢去到100 結嬰吧

淨低未升的恒指成份股, 應該係牛3 拉指數的主軸, 科技股死淨美團, 都係時候搞多點了

今年實在有趣有趣, 有十年磨一劍的感覺, 好彩前幾年熊市都累積到本金, 呢個係關鍵

只係今波之後, 暫時未諗到如何是好, 全退嗎? well...

世上最安心的公司2: 和記

和記無特息, 其實預左, 因為派左佢好大機會維持唔到每年0.0749 固定派息, 雖然定期錢少左都仲有半年4000 萬呀, 我估到真係定期得番2 厘先會派出黎

和記比中移動仲簡單, 

1, 有無特別息

2, 現金有無少

中報現金37 億幾, 多左幾千萬, Good job.

現價6.7厘, 唔知其他人滿唔滿意, 如果星期一跌番去7 厘我就加注, 最後應該係靠215 重倉飛升, 符合我唔做功課的懶散性格

315 都好強, 睇黎市場開始消滅高息股, 唔係單純賭特息的

215 不知不覺佔我倉19%了, 不能再買了, 除非好抵買

世上最安心的公司: 中移動

中移動老戰友, 業績真係穩到你就算all in 都唔洗驚的地步

我直頭都唔記得原來7/8係中移動業績...哈

業績只要睇派息同利潤, 只要都有增長, 基本已可以close file

當然每年業績都總會有人噴, 又話ARPU 降, 又話靠折舊, 又話星鏈, 又話世界已死

Well, 我真係只能講, 信者恒信, 不信者恒不信, 

係我心中 100 前的中移絕對係老散恩物, 沒有之一

就算去到而家86, 稅前都成六厘, 有心D 提埋實物仲唔洗扣稅, 不過我懶

最近慢慢買番, 86 成本, 收集左8000 股, 如果唔升又繼續收集, 100 之前都唔洗點理

941 仲有一個利好, 就係保險要買紅利股, 而家內銀都7厘, 941 仲有6厘, 你會點選? 

用941 883 去參與牛市下半場, 應該無死錯人

學Blog 友Joseph 兄講: 善戰者無赫赫之功

非常認同Joseph 兄講, 投資真係一個認清自己的過程

每個人要找的投資之道, 唔係技術流 唔係價值流, 應該係"我流"

你必須要係一次又一次的投資中總結經驗, 找出可以長久走下去的"我流"

一定要總結出適合自己的投資方法, 否則你的倉位只係賭桌上的籌碼

2025 上半年有運氣加持, 下半年守住便好了

股海浮沉, 記住一句: 只要不輸, 就一定能勝

版塊輪動

今日升勢好平均. 基本就係消滅高息股為主,  全部以前買開的9厘十厘股得番6 厘, 太瘋狂

金飾, 地產, 博彩, 港銀, 基本估值中等的都已開始爆起

之前低吸了大量周生生等運到, 希望上番10 蚊先

地產一直係我最鐘意的板塊, 反而無係呢波賺到大錢, 可惜, 連REITS 我都渣唔住

聽日第一大倉215 開彩, 雖然明知無特息, 希望保得住1.1, 仲有6.8 厘架, 唔買都黎睇下

883 941 繼續熄火, 估計要到牛三後期先升了, 不急不急 

牛市下半場: 含忍

2025 上半年收益我已經好滿意, 雖然呢半年求其篤一隻大藍籌都升四五成

下半場進入守財MODE 了, 如何在調整中不被洗走, 倉位控制的藝術

牛三真的會到嗎? 大調整即將會到嗎? 平常心可能係下半場致勝的關鍵

減少追高, 減少抄底, 黎緊目標可能只係將升得多的搬去215 315 941 883 1919

勿忘收息老初心

望下我個頭像, 又諗起當時用呢張相係因為兩句佛偈

"夢中明明有六趣, 覺後空空無大千"

善哉~善哉~

買入火電

幾年前開始留意火電, 一直比高煤價困擾, 到煤跌都唔敢買

但係牛市, 唔洗諗咁多啦

華能華電大唐華潤, 各買十皮~ 

利哭中國的教訓

利哭中國之前0.91 私有化, 然後提價到0.98, 最後過唔到, 岩岩出埋刑警蝕500 萬

我已講過好多次, 私有化價格唔好用PB 做對比, 呢個係完全荒謬的做法

什麼價值11 蚊的資產用1 蚊私有化, 做底業績股價去私有化, 要投反對票抵制呢D 行為?

大哥, 請你搞清事實, 個遊戲本身就係容許大股東做D 咁的野, 要抵制應該扺制成個監管不作為

小劉係奸, 但佢係絕對可以咁做, 唔合情但合理, 吹咩? 自己當年用兩三蚊買左, 奶左野唔認輸, 然後嫌人地私有化太低反對, 輸多幾錢重, 真係以為買股票就係做股東咩, 唔好睇咁多巴菲特的書啦, 認清事實先係真理, 除非你好似賭神入面個呀叔咁, 大把錢, 明知輸都要睇你底牌, 開黎見我

暫時未見過任何一隻民企, 私有化失敗後大股東頓悟成佛努力上進為小股東創造回報

國企就有, 未1133 囉, 4.56 私有化失敗, 而家7個幾

///母公司哈爾濱電氣集團，2019 年12月底提出私有化建議，每股作價為4.56元，較停牌前收市價有約82.4%溢價。///

嚴重懷疑教人睇PB 的, 一係無知,  一係老千, 市場價格只有一面就係正確的一面

我個人認為PB 係所有股票指標入面最無用的野, 最誤導新手, PB 計算方法跟本係千變幻化

BTW 當年係利哭都賺過廿皮, 對佢沒有恨只有愛, 如果私有化前0.6 買入, 0.98 都執5成啦, 晒氣

股市真規則

牛市特別想廢UP, 今年的收益係咁多年最勁, 唔係因為我勁, 係因為...這是牛市呀 (老火雞mode)

過去五年恒指最高位係2021年2月的30173 點, 然後就開始跌, 最低點係2022年的10月28日的14863 點, 呢一浪你捱得住? OK, 然後反彈到2023年1月的22689點, 反彈左4成!

當你以為見到曙光? I am so sorry, 恒指再展開新一輸跌浪, 到2024年1月的15300點, 跌左3成幾!

然後就係咁chor 上去, 升到萬9 , 又跌番萬7, 又升到22700, 又跌番去19000, 都捱得住?

最後一劫係2025年的4月11, 老美關稅, 呢一劫真係難搞

然後先有5,6,7月的大爆升

上面咁多個劫, 只要有一個位你放棄左唔再玩, 就沒有以後了

所以所謂的股市真規則, 就係你一定要有足夠長命捱到牛市, 然後全倉, that's it.

而點樣先可以捱到牛市, 只有四個字, 就係貪生怕死, 股市從來都係鬥長命的地方, 只要你足夠長命, 就一定會遇到牛市, 正如只要你人生夠長壽, 遲早都會遇到好事, 所以唔好信奉一年幾倍十年幾十倍的都市傳說

耐得住寂寞, 股市點都會獎勵你的, 希望今次蒼天可以獎勵所有仲參與股市的弟兄吧

準備萬劍歸宗

小型高息股升到變中息股, 沽清京投, 優360, 朝聚眼科,  龍資源

龍資源真係太爽, 每次買幾萬都可以執一兩萬, 反覆閹割, 太開心

再沽20000 1133 @ 7.9 , 留番D 現金準備回調時用萬劍歸宗

"調整快要來了" ~已經由5月講到7月, 到底幾時黎? 當全世界覺得要調整, 係咪就唔會調整?

最後萬劍歸宗到底射在何方? 都仲未有定案

TMT? 700 超強, 9988 120 又不是咁值博, JD? 美團? 又好似不太確定

博彩股? 澳博好似不錯, 但我作為馬交人, 竟然從未係博彩股身上成功賺過錢, 要來一舖嗎?

黃金? 靈寶應該今日無機會再加了, 應該一早買多D...

還是直接 215 315 941 收爐飛升? 呢個選擇好吸引, 特別在東方神起 1133 雞電爆升後今年目標已超額完成, 但215 315 得番6.9厘, 941 5.8 厘仲要10%稅, 008 唔洗講, 痴線6.5 厘

215 315 如果有7.5 厘, 收100 萬息要1333.333萬本金, 而家本金升左, 但同時215 315 都升左, 變咗 6.9厘如果收足100 萬, 要有1450 萬本金....好似以前樓價咁你一路存首期樓價一路升...而且基本你有千五萬都唔會all in 落一兩隻股, 變左要更多本金....可能要2000 萬....well....

繼續踏實向目標進發吧, 知足常樂Bro.

=====================

均價10.7 買入16000 股靈寶, 另外抽中100 股9887, 非常開心, 唔打算賣了, 做吉祥物

TMT - 我來啦

來了, 感覺來了, 師兄師弟們, 全部番晒黎啦

唔好問, 問就是買

大力加注京東美團, BABA 700 原本有不少了

呢一波TMT, 應該來了

基建三傻接力

牛市就係模糊的正確, 炒完水電炒水泥, 肯定炒埋基建, 基建三傻對比起上年9月已跌回原型, 平均3PE, 5厘, 雖然盤數依然咁垃圾, 但輸的機會, 係零呀!!! 講笑je, 贏面大咁解, 炒番去上年9月高位先啦, 又話牛市, 挑

中國隆胸無啦啦又30CM, 1133 今日可以上9? 慢慢減..唔洗急...切忌貪勝不知輸

升股不升指數的日子, 實在太好了, 繼續舞~~

0.94 追入日本城, come on baby

牛市三要素: 倉位, 倉位, 倉位

話說短短三個月, 手上賣飛左今年三隻牛市主力

妖才: 2.5 入, 6 蚊走, 7 蚊再入, 11 蚊走, 而家16

德林: 5.5 入, 11 走, 而家15

德昌: 10 蚊入, 16 走, 而家23

雖然有賺已經好感恩, 但真係未試過一次過賣飛咁多牛手股, 而似乎賣飛的數目仲係度不斷增加.....

今日應該又要炒清潔三件套, 之前減持的1133同東方神起, 今日睇黎又要爆升, 好彩減得唔多, 唉, 審慎審慎呀

又再次證明我賣出爆牛股的時機真係勁差

不過比起牛市賣飛牛股,  太早減倉落車好似仲大獲, 要諗長遠D, 如果2幻八至3 幻點沽清, 可能的確一炮過賺到過去五年熊市的錢, 但如果港股重回正常, 其實應該係28000 - 35000 之間浮沉? 咁你渣住一大lot 現金係戶口, 你有咩春搞呢? 一有錢就身痕, 每天都有爆升股, 忍唔住肯定又走去高追, 或者搞呢搞路, 好似仲衰過一路持股...係咪真係甘心渣住舊錢係銀行做定期收幾廿萬一年先

可能太習慣過去四年熊市打法, 一早唔記得牛市點做, 大佬唔好怪我呀, 投資咁多年, 大部分都係港股熊市, 就好似出生係非洲的小朋友, 只係識點樣求生存, 比你去到美國都係改變唔到呀, 嗚

果然牛市賺錢真係只需要有倉位, 唔太需要有投資實力, 猴子飛標, 當然選股都係好重要, 但識選股就唔係老散啦, 變左倉位應該係牛市更重要, 100 萬倉位同1000 萬倉位, 你選股點叻都好難追到淨資金回報差距, 唔係話要上爆槓桿, 但點樣可以增大本金, 先係投資第一要素

非常同意一位帶我入門前輩講: "500 萬倉位以下, 唔好講咩回報率啦...直接講淨賺幾錢仲實際"

題外話估唔到迪生咁都私有化失敗, 應該係比人搞架啦, 私有化真係不能亂賭

================================

痴線, 30 平均全沽1072, 7.3 全入1133, 可能又賣飛一隻牛股? 太喪啦.....

7.7 均價沽出1/3 1133, 買入周生生, 基建三傻, 西泥, 亞泥, 海螺材料

另外之前沽清941 5.1 換入的008, 而家5.7 沽清換回941, 爽呀~~

最後終局之戰, 可能係215, 941, 或者加少少315

美金 X 黃金 X 大餅

倉底個垃圾虛幣倉, 呢一年由3 皮野爆升番去10 皮野, 真係估唔到可以去番六位數, 繼續係度煲醋, 廿皮先考慮拎少少出黎淘寶

其實老美搞關稅, 單眼佬都知會搞死美元, 其實唔洗分析咁多, 未來大機會係黃金同大餅的天下

呢兩日趁回調加注紫金陳 @ 20.25 , 買回靈寶 @ 9.5 同龍資源@ 3.15, 長遠如果住金會繼續升, 靈寶第一季已2.5 億, 半年起碼5 億(除非減值), 加埋入通預期, 係全港A 最平的金股, 龍屎源就純粹食左幾次番尋味, 睇下可否繼續不敗傳說

每日都想減倉, 但每隻股都好似仲係唔算貴, 回調機會似乎越黎越高, 是否等到回調發生再減? 還是硬抗? 還是食左糊先? 

that is a question

巴菲特最有用的說話

知我的兄弟, 都知我一向對巴菲特金句無乜好印象, 因為都係阿媽係女人的話

1. 人生只打十個孔買公司 --> 大佬你自己都買幾百間公司啦

2. 永遠不要輸錢 --> 我都想呀

3. 不買搞不清的公司 / 複雜的公司 --> 咁應該無公司可以買

4. 只在擊球區擊球 --> 咁咩係擊球區?

5. 可以選跳一米, 不要跳十米 --> 呢個還好, 投資就係make it simple

6. 價值投資 / buy and hold --> 最大陷阱, what the hell is 價值?

但係, 今日竟然比我找到一句對我終生受用的說話, 唔止投資, 係做人哲學都要如此:

==>永遠不要用你不需要的東西, 去賭你不能失去的東西

OMG~炒股廿年, 終於得到左真諦, 講的就係值博率, 什麼時候能賭, 什麼時候不能賭

你未有100 萬時, 100 萬比50萬重要, 值得賭, 你有一億,  一億比兩億重要, 不值得賭

人生也是如此, 做事的時候, 問下風險和回報哪個對你影響更大, 就知應唔應該做

中關村科技租賃

網上搵到的資料極少, 分析極少, 新聞極少, 係透過AK 哥介紹才知的

之前0.7- 0.8 買左諗住放埋一邊收下息, 咁岩遇著租賃類爆發, 除左淨都仲有0.9 以上

跟住見佢突然話改派息金額, 二話不說全清轉中銀飛租, 再搞清楚原來因為內資股高價增持2.81 億股. 所以攤薄左派息, 唔係出千, 於是最新0.85 換回, 不小心做左個靚T。

//////

《經濟通通訊社7日專訊》中關村科技租賃(01601-HK)公布,調整去年度利潤分配方案之派發比例,預計派每股末期股息由7.1分(人民幣.下同)調整為5.9分,下調約16.9%,每股H股的末期股息金額由7.78港仙調整為6.46港仙。

　　該集團指,調整去年度利潤分配方案因完成約2.81億股新內資股認購事項,總股本從約13.33億股增加至16.15億股。根據派發總額9530萬元不變的原則,將調整去年度利潤分配方案中每股現金股利的分派金額。若總股本在實施權益分派的股權登記日,即下周三(16日)前發生變化,每股派發現金股利將以9530萬元的總金額進一步作相應調整。

///////

呢隻野真係唔知AK 哥點搵出黎, 又係奇股一隻, 2020 年1.5 定價上市, 之後一路潛水, 最癲去到0.5, 但其實派息有加無減, 由一開始0.052 去到最新0.079 (攤薄前), 仲要係央企

業務就唔洗分析太多, 睇完你都唔會明, 就係買斷某D "科技產品" 再反租番比企業收息, 盤數負債一定樣衰, 但好就好在最近內資竟然用RMB1.81元（1.98港元）增資五億比1601, 我係大股東二股東身上只睇到聖人兩個字, 溢價兩倍幾科水五億比公司玩, 係咩概念。

未來只要好好利用呢五億, 派息繼續增, 唔好爆雷, 當國銀, 飛租, 船租都升到得番五六厘, 呢隻都唔會差, 加埋"科技" 喎, 仲唔係牛市箭炮, 哈哈

暴風式吸入周生生

周生生今年淨係手上渣哥330 萬股388, 已經升值4 億, 都未計佢黃金升值哥浸, 雖然有對沖金價, 但對沖得無六福咁進取, 如果六福下半年都轉好, 周生生應該比六福更值博

比人搞後門

我隻215 最近比人搞, 呢幾日215擺脫織布機行情, 一野隊到上1.08, 打亂左我的換樓飛升大計

呢獲碌蕉了, 我無論係套利, 收息, 買樓租樓都係用215股息參照的

係我在前面用其他股奮勇殺敵的時候, 後門215 竟比人放火

估唔到港股已經墮落到呢個地步

下半年: 抱殘守缺

就黎業績期, 參考3 月, 估計有一堆股見光死, 加上老美唔知會唔會就咁罷休

尋日少量減持了一堆升得比較多的: 海運京能1883 1133, 008

沽清一堆投機: 動向 34 德翔 重電 南旋 德林

買入中銀飛租, 加少少9988 596

其餘的想在1.02 再加215, 唔知有無機會? 希望可以加到20%

買入債務垃圾

沽出86

買入少量1270, 1881, 富豪酒店, 九建

就賭一賭呢幾間債務垃圾9 月減息是否受惠

租金與樓價的關係

呢期開左澳門樓個頭, 忍唔住想豬up 多幾句, 特別係得到澳門樓大V 雲總的回覆, 獲益良多

https://normalhumanbill.blogspot.com/2025/07/2.html?sc=1751415834634#c6182759023604379582

如果將澳門的購買力分為上中下三產去睇, 再睇下澳門樓對應三產的供應同政府取態

下產: 大量經屋, 上一期已經唔滿額, 即係下產已被供應消化晒有突

上產: 大把錢, 香港樓回報高出幾班, 你幾時有見過澳門富豪長期住澳門? 九成住香港

中產: 就係我地呢班夾心層, 目標可能係600 - 1000 萬的三房樓, 市場最多供應

又再分為老中青三類人去睇:

老人: 一係番大灣區, 一係住政府的長者公寓(德政)

青年: 呀爸呀媽如果唔幫手, 唔洗諗, 個個送外賣渣電召的士, 叫我買樓?

中年: 又係呢班可憐人, 仔女大要換樓

綜合上面, 成個樓市基本上只有一班可憐的中年中產頂住(我)頂住, 加上政府目標仲要趕澳門人去橫琴住, 即係靠澳門人自己消化= 死得, 都未講新城A 區哥萬萬聲的供應會係未來三年堆出...

又講下租金同樓價, 升市時無人諗, 而家跌市當然要睇

租金從來都只係用黎等樓市升值時的吊命錢, 樓市最終要賺錢一定要賺升值的錢, 呢個一定要諗清楚因果, 其實買股都係一樣, 股息都只係等股價爆升的甜品, 好多大V 講收幾多幾多厘息, 無講的真相係, 爆升就賣啦仲等收息?

我買215 都係一樣, 收住7 厘等派彩, 我咁多年買股票賺的都係升值的錢, 941 係, 762 係, 德林, REITS 都係, 收的股息都不及賣出賺的錢的十分一

除非有幾億, 收息都一千幾百萬, 但到我有幾億, 可能又唔會咁諗

通常話如果有幾多幾多錢就收息躺平的, 都係無錢時幻想出黎的想法

半年結

本年暫時portfolio增長30 %, 但由於一出糧就科金落去, 你話係咪跑贏大市又真係話唔埋

不過本人從不追求跑贏大市, 我只要每年portfolio增長, 牛市升多D, 熊市升少D, 就已經達標了

暫時第一大倉依然係1133, 呢幾日跌左幾棍後佔15 %

第二係最近加番倉的 215 , 14%

然後就係一堆4-5% 的股, 京能 517, 700, BABA, etc

最後就一堆1-3% 的股, 有成三四十隻, 立立雜雜, 收息投機乜都有

下半年有兩條路, 一係就將投機的全入215 等運到, 等於以前陳啟泰的, 而家唔玩拎獎金, 主動放棄黎緊可能爆升的牛市, 換黎每年7.3% 加賭特息私有化 然後lam 最後一轉換樓飛升

第二條路係繼續玩, 賭下半年或26 年牛3 爆升資產再升多一浸然後換樓飛升

第一條路只能保証每年增長10% 左右, 但下限可能係-5%

第二條路可能博到增長30%-40% 左右, 但下限可能係-20%

其實今年真係超額完成, 我已經好感恩, 所以已不止一次想行第一條路每年收住息等牛3, 或者黎緊都會咁做, 慢慢減左D 升得較多的, 換入穩定7厘, 比較符合我個性

預計澳門經濟係胃升場收皮後再插一棍, 渣電召的同外賣有年輕化的跡象, 其實黎緊我只要唔輸, 應該就可以跑贏澳門經濟, 賭收極其量只可以不跌, 但外勞大軍唔會減,變左本地人繼續叫救命, 受惠的只係一些核心權力遊戲份子

其實睇澳門樓, 係要睇埋香港樓同內地樓, 而家香港樓可以任買, 同時新世界等地產商仲係度散緊貨, 而且仲有班高才租金頂住, 租租真係日日賺, 點解要買澳門樓? 

即係香港樓升--> 買香港樓,  香港樓跌--> 買香港樓

內房一樣, 內房好國內經濟好, 賭收就好, 而且大灣區的樓性價比唔輸澳門樓, lum sum 又細

澳門樓要升, 唯一諗到的情況係香港樓同內房都爆升左一輸, 富到漏油, D 人有錢無野做先會幫襯下, 澳門本身大學同醫療金融同香港跟本無得比, 其實唔會有租金頂到

第二個case, 澳門開放金卡身份証 (唔好呀丟七你) , 澳門身份暫時仲係吃香的

否則, 黎緊幾年澳門樓或者真係可以跌到超乎想像

關於澳門樓

澳門樓低處未算低, 23年12 月開始睇樓同計劃換樓, 24年4 月差D 已經落大訂但好彩業主死都唔肯減20 萬, 最後換唔成樓, 之後到今年港股翻生, 資金比當時多左4 成左右, 同期樓價比當時再跌左一成, 算執番身彩

今日睇到個心水盤, 又到左歷史低位, 搞到心郁郁, 最後決定左將呢個換樓的決定比交上天同鉅哥

如果215 邊日派特別息或私有化, 我就換樓!!!

哈哈哈哈哈

群魔亂舞

過往只要我觀察名單內有幾隻股出現單日爆升幾十% 再收市急回, 都差不多大市要調整

尋日光大一下爆上5 成收市單位數升幅, 千味好濃, 非常有上年9月尾的FEEL

最近穩定幣炒得咁Happy, 我有幸都lam 到少少717 同妖才, 都係執得幾皮, 但已好開心

好彩大市都未係好瘋狂, 只係集中炒一個版塊咁概念, 証明都仲係未牛3 last dance, 但穩定幣概念其實真係得個概念, 拎個交易牌都唔係好難, 但都可以升幾倍, 真係喪

保持理智, 有機會就lam 番三五七皮幫補下收息大軍, 希望今年內完成百萬收息夢吧

南方通信

今朝717 又爆升, 基本已經翻倍了, 沽左一半淨低的任佢飛, 或者拎到穩定牌呢, 到時1 蚊見哈

哥幾皮刀仔又繼續碌, 買入南方通信, 唔知咩黎, 見佢賣左間公司都執番2 億, 市值2 億, 又買幾皮玩下, 0.17 插番去0.11, 都極有可能買在半山腰, 刀口Lam 血 玩下

牛市真係要有夢想, 光大控股都可以9 蚊, 真係痴, 又印証左哥句說話, 萬物皆週期, 千其唔好對任何行業任何股有偏見

大金融

每次都好想買少少大金融, 但每次大金融一拉都係回調的開始

之前買過內險, 券商, 融資, 每次岩岩開始賺錢就會回調倒輸離場, 已經試過四五次

今日又拉大金融, 但係今次我無貨了, 連之前有留意的國銀, 遠東宏都升左好多, 內銀更唔洗講升到痴線, 內險叫做主升左一浸, 但真係無心機買

唯一一隻叫做有少少融資關係的, 就係AK 哥隻中關租科技, 個名有科技, 聽落以為係借錢比科技公司, 睇真D 原來係借錢搞咩科技發電, 科技農業, 科技工業哥D , 所以買得唔算多

有點可惜, 不過都無計, 無辦法飯飯都比你lam 盡, 算了

同步上映REITS 沽升淚.......嗚

再見, 我的初戀跟你一起也不枉

正式和941 分手了, 全部5.1換入舊愛008, 008 自從4.8 賣走後一直買唔番, 除左淨仲企得穩5蚊樓上, 加上有穩定幣概念, 收住7.5 厘等運到, 淨下的交比時間了

941 由 2021 年起制裁開始買入, 40 蚊買到70 蚊, 高峰持股5 萬零股, 2025 年沽清, 歷時4 年

再見, 我的初戀跟你一起也不枉~

牛市大忌: 手多

如果大家堅信而家已經係牛市中期, 要做的野就係唔好做野

我每年年尾都會review 一下如果年頭持股唔郁, 到年尾收益會唔會多過實際現有時倉, 基乎九成都係, 唔郁好過郁

我係雪球有個模擬倉, 應該三年前起的, 真係如果而家仲渣住, 唔好講收益, 我已經唔洗點理佢, 基本無可能跌番我的買入價, 我已經可以係加肋脾海峽嘆住Martini 睇戲

不過世上沒有如果, 凡事皆有因, 股市從來都係波缺雲鬼(宮心計學的), 我今日的倉一定係當日種下的因, 所以只能接受, 但牛二牛三唔同, 一旦比人西落車, 你錯過的係五年的等待

今波牛市如果係真, 積發五年的力量, 只要你仲係遊戲內一定享受到, 升多升少, 但一但落左車, 唔止離開了幸福的高速路, 好大機會仲會係高位上番車然後倒輸, 除非你自制力勁過牛頓

所以低位入左貨的真係唔好多手, 我上星期都手多5.9 除淨前賣左兩萬股1133, 點知除完淨仲升穿6, 牛市真係唔好估頂, 最多減持少少過下手癮, 亦唔好沉迷高位追貨, 是你的就是你的

願牛市與我們同在, 祝各位捱過五年港股暗黑期的同志們今波大賺

又少一隻十厘股

德林同泡泡係咁意Hi 下邊就爆升三成, 原來諗住收息用, 無啦啦變成長股, 現價七厘

另外隻京投升下升下原來都得番七厘

517 除淨後極速填權

而家十厘股淨係優品360 同垃圾海螺材料

港股真係好瘋狂

目前尚算底估的幾個心水股

1. 華啤青島海底撈 -- 特別係青島, 比我4月7 賣出價仲平

2. 華潤雙醫 -- 爆炒創新藥, 資金可能會流入? 老年受惠股, 保健品+入院檢查....睇牌面都係大底, 特別係1515, 比准陰陰左三年

3.內險--牛市放大器, 但水太深, 都係平安太保好似穩陣

年底3 萬點?

港股今年真係威水, 半年升左20%, 上年又係升左18% 左右, 按我自己統計, 23 年尾底位萬七點, 升左七千點了, 可喜可賀!!!

但係, 恒指係2019 年二萬八開始殺落黎的, 而家只係去接近番2018 年個位, 即係當你2018 年all in 恒指ETF, 而家都未回本.......

2018 年到2025 年, 慶幸都不過不失, 由抄TMT, 抄電力, 抄海油, 抄聯通, 抄移動, 雖無大功, 亦無大過, 賺到幾餐茶記, 至少唔洗好似all in 恒指咁慘, 而家希望1133 繼續延續傳說啦, 升到8 蚊我就可以收爐啦~

照咁睇, 三萬點真係唔算過份呀, 第三次召喚老火雞出場:

老火雞:  不要失去你的頭寸

有一天，有一個名叫埃爾默的人找到派特裡奇，並建議老火雞賣掉手中的克萊美的股票，並告訴他：我的人告訴我說市場肯定會有一次大回檔，你現在把手上的股票賣掉，到時候可以用更便宜的價格買回來。

但是老火雞卻告訴他：我不能這樣做，如果我這樣做了，我就會失去我的倉位，如果你到了我這個年紀，你就會明白任何人都無法承受丟掉倉位的代價，就是約翰·大衛森·洛克菲勒也無法承受。我也希望這檔股票回檔，這樣就可以用很低的價格重新買回。但我只能根據自己多年的經驗來進行操作，我曾經付出了慘重的代價，我不想再交第二次學費。

一生至愛941

唔講唔覺941 就90 了, 其實941 去到100 係大機會的事, 當內銀都升到7 厘, 941 5 厘真係正常到乜咁, 現價稅前5.5 厘左右, 對險資同基金都仲有吸引力, 但對小弟吸引力已大降了

好早已講過買941 唔好講咩增長雲AI 數據中心哥D前景高大上, 就係每年5%利潤增長+ 75%派息比率, 2027 一唔小心派個十蚊八蚊特息, that's it!! 

但而家應該9 成係牛市了, 5厘的941 真係完成歷史任務, 就連883 保底的45% 都就黎不及, 大部份籌碼比仆街侵係80 蚊呃走了, 得番4000 股, 換唔換去883 好? 定係留作紀念呢? 呢句由80 開始講, 但慢慢咁升, 同008 一樣. 9 厘升到7厘, 痴線, 但股市只有一面, 就係正確的一面, 只能講存在必有理。

又講下黃金股, 今波主要買左靈寶(抄功課) 同龍資源(抄功課), 而家基本主要渣龍資源老母亞太, 以及佢老母的老母聯合, 同埋紫金陳隻紫金。黃金股真係純抄功課, 左抄右抄, 回報都幾好, 但真係唔識睇, 邊個礦山邊個易採邊個產量高邊個儲量多, 仲要睇埋個礦的地緣政治風險, 講真難度真係僅次於醫藥。

亞太老母主要睇中佢年派0.1, 手上一堆黃金股礦股, 但係咪真係受惠黃金爆升? 只能講大概率, 上年都因為鐵暴跌所以大減值。或者只能算係模糊的正確吧。投資何常不是? 按計算機按到出煙的, 有幾多個有好下場?

投資的股投機做, 投機的股投資做, 真係開始慢慢明白, 投資一樣要有警覺, 不能死hold, 投機的也要認真做研究, 不能亂9 咁來，投資之道真係要自己慢慢悟出來的, 好似英皇資本, 往績極差, 但只要計到數拐點出現,回報是極大的, 就可以按注碼下注

美國減息下的215

215 其中一個派特別息的機會, 就係36億現金無得再係銀行收息, 過去基本收到億幾, 所以215 保證派息之下有一半錢係由定期出黎的, 但如今hibor 暴跌, 美國如果再減息, 可能定期收得幾千萬, 但派左特別息215 又好難用現金流繼續維持固定派息。

我大膽比個方案, 派特別息, 然後賣盤, 有識李大少的麻煩同佢講聲, 謝謝。

沽清REITS

新世界的煲越黎越大....沽清所有REITS, 換入215

超額完成了, 雖然平均仲有8 厘, 但君子不立危牆, 先走為敬, 可惜等不到港股通了

清潔能源設備三件套

東方神起: 龍頭大哥, 估值最貴, 技術最前沿, 基金同大戶最鐘意, Q1 利潤爆升, PE 8-9

哈電: 超級翻轉股, 之前大提計洗盡沿華重新上路, 如果半年報對標1072 利潤增幅 27 %, PE 4.5...仲有回A 概念, OMG

重電: 重慶康明斯Q1 利潤已經大增, 今年起碼幫重電賺到7-8 億, 但其他業務有D 廢, 不過又有重組概念

我係呢三隻清潔能源設備股身上, 睇到當年電訊三傻的影子.....炒核能不如炒核能設備剷子股

最正宗的核電剷子股依然是我心愛的大哈電

東方神起 = 移動

哈電 = 電信

重電 = 聯通

哈佛都要收皮

熟悉我的朋友都知小弟一直為緊子女第時的升學計劃愁緊，雖然兩個都仲係小學, 但都係英文學校, 一直諗緊是否找機會轉番去中文學校, 卷唔卷唔緊要, 最重要符合國情, 每日望住老侵係度玩呢D, 之前已經話會取消留學簽証, 迫到D 大學叫學生唔好離開美國, 而家仲痴到叫人即時轉校....

真係不敢想像哥D 千辛萬苦拎到哈佛或其他頂尖大學OFFER 的學生哥內心有咩感受...淪為政治的籌碼......更物論佢地的家長, 由細培養, 洗過千萬, 終於拎到全球No1 哈佛OFFER, 突然話唔收得... 

真心想問 are you fuxking kidding me??

美國土安全部（DHS）5月22日發聲明，宣布取消哈佛大學（Harvard University）招收國際學生的資格。哈佛批評此決定「非法」，並承諾支持外國學生。據路透社報道，國土安全部長諾姆（Kristi Noem）表示，除了哈佛大學，特朗普（Donald Trump，又譯川普）政府亦在考慮對其他美國大學採取類似的行動，表示可起到警示作用。

原文網址: 哈佛：停收國際生決定違法　國土安全部長：擬向其他大學同樣制裁 | 香港01 https://www.hk01.com/article/60241069?utm_source=01articlecopy&utm_medium=referral

超級OT系: 英皇之英皇資本

初次接觸英皇係英皇酒店, 巨額現金最後被佢同系食晒, 收了一堆垃圾

最新見耀才被收購, 又找到隻717 本地券商, 本身呢一系肯定係OT 架啦, 但有趣在佢當年搵到太平保險入股, 入股價係0.66, 然後2019 年開始巨額減值, 2019 年9 億, 2020 13 億, 2021 年9 億, 2022 年6 億, 2023 年 4 億, 2024 年1億5, 合共減值42.5 億左右

由股價0.66 減值到而家0.063, 市值得番4.3 億, 坑到太平輸9 成離場, 經典呀

睇番減值原因黎黎去去都係D 客爆孖展唔還錢, 同埋抵押的物業價值暴跌, 真係衰過大耳lone, btw 今年好似減值到尾聲, 投機性買左五萬銀, 睇下能否係呢系中刀口lam 血賺到錢?

天空灰得像哭過

繼我第二愛的008 賣出後不斷突破, 今日941 都爆到上88, 我一D 都唔高興, 因為我得番4000 股

我最愛的941, 無論咩理由都好, 我放棄左佢, 個心好痛, 唯有送呢首哥比佢

天空灰得像哭過

離開妳以後並沒有更自由

酸酸的空氣嗅出我們的距離

一幕錐心的結局像呼吸般無法停息

嗚~~

今年只看三隻股

哈電:  

3 蚊走上黎, 感覺同我當年買聯通好似, 今次起碼渣到8 蚊

中國動向: 

就係賭螞蟻, 唔洗講咁多

九建: 

牛池灣當你賣1.5 萬一呎, 成個盤5000 伙, 200 萬呎, 即係300 億貨值, 補地價100 億, 當你建安乜乜水叉叉100 億, 應該都賺到100 億掛, 希望今年內預售2000 伙, 即係已回款100 億, 即刻可以減輕負債, 夾埋hibor已經暴跌, 黎緊老美減一厘息, 一個字, 賭

除左哈電, 其他兩隻都係賭, 最緊要控制注碼

老朋友, 牛池灣

REITS 突然爆升, 沽出少量823 778 , 買入識於微時的老友柯生

柯生, 我下半生幸福靠你了

最近睇小金人的片, 佢有一句印象幾深刻, 佢話因為佢熱愛交易, 所以佢唔會放棄, 因為呢個係佢鐘意做的事, 我又覺得交易其實都係我鐘意做的事, 但再諗深一層, 前提係要賺錢, 如果輸錢時我都覺得充滿樂趣, 應該又係另一個境界, 哈哈

又諗起我偶像Jack 哥所講, 賺錢只係做正確的事的副作用, 關鍵係要做正確的事, 但係咪正確, 我地都只能係事後先知, 呢個就係困難所在, 錯誤但賺錢, 正確地輸錢, 你鐘意邊樣?

最近買賣開始找回自己的節奏, 慢慢來, 今年目標20%+ 就好

全球最宜旅行國家

早前睇左段片係一位係中國生活左十幾年的英國人, 番到英國後吐嘈英國公交, 設備, 衛生, 支付都大大不如中國, 歐洲呢幾年真係退化左好多, 出左名多賊同埋污糟, 出行又麻煩, 反而番國內旅行真係爽到飛天, 打車方便到暈, 又平, 真係痴線, 我係杭州打45 分鐘車扣左券竟然只需50 蚊, 杭州喎, 而且係秒接單, 唔洗等車, 唔洗求人, 媽媽咪呀

以前對歐州旅行真係好大憧憬, 十年前去過德國, 瑞士, 奧地利, 風景都真係超靚, 但人大了, 除左捱一程長途機, 去個旅行真係唔係再咁願舟車勞頓, 中國宜居同旅行的程度未來十年好大機會更上一層樓, 無論係治安同科技民生應用的程度, 相信未來同西方大國漸行漸遠

魔幻四月完結

魔幻四月終於完了, 兩個字總結, 痴線

一到三月都仲形勢大好, 個倉市值新高, 然後由3月尾業績連續幾單爆獲, 個YTD 開始一路跌....

去到4月7 突然老特出招暴跌, 由YTD 十幾%兩日變成微輸, 心灰意冷,  一度減倉到得番四成, 諗住今年就此退出江湖, 提早收爐

點知形勢又突然風回路轉, 可幸減倉時941, 008, 215 等無跌, 全部換入1133 等等的錯殺股, 加上耀材神助攻, 終於係4 月30 日接近番4月頭的高點...

真係一額汗, 如果唔係之前月頭已減倉出海股, 如果唔係誤打誤撞換入左1133 579 之類, 如果唔係見個勢好轉即刻將五成現金打番入REITS 1883 9988 700 國企順手屎忽痕買左3 萬股耀才.....

呢波運氣佔比很高, 一額汗, 幸保不失, 可惜係失去左008, 黎緊Ms Seven 話5, 6 月仲大獲, 老尾D 債, 關稅, 都係6月見真章, 美國會唔會爆煲?  還是應該趁而家現金為王?

51 假期思考下今年的去向

電盈 和仔 新高

8 仔真係強到無朋友....和仔都通終上番1 蚊

8 仔雖然唔係耀才 1133 596 哥種20% 上落的股, 但係真係一隻穩如老狗的好股, 之前跌到4 蚊以下已經無腦上左倉位, 升到4.8賣, 4.3 再撈番, 原本係禾味龍坐收漁人之利

可惜呀, 心不正意不堅, 茂易戰令我將8 仔的籌碼全數交番比市場

每日望住北水係咁掃Q 8 仔, 得番2 萬股, 真係心up

和仔又係, 覺得金身被破, 0.95 以下唔敢大買, 轉下眼又1 蚊

茂易戰令我最傷的, 唔係止蝕左一堆出海股, 而係將我一堆穩定收息股盡數交回市場

未來迎接我的, 將會係一個動蕩不安的戰場....嗚

==============================================

另外睇到西葡大停電, 真係幾諷刺, 堂堂歐洲大國連電力都維持唔住, 反而中國長期水電煤穩定供應

7.5 沽清最後1 萬股耀才~買入9988 @ 115, 反哺番爸爸 :)

螞蟻買耀才

當時買耀才係因為美國迫中概退市, 買388, 順便覺得本地券商好似都有受惠, 求其2.6 買3 萬股

買左一個星期估唔到就被人收購, 出價3.28 其實都係執兩皮, 真係有D 失望

不過買家竟然係ANT, 又真係唔同講法, 即刻嚇到千億FUTU 跌出一個耀才, 笑左

就咁諗, 如果咁大威力, 求其值十分一FUTU 都100 億啦, 都唔好講ANT 唔知係咪收到風有政策配合, 或者黎緊如果係牛市, 中概回港等, 全部都有利本地券商, 一個唔覺意入埋港股通, FAT

原本一星期執廿% 都Happy, 諗諗下, 又唔係好想賣, 幾皮野, 如果ANT 真係搞得掂, 100 億市值 起碼6 蚊真係不是夢, 但講到明唔會派息, 即暗示收息撚唔該3.28 收錢走人

可能如果升到4 蚊就走吧, 升唔到就放埋一邊煲醋, 有趣有趣

===============================================

4.15 賣了1 萬股, 3.9 加回, 決定同馬雲共存亡~

勁假時段留個念, 笑左, 希望十年之後真係可以升10 倍

==============================================

忍唔住均價5.6 沽淨1 萬股, 全換中國動向, 原諒我彈出彈入, 幾日賺差不多十皮真係超額完成啦, 忍唔住, 哈

慢慢回血中 - 關稅戰第一站總結

最近憑住1133, 579 成功回血一大半, 距離最高位仲差一點, 但我已好滿足, 因為世界太離譜

回想之前組合重創, 主要係心多走去搞出海消費同工業, 其實主流的國企同電訊跟本無跌過, 好多仲升得多過關稅前

未來重心放回國企分紅股, 1 成左右打下野搞下高風險例如紡織, 家電, 航運, 其實受幾多影響都仲係偽命題, 講真淨係睇係邊度設廠真係太膚淺, 關稅係全球化的, 間接影響應該好難計算

仲有TMT 只主力搞700, 副9988, 700 低調得黎受惠AI 最廣, 如果AI 未完的話, 美團同京東係度互劈, 700 應該笑而不語, 信創就有浪潮同亞信

REITS 都有少少蠢蠢欲動, 可能開始炒減息, 不加不減, 今年9 月睇下入唔入到通

941 季報, 都繼續債券中, 老實80 的941, 6 厘半, 稅後勉強6 厘, 真係不如三年計劃的579, 不過得番唔多了, 4500 股, 留個紀念, 萬一2027派10 蚊特別息呢? 941 已完成佢的任務

火電都好強, 可惜我主力836, 大唐之前被人震走左, 分分鐘火電今年都會有不錯升幅

之前的妖股3390 賺少了, 原本應該執多一倍, 但敵唔過人性呀, 不過本來就係賭, 有賺就好

反而之前買落的3萬股耀才竟然買左一星期唔夠就私有化, 有少少運, 迪生又私有化, 不過無貨, 黎緊都有可能真係私有化潮, 86 有無機會? 買番少少看下吧

最近買回不少股, 現金得番5%, 找回自己的調調, 繼續謹慎前行, 市場總會係人性瘋狂的時候對你迎頭一棍, 保持清醒, 關稅戰不會咁快完, 90 日後先係真章, 6月又美債發新, 美元體系又老危, 今年絕對唔係簡單的GOGOGO, 除非老侵下台

最接近941 的存在

579 出左個三年分紅計劃, 太感動, 終於找到一隻最貼近941 的國企股, 就算按2024 業績, 分紅升到42%以上, 2.4 都有7厘半

今朝2.31- 2.35 do 左十萬股, 而家有二十萬股, 未來三年可以逢跌加倉

老川彈出彈入, 真係唔好跟車太貼, 關稅股最新反彈得好勁, 但唔好忘記佢係傻的, 始終都係他強由他強的股好 = 國企分紅股

重新買入1883

大跌市開始買入1883, 老朋友了, 今年的35 億債到期, 點都減到幾千萬至一億息, 加上利潤見底, 管理層如果保持派息比率, 點都派到0.2 , 除埋淨都成九厘, 係失去左我至愛的8 仔同941 之下, 唯有向呢D 次優股靠攏

信邦及裕元

貿易戰真正的影響而家先開始出黎, 信邦的自願通告及裕元Q1 大奶, 其實都係岩岩開始

黎緊不要太樂觀....除了金價...美元未來只有走弱和爆煲兩條路, 金價基本沒有阻力, 4000 不是夢

龍資源又沽升淚, 靈寶紫金有機會再加倉

REITS 幾時入通?

期待左成年的REITS 入通, 搞黎搞去, 蚊都訓

見到大家都好期待4月19日似乎有D 消息要公布, 唔知真定假, 不過REITS 好似已經有少量動L

我而家都渣唔少823 778 435 808 順風等, 不過最大機會應該係823 778, 長遠就睇租金點搞, 寫字樓危險, 所以435 808 只敢少倉抄一波

1133 今日又新高, 仲差幾個點, 我就可以去番柒朗普搞事之前, 希望REITS 幫我一把

http://www.csrc.gov.cn/csrc/c101983/c7541688/content.shtml

==========================

後記, 完來上面條Link 講的係2024 4月19, 炒緊冷飯, 呢獲真係天大的誤會........

賭!!

今日沽出早幾日買的龍資源, 投機執五成都有幾皮, 然後今早係停牌前將哥幾皮利潤買入妖股3390 @ 0.26, 哈哈 又睇下可否成功冧庄。

小賭怡情, 苦中一點甜

錯殺股跌完

手上一堆錯殺股例如1133, 579,  啤酒, 8 仔都升番去關稅前的價位, 連941 都升過左我沽出的80 蚊大關.....

但我手上仲有2 成幾現金呀........T.T

唯有買少少REITS, 博下入通吧

今次真係一褲都係

尋覓省心收息股

我覺得老散投資者終其一生, 如果倉位去到咁上下, 最後就係要搵省心收息股

以前聖誕終買匯豐, 電能, 長建, 內銀, 香港發展商......其實講到尾, 老散要的只係一個歸宿

一個安全的收息歸宿

但呢個其實係奢侈的, 你諗下如果咁易搵, 世上唔洗有債券同定期啦

所以省心收息股唔係隨便有的, 某程度上同爆升主題股一樣難搵

回故過去, 應該只有A 股的長電, 係天時地利人和的背景下做到長升長有

其他的, 只可以做到某一個五年, 或某一個十年作為省心收息股

就算我最鐘意的941, 都係近五年先可以, 試下2007 年買? 

215 算係我炒股生涯遇見的最適合重倉收息股, 無耐李家而家搞成咁

而家目標係央企+強現金流+分紅, 暫時1133 勉強可以, 股災都將大部份941 換過去1133 了, 變了第一大持股了, 起碼未來3 年無憂

但1133 仲有兩個條件未達標, 就係淨現金同派息保証, 但多番個成長性, 仍未能無腦重倉

超級收息股必須滿足以下條件

1. 淨現金

2. 強現金流

3. 周期性低

4. 派息保証

5. 股息大約8%

或者省心收息股, 本來只有童話故事入面先存在....

股市, 從來都是修羅道

一日反轉, 再一日反轉, 三日跌4000 點, 真係只要你身在股市, 就會不斷創造歷史

呢波的確係做得唔好, 4月2 無減, 見恒指無反應第一日只減2 成, 然後大跌3000 先再減3 成, 尋日又追番1成半, 而家仲有3成半cash. 

老侵一句, 世界好似又咩都無發生過咁, 淨低的只係我滿目瘡痍的倉位

但我必須要減的, 面對不確定性, 我只可以減倉, 就算之後升之後追, 我都一定要減, 無法

老實抄股咁多年一路都叫穩健前行, 但呢波真係打到我信心盡失, 前日我真係差D 一鍵清倉, 未試過咁樣比人搞, 可能真係未見過大蛇柯尿, 以前股災渣住941 883 真係未驚過, 今次真係嚇到J都縮埋

btw今日點都要追少少貨, 唔好追求完美操作, 學小金人話, 以前係預測, 而家係應對

可能90日後條痴線佬又搞一波?

that is part of the game

黑暗的一天

今天為止今年已微輸, 但呢個結果係我甘願承受, 其實4月2 關稅日已一早知, 但竟然一D 警覺都無, 然後上星期四北水救駕, 只係減得2 成倉, TMT 一股無減, 兩個逃生門我都無把握好, 抵打

原本上年年尾3成941, 3成香港電訊商, 跟本係不敗之地, 比牛市衝一下, 將大部份倉搬左去TMT, 消費, 金融, 妄想一波致富, 最終一敗塗地

今早已盡斬持倉降至五成, 額外付出左7% 左右的代價, 由賺變微虧, 但我已心足, 因為錯得太離譜, 我諗我要重整一下信心先敢再買貨

股市, 從來都係修羅道, 我竟當左係提款機, 太飄了, 抵輸

保命鳥

估唔到今朝港股咁強, 8 仔仲突破5蚊, crazy

BTW 為保命, 沽清所有紡織家電303 992 1919 598, 任何個"海"字有關的都全沽

沽出2 萬股8 仔@ 5蚊, 仲有11 萬股

現金水平升至2 成, 可以吃少少花生了, 唔好急, 如果賣飛了就算了, 仲有八成貨

老實, 我覺得港股仲未price in 關稅可怕之處, 當然老侵都可以彈出彈入

謝北水不殺之恩!!!

電盈有古怪

電盈已經連續幾個交易日, 一到三點就頂高, 今日頂到4.97

315 , 6823 都超強, 215 今日都鬼鬼鼠鼠偷蕃薯

其實我一應該一早全倉HK 電訊, 太可惜

該斷不斷, 反受其亂

抄股最緊要記住, 綠帽唔怕戴, 最緊要除得快!!

一出業績唔掂就沽, 唔好留戀, 呢一招今年超級有用, 遲沽10 分鐘已差左幾個價位

440 大垃圾我中午一點即沽仲可以沽到31.5, 諗住淨番少少睇多陣已爆插到28.5, 最後都係29沽清

唔好諗住變左心的女人放耐少少會轉死性, 要等就等佢轉左死性先戴番頂帽

估唔好最後一日都要比大新孖寶爆擊, 因為呢兩隻有非常可觀的利潤所以一直無減持, 真係大意了呢獲, 又上左一課

大新銀行比較好, 派息加10% 至0.66, 8.5 計都有7.8厘的, 所以我只沽清440

加了肯加派息的幾隻: 海螺科技, 賤妹, 深國仔, 優品360, 1133 等等

和仔金身被破後, 港電訊已無咩可以買, 6823, 315, 8 都升左好多, 沽左的錢都唔知買咩好

呢一刻, 我迷網了.........

和記金身被破

國家宣布唔再同李家有新合作, 好多人都笑左, 但對於和記其實多左一個風險, 就係三大電訊唔再同215 做漫游合作, 到時和記無左國內漫遊搵鬼用? 雖然好似無乜可能, 但215 係長和子公司, 真係食到應, 人地三大唔用你係一D 事無, 但215無左國內, 唔通淨係做local 同旅遊咩, 漫遊業務岩岩先新高, 而家搞單咁的野, 真係收得皮

原本215 係我咁多年第一隻搵到99.99% 無風險的8厘債券, 而家出現左一個致命的點, 千里之堤，潰於蟻穴, 就算風險唔大, 都已經唔可以超級重倉, 我的215 收息百萬大計正式收皮

同理, 國企或者國內公司, 可以唔租誠哥office, 唔好睇少呢D 野, 覺得小孩子玩泥沙, 到傾續期哥陣直接排走你, 一D 難度都無

而家變左反而001係長和系內最安全, 因為都話之你死, 擺明繼續GO

重倉股簡評

941 : 無驚無喜

215: 債券一張

baba 700 : 繼續牛市

中遠海運: 升完十厘

哈電 good baby: 星辰大海

電盈 6823:收息主力

6626: 食之無味

41 REITS: 收息無妨

火電: 垃圾全清

另外仲有打野倉一堆雷, 第二日不問價全清了, 非常鐘意某KOL 名言, this is part of the game, 出得黎行預左要還, 黎緊重心可能又要到收息之路了, 有點累

現在是牛幾?

港股由1月開始瘋狂式上升, 而家已去到我心中短期目標25000 點, 最緊要搞清而家係山腰定山頂, 睇番港股呢波除左TMT之外, 內銀, 內險, 其實已全部低位反彈左差不多一倍了, 941 都殺到上85, 只係分紅股上年先漲, 今年漲TMT, 淨底未漲的板塊例如國企基建, 火電, 其實唔係淨番好多

呢波反彈其實唔算好暴力, 回下升下, 証明唔係賣情緒, 如果話係牛3, 其實大家已經體驗過, 就係上年10 月的爺叔之亂, 1 星期瘋狂爆升, 係全部野無理由全面爆升, 最深刻係1186 由5蚊直接拉到7 蚊, 係無原因咁拉, 呢D 就係牛3, 市場瘋狂搵低價股, 直至沒有股可炒, 牛3 破滅

港股壓左四年, 25000 大約係21年中左右, 根據鐘擺效應同肥尾, 應該算牛2 吧, 我估起碼3 萬點? 如果而家落車就無謂再望, 以免做牛頓, 但牛市往往最瘋狂係最後幾個月, 可以等於過去牛1+ 牛2 一兩年的升幅, 如何係避免提早落車同錯過牛3 之間作選擇, 真係好難.......

唔好講錯過牛3, 我接連亞信, 762, good baby, 德昌幾隻牛股提早落車, 雖然只係打野倉, 但已經痛不欲生, 無法想像錯過成個牛3 的心情會如何

又係哥句, 真正人性的考驗而家先開始

和記業績

和記最高峰時佔我組合19 %, 而家減到5% 睇戲

和記業績真係好簡單, 只需睇帳上現金有無減少, 同埋派息係咪跟足承諾

2024業績呢兩樣都做到, 合格了, 特別息欠缺

現價0.98, 7.6 厘, 可惜而家係牛市, 資金成本變到有D 高, 如果要收息100 萬, 要有1315 萬先可以

和記暫時依然係我心中最正的收息股, 沒有之一, 希望等到我走完呢波牛市再轉

所以今期唔派特別息, 符合預期, 哈哈

黃台之瓜再現

一單買賣, 變成中美夾心, 世事真係變幻

長和係中港業務唔算多, 應該1-2 成, 但呢個時候兩邊都迫誠哥做決定, 你唔賣老美就夾硬吞, 你賣中國你比個黃瓜綠帽你戴, 一世做千古罪人

真係點估到長和呢隻老舊廢, 賣一樣野會搞到咁大獲, 講真如果兩邊都咁鐘意, 你地唔一早買? 美國正常出價還好, 如果中國想要, 點解唔一早出3000 億買左佢呢, 而家夾係中間先搞D 咁的野, 咁以後賣國際業務都要諗下會唔會損害中國同胞利益?  賣屈臣氏又話會加價搞到中國人無貨買? 賣歐洲電訊又話中國人去旅遊要捱貴電話費? 咁唔洗玩啦大佬

手上只有2000 股長和, 但真心登誠哥無奈

再加消費

再用941 換多少少消費股, 越黎越覺得炒完科技就炒消費, 而家平均仲係12 ~ 15 PE

敏華, 海爾, 海信, 361, 特步, 啤酒, 潤水

BTW 啤酒同潤水出公告講派特別息都無反應, 今朝仲要跌, 唯有含淚加倉.....

manus 消費deepseek

manus 一夜間火爆全網, 但原來靠的係幾條video, 一個評分截圖, 幾個邀請碼水軍

情節非常熟悉, 類似同當年Tesla 老友Nikola, 幾張PPT 就搞掂

唔理manus 係咪真係咁堅, 搞埋晒D 咁的飢餓營銷, 買流量, 又唔開放, 谷熱度, 可恥呀

deepseek咁難得先令中國係全世界建立起AI 強國的地位, 估計將來越黎越多AI 界的Nikola 出現

牛市通病

1. 經常賣飛

2. 經常話買得少

3. 經常想賣落後股追爆升股

其實最好真係布局左就唔好點理, 如果覺得個倉跟大市關連度太低, 就加重少少, 但好多時你一輪動, 個市都跟住你輪, 最後都係運吉, 牛市跑輸好正常, 因為無人會全倉落後股, 除非係神

只要唔係有負面消息壓住的股或行業, 正正常常, 遲早輪到你

老戰友: 長和

真係無諗到長和係咁的情況仲可以make 到個靚deal, 雖然以PE17 計賣出一個全球性壟斷無敵現金流業務, 其實唔算好靚價, 參考番當年215 賣固網, 1113 當年賣中環中心, 哥D 就真係無敵鐵牙價, 今次190億美仔, 只能算中上吧, 如果係以前一定唔止賣咁少錢, 不過疊加地緣政治, 加上001 己經跌左10 年, 回到水1500 億HKD 真係算係咁, 47 追了極少當係還左個心願, 有機會45 以下再加吧

鉅頭, 依然是那個鉅頭, 布局以十年計, 但老散真係無幾多個十年, 不知可喜定可悲

消費龍頭+趣事一則

啤酒: 青啤, 潤啤

餐飲: 海底撈, 頤海

運動: 安踏, 李寧, 特步

牛牛: 蒙牛

家電: 美的, 海爾

呢個係咩世界.....係大把世界................

趣事一則:

話說之前11 蚊買左少少179, 見最近炒機械人, 上星期Send左個電郵比IR諗住睇下179 有無機, 點知IR 極速回覆話尋日會聯絡我解釋下業務, 有點喜出望外, 點估到我Send完第二日179開始狂爆連升七日, 到尋日已累升7成....然後IR 沒有如期聯絡我.....哈哈...我估呢幾日IR 已經比人炸爆左個mailbox....

換貨

沽3000 941 @80, 減少少以免941 倉位太重

入008, 1883, 再保險

人手一把倚天劍 - 未來是數據的天下

以前只有美帝裝備倚天劍, 中國只有一堆鐵劍...重劍....青銅劍....裝備上差太遠你點加攻擊都無用

而家DS 出黎之後, 等於新手村即送倚天劍, 個個都拎住倚天劍, 之後講咩優化之係+1, +2, +3 分別, 唔會有好大差距

咁接落黎又番番去自已技能點同等級, 底層實力差距

呢個技能點同等級係AI 黎講, 就係獲取的數據, 萬物皆數據

未來數據的質量係決定一家AI 公司的超級關鍵

兩家公司同樣接入滿血DS, 一家話用10 蚊, 一家話用100 蚊, 有意思咩?

700 元寶接左DS 比出的答案,  同野雞公司DS比的有無分別?

全中國最勁數據的三家公司, 我認為係9988 700 941, 係14 億人的數據呀, 源源不絕, 天下間只有中國可以做到, 數據好似滔滔江水...連綿不絕

不夠牛市的格局

倉入面941 依然最大舊, 睇住762 10, 728 就黎7, 941 仲係81 浮沈, 心裏滋味可想而知

如果個倉唔係之前打滿左阿里 700 之類, 呢一波仲慘過上年10 月, 因為上年762 都只係7 蚊

市場當左762 728 係AI 受惠股炒, 但941 仲係大牛龜, 我其實都唔明, 只係希望唔好拋太遠, 人地升10%, 你升3% 都好丫, 真係R 爆頭

講到尾就係無完全轉成牛市思維格局, 如果唔係我一定將941 分三份一到762, 我對電訊商都仲停留係DS 出之前, 收收息, 搞搞折舊的思想, 我係知道762 728 會拋941, 我都甘願承受無問題的, 因為我要941 的穩陣, 但大佬其他兩隻升左5成以上. 941 連10% 都無, 點忍呀......

呢個毛文都無咩好講, 只能守吧, 941 慢慢死去100 吧, 雖遲但到就得了, 只係可能到時762 14蚊, 728 10 蚊....

數據中心 + 阿里業績

沽出網易, 買回少量1883 和008, 又炒下數據中心

1883, 老戰友了, 今年業績應該見底, 除非唔係

順便加D 303 - AI 玩具龍頭, 信嗎? AI 娃娃都出了, AI 玩具會遠?

再順便買少少垃圾億和, 唔知咩黎, 見179 爆升, 買少少平替

阿里業績爆靚係另一個標誌性的起點,  信嗎? 定係你仲覺得係科網股3.0?

瘋狂CAPEX 指引, 加上電商見底回升

想像一下美股open ai 出黎之日, 有咩股升足一年?

電子, 芯片, 數據中心, 機械人 etc...只要買左龍頭長渣就得了

============================================

亞信嚴重賣飛, 點估到佢同阿里雲有關......我曾經都卜中過一隻牛股, 永遠紀念......

中國影響力

最近美國同垃圾BBC終於都唔唱衰中國, 加上外國網絡難民湧入, 慢慢中國係世界心目中的地位正常化, 世人終於知道中國原來係有電視

由上年遊戲界黑悟空一鳴驚人, 到今年DeepSeek AI 界一鳴驚人, 百億哪吒電影界一鳴驚人, 宇樹機械人界一鳴驚人, 早前睇過有D 西方報導中國的酒店送餐機械人, 其實中國三線城市都一早有, 但外國人睇到好似發現高達咁, 中國係自動化應用同支付領域一早已係世界級, 你點黑都無用

最近炒完巴巴, 我諗中國AI 應用場景龍頭都應該起飛了, WeChat AI search 已灰度測試, 只要一正式上線, WeChat AI 應用即刻變成14 億用戶級別, 全民皆AI...再次一鳴驚人

====================================

沽清非核心炒賣AI 股, 入941 4000@ 80-82, 長遠保留9988 700 

媲美口罩時期解封的標誌性事件

 《經濟通通訊社14日專訊》據《路透》引述三位消息人士透露，中國政府將於下周召開座談會，屆時中國國家主席習近平將罕見會見包括阿里巴巴（09988）創始人馬雲在內的商界領袖。

如果係真................真係不得之鳥

謹慎地買入消費股

開始謹慎地買入少量消費股, 真係要好謹慎, 科技股爆升只係基本面反轉的結果, 其他股都係跟炒, 實體經濟都係差, 慢慢買

暫時啤酒海底now為主, 和一點商場物管

老火雞: 不要失去你的頭寸

老火雞一個月內出現兩次, 真係有D 誇張

減唔減好, 做唔做T, 呢個就係藝術, 視乎你點睇

恒指就黎23000, BABA 由80 10日上到120 升5 成, 兩者短期都肯定會回調, 大佬日日升好快恒指5萬巴巴500

老火雞:  不要失去你的頭寸

有一天，有一個名叫埃爾默的人找到派特裡奇，並建議老火雞賣掉手中的克萊美的股票，並告訴他：我的人告訴我說市場肯定會有一次大回檔，你現在把手上的股票賣掉，到時候可以用更便宜的價格買回來。

但是老火雞卻告訴他：我不能這樣做，如果我這樣做了，我就會失去我的倉位，如果你到了我這個年紀，你就會明白任何人都無法承受丟掉倉位的代價，就是約翰·大衛森·洛克菲勒也無法承受。我也希望這檔股票回檔，這樣就可以用很低的價格重新買回。但我只能根據自己多年的經驗來進行操作，我曾經付出了慘重的代價，我不想再交第二次學費。

各位坐穩了~~

三大電力設備股

唔睇唔知, 原來三大電力設備股除左東方神電, 哈電, 第三隻竟然係重慶機電, 早排因為出口述話重組先留意呢隻野, 一直以黎重慶系垃圾股主要留意慶鈴, 因為有一舊淨現金, 知道重慶機電都係類似的垃圾, 但一路唔知佢搞咩, 原來主力都係做清潔能源設備, 而家多左條水叫智能設備, 但應該同AI 無關 (而家真係乜都AI), 可惜唔係淨現金股, 但哈電早排都訂單大增, 呢隻垃圾都搞左少少煲下醋, 買不了吃虧買不了上當

2019 年都新聞, 有趣, 當年東電7 個幾, 哈電4 個幾, 重電仲係0.7, 700 都係400, 事隔六年, 只有東電升3 成幾

http://paper.wenweipo.com/2019/04/12/FI1904120034.htm

阿里爸爸

上次靠阿里爸爸賺錢應該係炒螞蟻上市哥陣了, 哥陣一野炒到上300 蚊, 真係爽, 你敢買就可以賺

近幾年阿里經歷左去毛存青, 回購, 現金越黎越多, 雲有望再次成為焦點, 電商提供現金流, 加埋AI 龍頭的估值, 100 左右值博率不錯, 一唔覺意再整隻蟻仔更好

上次叔爺之亂倉入面好多股係第一輪爆升就賣左, 之後再升FOMO 買回, 最落一地雞毛, 同牛頓時空相隔幾百年, 竟然做相同的事, 人性幾百年都無變過

今次貨就有了, 控制自己獲利的欲望, 睇長少少, 堅定持有BABA 700 美團 京東992 等龍頭

低價買入的風險我已經承受了, 憑什麼不敢賺多D?

老火雞: 謝謝你, 但這是牛市呀

老火雞又出場, 今次是真牛市嗎? 港股調整左五年啦, 人生有多少個五年? 

最近操作都係將941 215 換去TMT, 最威威的應該算係992, 倉入面的科技股大部份都係新年後第一個交易日加倉的, 真係估唔到新年咁震撼的Deepseek + 央視機械操, 開年第一日都仲可以跌, 真係不愧是港股, 唔喪DO 都對唔住自己

Deepseek 的出現係我心目中等於當年Chat GPT, 等於巴拿馬運河打通左大西洋同太平洋, 順便活化埋中國資產係外資心中的地位, 但好似仲有好多人唔信, 西方垃圾仲要封殺Deepseek, 真係嬲豬

今日搞左少少潤啤, 同埋低空經濟的中國通號

起來~不願做韭菜的人民~

人生的結局

大S 單野都幾感慨, 當年流星花園真係算係我的年代, 48 歲就完結, 真係可惜

點為之一個好的人生結局, 我諗應該係瓊瑤咁, 一生要經歷的都經歷過, 晚年要享受的都享受過, 最後係自己仲有能力清醒的情況下離開

呢個結局唔洗好有錢(雖然瓊瑤好有米), 我諗一般中產都做到, 只要後代唔係太廢, 照顧到自己, 晚年可以自主身體同財富, 得閒享受下天倫之樂, 真係一般人可以得到的最happy ending

又或者菜欄咁, 勁有錢, 唔生仔, 食乜玩乜瀟灑自在過一世, 但呢個要好大的財力先得, 或者晚年普通人最易得到的快樂應該都係天倫之樂

努力搵錢, 到時仔大女大自己搞得掂, 我再有心有力咁同老婆周遊列國玩番三五七年, 不枉到此一遊了

爺叔之亂會重演嗎?

聽日港股通就開, 長假後開通前的爆升, 真係似曾相識, 雖然無上次咁爆升幾千點, 但總體黎講呢幾日都升得好靚, 令我再次想起上年爺叔之亂的恐懼

幸好今次提早都入左一堆科技消費股, 雖然今日都有高追少少3690 同京東物流同992 但大體都仲係可控, 今波炒的不是政策, 係實打實的Deepseek, 就算實際作用打個三折, 我都寧願相信呢個係我等左咁耐的科技股爆點, 感覺好似24年頭NVDA 400 蚊時一樣, 個感覺比上年爺叔之亂實在好多

要信就要早信, 就算玩我一百次, 最多止蝕一百次, 萬一有一次是真的呢? 

加爆阿里

仲可以用91 加到9988, 398 加700, 必須賭一下國運

========================================

港股呢一刻真係機會處處, 鐘意穩定的有HK 電訊商穩定收8 厘, 鐘意刺激有TMT 消費PE 平均15 回購現金一堆, 鐘意大隻的有中移中海油一堆破淨國企, 我只恨自己唔夠錢買呀, 目標太多

引用某KOL 的金句, 呢個係乜野世界, 係大把世界呀

港股IPO 謎之現象

港股而家出現左一個現象, 就係有D 股比當年招股價大覆折讓, 呢個唔奇, 但奇在呢D 股仲留住番年招股得番黎的一堆現金, 超過市值

好似朝雲集團, 7 蚊IPO, 而家1.8, 市值24 億, 然後淨現金+股權已經差不多市值, 每年賺2 億左右

朝聚眼科, 10 蚊IPO, 而家3 蚊, 市值21 億, 淨現金又係差不多等同市值, 每年又係賺2 億

星盛, 3.5 IPO, 而家1.18, 市值12億, 現金又係十幾億, 每年又係賺2 億

最近的, 華潤山泉, IPO 吹到上16, 最底時10個半, 而家12, 市值300 億, 淨現金成百億

有時真係唔知IPO 輸的係邊個的錢, D 基石係咪真係傻到咁? 呢D 股又係咪永世都番唔到IPO 價? 真係港股先有呢D 股, funny

港股TMT

除左小米之外, 港股TMT已連跌幾年, 好似BABA 呢隻垃圾由2021 高位3 舊水跌到60, 而家80, 疼信700蚊 跌到200, 而家390, 相對好一D, 醜團400 跌到60, 而家150

但今時今日的TMT 已比當年好, 現金流, 基本面, 盈利都進入左直路, 以醜團為例, 當年400 仲係燒錢, 而家PE 已經15,疼信都係15 左右,  BABA 12 左右, 然後一堆淨現金, 然後一堆回購, 市場偏見好似已經差不多進入拐點, 如果求其一個利好, 或者求其一個牛市, 可能就會爆炸

為免重現上年10.1 的牛市慘劇, 配置一下, 收息有時都不能盲目, 700 由於有刀在頭, 暫時BABA 醜團京東應該好點

西方領袖

由於有小朋友, 一直有留意外國經濟環境, 睇下係咪適合佢地以後長大升學

我哥個年代可以出國讀書真係自帶光環, 畢業後搵到好工都係佔多數

但而家真係唔敢講, 英美澳加, 一係經濟唔掂, 一係瘋狂排斥華人留學生, 加上而家中國條件好左, 大把人出國, 而家要畢業後留係當地真係難上加難, 如果你話畢左業又回流, 我覺得真係不如本地升學算, 開眼界, 增長見識係有用, 但今時今日出國性價比真係急降, 四五百萬好多方法幫到小朋友開眼界

加上而家好多西方領袖真係好有問題, 一係就左膠, 一係就好似加拿大條導怒多咁, 真係唔知佢在位9 年係度咩, 瘋狂謎之政策搞到加拿大一PAT 屎咁, 另一個出國熱門英國又係, 狂換首相, 英磅暴跌, 經濟崩潰, 真係要學大師兄講全部都係la G, 美國就更加唔洗講唔會歡迎華人留學生, 唯獨澳洲都仲係唔錯, 但太多人去澳洲啦, 如果有得畢業後留澳都應該幾好

歐洲雖然唔係出國熱門, 但除左德國又係一獲泡, 德國工業都正在瘋狂被中國取代, 車廠已成為第一滴血, 又係危, 其實我好鐘意德國, 如果唔係德文太難, 真係想學下老左去德國遊學

無意對比中西, 只係有D感慨, 小朋友廿年後真係唔知係咪光景

1310 爭奪戰

1310 又有基金想入標, 其實爭咩丫, 香港咁多電訊商, 買其他仲好啦

215一買即送36 億比你

315 一買即送10 億比你

8 仔一買即送楷哥比你

爭咩丫, 溝埋一齊做瀨尿牛丸丫笨

=========================

1月16

唔知係咪有基金睇左我個blog, 楷哥呢兩日神勇到4.7, 禾味龍, 淨係敗家子215 仲成條蕉咁, 2月尾出業績時我一定要打佢屎忽

騰迅是機會嗎?

騰迅兩日唔見10%, 係咪機會? 我覺得中長期是, 短期肯定不是, 中長期700 岩岩整左個送禮, 回購, 增長同基本面靚仔, 但短期係大股東+外資沽VS 散戶+回購買, 國家隊同險資肯定唔會出手, 一日佢唔宣布會唔會列入實體清單, 一日都有把刀行係條頸, 點買?

所以我話中長期係機會, 因為基本面同管理層都好, 但短期資金面的壓力一時三刻搞唔掂

然後好多人就話價值投資, 唔洗睇股價乜乜乜, 完全錯誤

中長期定義係咩, 一年, 三年, 十年? 短期有幾短, 三個月, 半年, 一年?

騰迅的case 同中移還是有好大分別的, 首先股權結構天差地別, 941 當時大股東係國企, 退市回A 爽YY, 而家700 大股東係非洲黑人, 再來941 當時跌到9 厘, 真係盲眼入沒毛病, 700 基本面係好, 但A4滿天飛+ 極低股息, 就算買都唔會係拎桶接哥種

350 開始接少少無壞, 但短期真係唔好希望有咩大爆升, 除非上海爺叔放監

2025 開局 (續)

開局幾日, 美國即刻將700 列入制裁清單, 美國有幾個唔同清單, 列入有唔同效果, 我未詳細睇, 但如果係同中移動同一待遇, 即係迫資金要賣出, 呢個真係禾味龍.....但亦意味住唔可以咁快抄底, 當年941 係跌左幾個月先到底

睇雪球有一堆人磨拳擦掌今日撈底, 我就觀望, 本身有少少貨係手, 跌我唔死, 但抄底抄錯係同追高一樣可以致命, 除非真係跌得好應棍

尋日再研究香港本地經濟, 發現樓舖商廈暴跌的效應而家真係冰山一角, 銀行一堆抵押物價值爆跌, 壞帳都未出來現....而家只係燒到新世界, 真係只係第一滴血, 到燒埋其他中小發展商..特別係同新世界合作哥堆..到時一堆賤價物業推出市場....然後到銀行call loan收水....企業裁員....港幣又要同美金掛勾....經濟通縮.....呢個先係大檸樂, 到時真係火燒連環船, worst case 重回97爆煲, 和記都唔知係咪頂得住, 到時真係渣咩都死, 不能太樂觀, 謹慎前行

2025 應該唔易玩, 如何係危和機中平衡唔好比GOGOGO fake 到, 真係關鍵

2025 開局

2025 開局喜提跌市, RMB 匯率新低, 貶值今年應該係主旋律, RMB 計價收息股要留意下呢點, 另外係國債收益跌到1.4%, 疊加RMB 貶值, 應該加劇資金外逃, 我睇好港股通的高息股, 特別係HKD 計價的, 同埋央企收息股941 883 應該都不錯

呢兩日買左少少823, 8%如果入通應該都好受歡迎, 到時賣比北水yum yum yum

2025 方向, 央企管理, 分紅高息, 鼓勵消費, 呢堆野都可以睇高一線

不用太悲觀, 也不要太樂觀, 一定一定不要追高